“Масктай Матар” цуврал: С.Билэгсайхан Та МИАТ-ийг АН-ынханд үнэгүй ашиглуулаад байна уу?

 “Масктай Матар” цуврал МИАТ-ийн Бодлого, маркетингийн газрын дарга, ерөнхий менежер С.Билэгсайханы талаар өгүүлэх гэж байна. Түүнийг албан тушаалаа ашиглан хууль бус үйлдлүүд хийгээд байгаа талаар анхаарал татсан мэдээллүүд гарах боллоо. “МИАТ  зургаан  сарын дотор бүх өрөө төлөөд  дансандаа 8,9 тэрбум төгрөгтэй  боллоо.  Мөнгө завших боломжийг хааж ирлээ” хэмээн хэлж ярьж буй түүнийг Бойнг 767 онгоцны зээлийн үлдэгдэл, НӨАТ-ын буцаалтын дүнг ашиг гэж буруу мэдээлж, төөрөгдүүлсэнд өмнөөс нь ичиж, уучлал хүсч байна хэмээн Бат инженер хэмээх эрхэм бичжээ. МИАТ компанид  1993 оноос эхлэн ажиллаж байгаа гэх тэрээр, С.Билэгсайхан даргын заавраар 5 сарын 7-ны өдөр  Бээжин-Улаанбаатарын ОМ224 нислэгээр 1 зорчигчийн нэр дээр  36 ш, 737 кг тээш бүхий АН-ын Их хурлын материал үнэгүй тээвэрлэгдсэн гэх мэдээллийг өгч байна. Мөн С.Билэгсайхан нь МИАТ-ийн Аэробус онгоцыг зарах эхний хэлэлцээг охин Мишээлийнхээ хамтаар Туркийн Истамбулд очиж хийсэн гэх мэдээллийг ч өгч байгаа юм. Тэрчлэн С.Билэгсайхан эрхэм  Аэробус зарах хэлэлцээ хийж байгаа талаас дараах мэйлийг хүлээж авсан аж.

Харин С.Билэгсайхан эрхмийн тухайд “Хийгээгүй хэрэгжүүлээгүй үйлдлийг хийсэн мэтээр гүжирдэж МИАТ төрийн өмчит компанийн болон миний нэр төрд халдаж буйг зохих газраар шалгуулна” хэмээн хэдхэн минутын өмнө мэдэгдээд байна. Ардчилсан холбоо эвсэл засаг барьж асан 1996-2000 онд УИХ-д сууж байсан тэрээр өнгөрсөн оныг хүртэл бизнест мөрөө гаргаж яваад намынхаа тэрдундаа МоАХ фракцийнхаа дэмжлэгээр МИАТ-д орж ирсэн гэдгийг тодотгоё. Түүнийг ажлаа аваад төдийлөн удаагүй байхад МИАТ төрийн өмчит хувьцаат компанийн хамт олны зүгээс Өргөх бичиг гаргаж байсан. Тэнд өгүүлснээр С.Билэгсайхан нь ямар ч чадваргүй хүмүүсийг ажилд оруулах, өөрийн танил талыг тендерт шахах хууль бус үйлдэл гаргасан гэж байв. Харин тэрээр энэ талаар байр сууриа илэрхийлэхдээ  “Миний талаар гүтгэсэн шинж чанартай зүйл гаргасныг харсан. Энэ талаар би зохих байгууллагад хандана.” гэж байсан.

Мөн түүнийг гуравдугаар сарын 25-нд “Берлин-Москва-Улаанбаатарын чиглэлийн нислэг саатчихаад байхад асуудлыг шийдэлцэх хариуцлагаа умартсан гэх мэдээллийг МИАТ-ийн ажилчдын зүгээс өгч байсан. Харин тэрээр өөрийгөө зөвтгөсөн бөгөөд тэр өдөр  “...Олон улсын шатрын холбооны ерөнхийлөгч К.Илюмжиновын хүсэлтийн дагуу 13.00 цагт компанийнхаа VIP өрөөнд уулзалт хийж саатсан тухайгаа  ярьсан байдаг. Нэг ёсондоо К.Илюмжиновтой хийсэн уулзалт нь  124 монгол зорчигчийн аюулгүй байдлаас илүүтэй чухалд тооцогдож байж гэх агуулгыг түүний тайлбараас ойлгохоор байгаа юм.

Ер нь бол  улстөрөөс хол цөөнгүй жилийг өнгөрөөсөн түүнийг Женко Х.Баттулгын татаасаар МИАТ-д ирсэн гэхэд хэлтийсэн болохгүй.Тэрчлэн МИАТ-ын Бодлого, маркетингийн газрын дарга, ерөнхий менежерийн албан тушаалд суунгуутаа бие хамгаалагчаа маркетингийн мэргэжилтнээр татаж авсан биш яг л нөгөө Х.Баттулга өөрийнхөө бие хамгаалагч явсан Батзаяа гэгчийг өөд дээш нь татсантай дөхөөтэй мэт. Мөн түүний улстөр дэх богинохон хугацааны замналыг харахаар одоогийн Ерөнхийлөгч Ц.Элбэгдоржийн эсрэг тэмцэж явсан нэгэн юм. Тэрээр АН-д  Н.Дашзэвэг нарын хамтаар  “Элсний 13” буюу “Хөдөөгийн фракци”-ийг байгуулж байсан үүх түүхтэй. Баабар эрхэм тэрхүү 13-ын тухай  “Одооноос яг 10 жилийн өмнө  Төрийн эрх барьж байсан Ардчилсан эвслийн дотор 13 эсэргүү гэнэт тодорсныг "элсний арван гурав" гэж нэрлэсэн нь ердөө л эл киноны нэрний тоо таарсантай л холбоотой. Тvvнээс тэдэнд ямар ч vзэл суртал, ядахнаа коммунист ч болохноо чиг баримжаа байгаагүй юм. Өөрснийгөө  тэд "элсний" гэж дуудуулах дургүй, "хөдөөний" гэж тодотгож байлаа. Үнэхээр ч хөдөө  суманд багш, эмч хийж байсан, улс төрийн ямар ч туршлага байхгүй, хотод ч цөөн ирж үзсэн арваад хүн гишүүнээр сонгогдон орж ирсэн нь улстөрчид гэхээсээ сайн дурынхан маягийн байлаа. Тэдэнд УИХ-аас бөөнд нь нэг дор байр олгосон нь нэг маягийн хамт олон үүсгэжээ. Бүгд тэр хэдийг дэмжинэ тусална, гол нь өхөөрдөнө...” гэхчлэн бичсэн байдаг.

Тэгвэл тэгж их өхөөрдүүлээд байсан нөхдүүд нь М.Энхсайхан болоод МАХН-ын 25 гишүүнтэй хүч хавсран  Ц.Элбэгдоржийн тэргүүлж асан Засгийн газрыг унагаж байсан түүхтэй.С.Билэгсайхан эрхэм тэдгээр нөхдийн дунд явсан юм. Харин одоо бол АН-д цаг эргэсний ачаар МИАТ гэгч саалийн үнээний хариуцлагатай сандал дээр сууж байна. Тэрээр ирсэн даруйдаа Гүйцэтгэх захирал Г.Жаргалсайханы но-той асуудлуудыг гаргаж ирж байгаа. Нэг талаас түүний энэхүү үйлдлийг магтмаар байвч, тэрээр шударга ёсны төлөө шударгаар тэмцэгч нэгэн биш гэдгийг анхаарал татсан мэдээллүүд нотлох янзтай байна.

“Масктай Матар” үргэлжилнэ.

Б.Итгэлт