Дээд тэнгэрт улсынхаа эдийн засгийг даатгасан ”Фортуна” Н.Батбаяр сайдын 15 коммент

Ам долларын ханш 1800 хол даваад, хөрөнгө оруулалт зогсонги байдалд орсон, улсын эдийн засаг яах аргагүй хямарчихаад байгаа. Энэ үед хүн бүхэн “Фортуна” Н.Батбаяр сайдыг эдийн засаг хямраасан гэж буруутган огцруулах хуулийн төсөл хүртэл өргөн барьсан юм. Шүүмжлэлийн хариуд сайн сайхныг бодож, зөв сайхан зүйл ярь эдийн засаг хямраагүй гэж зөвлөдөг эрхэм сайдыг энэ удаагийнхаа комментэд онцоллоо. Өнөө маргаашгүй огцрох эсэнх нь шийдэгдэх гэж буй“Фортун” Н.Батбаяр сайдын 15 комментыг хүргэж байна.

 1.Эдийн засагч, статистикч мэргэжилтэй. Эдийн засгийн ухааны магистр цолтой ч улсынхаа эдийн засгийг уруудуулагч Н.Батбаяр.

2."Комплекс импорт" хангамжийн нэгдэлд мэргэжилтэн, хэлтсийн дарга, орлогч дарга, Ардын Их Хурлын депутат, орлогч дарга, "Монгол түлхүүр" ХХК-ийн захирал, "Фортуна" группийн ерөнхийлөгчөөр ажиллаж байгаа. “Дээшлэн дэвшигч” Н.Батбаяр.

3.Засгийн газрын Хэрэг эрхлэх газрын дарга, Монгол Улсын Их Хурлын гишүүн, Монгол Улсын Засгийн газрын гишүүн, Барилга, хот байгуулалтын сайдын алба хашиж байгаад одоогоор Эдийн засгийн хөгжлийн сайдаар томилогдон ажиллаж байгаа “Улстөрч” Н.Батбаяр.

4.Хэтэрхий сайхныг мөрөөдөн, тоон дээр тоглолт хийж буруу ярьдаг. “Худалч” Н.Батбаяр.

5.Бараа бүтээгдэхүүний үнэ хоёр дахин буурсан гэж бүлт үсэрсэн. Гэвч өргөн хэрэглээний бараа бүтээгдэхүүний үнэ өссөн гэдгийг статистикаар гаргаад ирсэн байдаг. “Бүлтрэгч” Н.Батбаяр.

6. “Мөнгөний хомсдолд орсон шалтгаан нь төв банкнаас явуулсан бодлогын алдаа, мөн гадаад валютын хүрэлцээгүй байдлаас үүссэн. Гэж үздэг “ямарч буруугүй” Н.Батбаяр.

7. “Чингис” бонд гаргаж, хөрөнгө босгосон. Бонд босгосноороо мөнгөний хомсдолын гол шалтгаан болсон валютын хомсдолыг арилгаж чадсан” гэж тайлбарладаг. Өөдрөг Н.Батбаяр.

8.2013 онд 400 сая ам.доллараас хэтрэхгүй хэмжээний хөрөнгө оруулалтыг төмөр замд өгнө. Бид аль болох гадаад дотоодын хөрөнгө оруулагчдыг татах замаар бондын оролцох хөрөнгийг бага байлгахад анхаарч байгаа гэсэн. Сайн сайд Н.Батбаяр.

9.Үргэлж сайн юм бодож сайхан зүйл ярьж явахад бүх зүйл бүтнэ гэж боддог. Сайн сайхныг мөрөөдөгч "Сайхан" Н.Батбаяр.

10. Хотын дарга Э.Бат-Үүлтэй нийслэлийн асуудлаар муудалцаж, хэрэлдэж зодолдох дээрээ тулаад шуугиан тарьсан. Хэрүүлч Н.Батбаяр

11. Хундага тавилгүй сархад хүртэж, хуралдаа ирэхгүй байгаагаа “Дээд тэнгэрийн зарлиг” гэдэг тэнгэртэй харьцагч Н.Батбаяр.

12. Хэвлэлийн эрх чөлөөг хааж, боомилохоор хэсэг гишүүд ам уралдан ярихад сэтгүүлчдийг ганцаараа өмөөрсөн. Хэвлэлийн эрх чөлөөний тухай ярьж, өөрийг нь баахан  муулсан сэтгүүлчдийн зөв гэж үздэг. Эр хүн Н.Батбаяр.

 13. Ардчилсан намын “МҮДН фракцийн” гишүүн  “Фортуна” Н.Батбаяр.

 14.   Сайдын суудлаас хөөгдөх дээрээ тулсан. Дээсэн дөрөөтэй байгаа Н.Батбаяр.

15. Гал тахиж, тэнгэртэй ярьж, улсынхаа эдийн засгийг дээд тэнгэрт даатгасан. “Том бөө” Н.Батбаяр.

Н.Эрхэс