С.Жавхлан “Хамаг Монгол”-ын дуучдыг нэгтгэлээ

Чингис хааны үеэс улбаатай гал тахих ёслолыг эхлүүлсэн дуучин С.Жавхлан  “Хамаг Монгол” төслийнхөө нээлтийг хийлээ. Монгол туургатан нэгдсэн энэхүү төсөлд ОХУ-ын Халимаг улсын дуучин Жангарч, Шаран Диймаа, ОХУ-ын Тува  улсын төв театрын гавьяат жүжигчин, дуучин, хөөмийч Саидаш Монгуш, ОХУ-ын Буриад улсын дуучин Чингис Раднаев, Өвөрмонголын “Хөх хээр” хамтлагийн дуучин М.Баясгалан зэрэг алдартай дуучид нэгджээ. Тэд энэ сарын эхээр дуучин С.Жавхлангийн урилгаар ирсэн аж.

Цагаан сарыг зөвхөн Монгол Улс тэмдэглэх бус Монголд туургатан даяараа тэмдэглэх учиртай юм байна. “Нэгэн цагт цацсан шагай мэт бутарсан ч цуглан нийлэх цаг үе ирсэн байна. Тиймээс энэ төсөл нь Хамаг Монгол туурагтнаараа галаа бадраах зорилготой юм” хэмээн дуучин  С.Жавхлан ярилаа. Энэ ёслолыг зохион байгуулснаар газар шороо эх орон минь улам хүрээгээ тэлэх учиртай аж. Төслийн гал тахих ажиллагаа ирэх сард болох бөгөөд энэ оны турш Халимаг, Тува, Буриад, Өвөрмонголоор тэд тойрон гал бадрах ёслол хийхээр зэхэж байна. Ингээд төслийн хаалтыг Монголдоо хийхээр төлөвлөжээ. Эрт цагт Монгол зан заншил ямар байсан тэр бүгдийг тэд хамтран сэргээхээр зорьж байгаа аж.