”Танайд хоноё” Ц.Жадамбынд айлчиллаа

Мэдээллийн технологи, шуудан, харилцаа холбооны газрын дарга Ц.Жадамба олны хараанд нэг их өртөөд байдаггүй. Түүний хувьд залуу хүн гэхэд чамлахааргүй амжилттай яваа. Ихэвчлэн цагаан цамц, гоёмсог костюмаар гангардаг, хаа нэг телевизээр гарвал зөвхөн ажил ярьдаг Ц.Жадамбынд “Танайд хоноё” нэвтрүүлгийнхэн саатжээ. Өнгөрсөн долоо хоногийн амралтын өдрүүдэд гарсан тус нэвтрүүлгийг үзсэн олон хүний хувьд  залуу хүний хийх бүтээх  хүсэл тэмүүлэл, аз жаргалтай гэр бүл гэж юу байдгийг мэдэрсэн биз ээ.

Дарга л нэр зүүсэн бол үнэтэй хаус, хар жийп хөлөглөн тэнгэрийн мэт амьдардаг гэсэн ойлголтыг бага ч болов өөрчилж чадсан Жадамбынх энгийн л нэг айл. Багахан метр квадраттай ч гурван өрөө байрандаа шаг хийсэн амьдралтай төрийн албан хаагч гэр бүл аж. Хоёр охиноо  өглөө нэг, нэгээр нь цэцэрлэг сургуульд нь хүргэж өгөөд орой тараад л гэртэй уулздаг эднийд агентлагийн дарга гээд илүү эд хөрөнгө алга байсан нь хүмүүсийн энгийн амьдралтай хэмээн бодоход хүргэсэн биз.

Цагаан-Өвгөний хайртай ач тэрбээр өвөөгийнхөө гар дээр өсөж торнисон болохоор Цагаан-Өвгөнөөр овоглосон гэдэг. Настай хүний үг сонсож эрийн цээнд хүрсэн монгол хүн учир морь сонирхож, хөөргөнд хоббитдог оо ч нуугаагүй.

Ямартай ч бүх л агентлаг, албадын дарга нар хийж бүтээх хүслээр дүүрэн, шунал омоггүй байвал төр засгийн үйл ажил урагштай байх юм шиг санагдсанаа хэлэх нь зөв биз ээ.