ДАШТ-ээр далимдуулан масс мессежээр монголчуудыг луйварджээ

Дэлхийн долоон тэрбум хүн хөлбөмбөгт анхаарлаа хандуулсан сар болж өнгөрлөө. Манайхан ч юугаараа дутхав хэдэн телевизийнхээ сувгийг эргүүлж нойроо хасан байж цэнхэр гаригийн иргэдтэй энэ зэрэгцэн мэдээлэл авч халуухан тоглолтуудыг шөнө манан хоносон. Яг энэ үеэр Юнителийн хэрэглэгчдийн шуналыг хөдөлгөсөн мессеж ирсэн нь олон хүний анхаарлыг татаж хариу бичихэд хүргэсэн юм.

Тодруулбал 2014 оны долдугаар сарын 5-ны өдрийн 19:40:57- д 158815 тусгай дугаараас “ (550₮) FIFA World Cup 2014 Дэлхийн аварга шалгаруулах тэмцээний Аваргын төлөө тоглох хоёр улсыг нэрлэж 1000$-ын эзэн болоорой. Та саналаа 158815 дугаарт илгээнэ үү” гэсэн бичил захидал ирсэн юм. Медалийн төлөө тоглох багууд тодрох дөхөж байсан тэр үед хоёр улсыг нэрлээд арай 1836950 төгрөгтэй болчих юм биш байгаадаа гэсэн горьдлого тээсэн хүмүүс ганц надаар тогтоогүй гэдгийг хэд хоногийн дараанаас найз нөхөд маань ярьж эхэлсэн юм. Зарим нэг нь Герман, Аргетина хоёр л тунаж таараа хэмээн зөв тааснаа сайрхаж байсан.

Харамсалтай нь Дэлхийн аварга дуусаад гурав хоносон ч өнөө мянган долларын сураг хол тасрав. Энэ талаар тодруулж өгөхийг олон уншигч маань хүсэлт илгээсний дагуу тус компанийн 1414 дугаарт залгаж оперотороос лавлахад "Энэ асуудлаар манайтай олон хүмүүс холбогдож байгаа. Уг масс мессежийг “Энгүүн” ХХК-ны зүгээс явуулсан нь тогтоогдоод байгаа. Одоогоор хуулийн байгууллагад шалгуулах хүсэлт тавиад байна. Үүнээс өөр мэдээлэл өгөх боломжгүй байна" гэсэн юм. Харин “Юнител” грүппийн 77778080 дугаарт залгаж ресэпшентэй холбогдоход 891110...., 891106... дугаартай Масс мессеж хариуцсан нягтлангуудын дугаарыг өгсөн юм. Харамсалтай нь дээрх хүмүүс ийм мессеж манай хэрэглэгчидэд очсон тухай сонссон гэхээс өөр юм хэлээгүй бөгөөд 891138... дугаартай н.Хэрлэн гэх мэргэжилтэнтэй холбогдохыг зөвлөв. Тэрбээр энэ талаар “Бидний зүгээс ямар нэг байдлаар хэрэглэгчдийнхээ дугаарыг хэн нэгэнд өгсөн, цаашлаад дээрх мессеж илгээсэн үйлдэлд оролцсон зүйл байхгүй ээ. Учир нь интернет сүлжээ ашиглаад ийм байдлаар нийтэд мессеж илгээх явдал байдаг. Үүнийг бид хянах боломжгүй. Тиймээс харуцлага хүлээхгүй гэсэн үг. Харилцаа Холбооны зохицуулах хорооноос “Монгол Контент” ХХК-нд дээрх эрхийг өгдөг байгаа. Тиймээс тус компани таны асуултанд хариулт өгнө” гэсэн юм.

Ингээд бид Монгол Контент кампанийн 70110013 дугаарт холбогдож энэ талаар лавлав. Харамсалтай нь мөн л  “Одоогоор энэ талаар хариулт өгөх хүн нь амралтаа аваад явсан байгаа. Мөн яг энэ асуудлыг эрхэлдэг хүн нь ажил дээрээ  байхгүй байгаа тул үдээс хойш холбогдоорой гэсэн хариултыг өглөө. Ямартай ч бид хулхидуулсан нь тодорхой боллоо. Хэдийгээр 550 төгрөг талх авч хүрэхгүй мөнгө ч гэлээ нийт гар утас хэрэглэгчдийн гуравны нэг нь бүртгэлтэй байдаг "Юнител" компанийн хэрэглэгчдийн цөөнгүйд очсон гээд бодохоор чамгүй мөнгө гарах нь тодорхой юм. Бид иргээд энэ талаар нэхэн сурвалжилах болно.