Монголын анхны бизнесийн инкубатор болох мэдээллийн технологийн инкубатор нь өдгөө 10 нас хүрчээ. Өнгөрсөн хугацаанд нийт 19 удаа элсэлт зохион байгуулж, 250 орчим ААН, иргэнийг сонгон шалгаруулалтанд хамруулснаас 84 компанийн 750 гаруй ажилтанд инкубаторын үйлчилгээ үзүүлсэн байна. Эдгээр 84 компаниас 54 нь инкубаторыг амжилттай төгсч, дотоодын зах зээлд хөлөө олон ажиллаж байгаагаас програм хангамжийн салбарын түүчээ болсон Интерактив, ЕСМ, Старсофт, Юу Эс Ай компаниудаас өгсүүлээд зах зээлд бүтээгдэхүүнээрээ хэдийнээ танил болсон Оргилсофт, Май Тех, Болорсофт, Синглтон зэрэг олон залуу компанийг нэрлэж болно. Эдгээр компаниуд салбарын хөгжилд үнэтэй хувь нэмэр оруулан өсөн дэвшиж байгаа юм.
Мэдээллийн технологийн инкубатор 20 дахь буюу хамгийн отгон элсэлтээ 2013 оны 11 сарын 29-нд зохион байгуулж, 11 компани, 4 иргэнийг сонгон шалгаруулалтанд хамруулснаас Эс Ай Эс, Алкемист техноложис гэсэн 2 компанийг хүлээн авахаар болжээ. Энэ хоёр шинэ залуу компани болон инкубаторт элсэхийг хүсч байгаа олон олон залуус цаашид салбарын хөгжлийг гартаа авч, шинэ санааг бүтээгдэхүүн болгон хувиргаж инноваци хийхэд өөрсдийн хувь нэмрээ оруулах нь дамжиггүй ээ.
Нийт төгсөгч компаниуддаа Мэдээллийн технологийн инкубаторын үйлчилгээний 10 жилийн ойн мэнд хүргэе.
Сэтгэгдэл ( 0 )