Монопол ”Монос”-ын Л.Эрдэнчимэг юу бодож, хаана явна

Нойрсуулах, тайвшируулах, шарлалт арилгах үйлчилгээтэй “Фенобарбитал” гэх эмийг ууж хордсон 16 хүүхдийн бие сайжраагүй байна. 16 хүүхдийн хоёрынх нь бие тааруу байгаа талаар албаныхан өчигдөр мэдээлэл хийсэн. Харин буруу жороор эм олгосон эм зүйч нарт эрүүгийн хэрэг үүсгэн шалгаж байгаа. Мөн Мэргэжлийн хяналтын ерөнхий газрын даргын шийдвэрээр өчигдрөөс  эхлэн тус эмийг зах зээлээс эргүүлэн татах шийдвэрийг гаргажээ. Албаны хүмүүсийн өгч байгаа мэдээлэлээр энэ эм нь Монгол Улсын эмийн бүртгэлд ороогүй байжээ. Эмийн бүртгэлд ороогүй эм худалдсан, мөн буруу жороор олгосон гэсэн асуудалд ороод байгаа “Монос”-д хариуцлага тооцох уу.

Монголын эм, эрүүл мэндийн импорт, экспорт худалдааны салбарт  50-иас илүү хувийг дангаараа эзэлдэг томоохон аж ахуй нэгж бяцхан үрсийн эрүүл мэндэд хариуцлагагүй хандлаа. “Монос” группыг үүсгэн байгуулсан Л.Эрдэнчимэг гишүүн бяцхан үрст биш, тамхины хяналтын тухай хууль өргөн барьж хэсэгтээ анхаарлаа хандуулсан. Гэтэл Л.Эрдэнчимэг гишүүнийг хэрэггүй зүйлд цаг заваа үрж явахад хүний эрүүл мэнд, амь настай холбоотой үйл ажиллагааг 20 гаруй жилийн турш эрхэлж байгаа тус байгууллагын түүхэд тод хар толбо үлдэж болзошгүй байна. Бид тус эмийг худалдаалах эрх бүхий Баянгол дүүрэгт байрлах “Монос” эмийн сан дээр очиход лацадсан буюу мэргэжлийн байгууллага үйл ажиллагааг нь хаасан байна.

16 хүүхдийг хордуулаад байгаа эмийн талаар Эрүүл мэндийн дэд сайд Ж.Амарсанаа хэлэхдээ “Энэ удаа гурван том алдаа гарлаа. Нэгдүгээрт, эм найруулагч нь туршлагагүйтсэн. Тэгээд алдаа гаргасан. Энэ том алдаа. Хамгийн том алдаа нь магадгүй энэ байх. Хоёрдугаар алдаа нь Монгол Улсад бүртгэгдээгүй фенобарбиталын төрлийн эмийг үйлдвэрлээд, эмийн санд зарсан үйлдвэрлэгчийн буруу. Дараа нь тэр бүртгэгдээгүй эмийг нь аваад зарсан эмийн сан буруутай” гэсэн тайлбарыг шууд ярилцлаганы үеэр хэлсэн юм.

Өнгөрсөн жил сургуулиа төгссөн эм зүйч нар алдаа гаргасан нь яамны алдаа биш харин хайнга байдлыг больё гэсэн асуудлыг ярьж байгаа юм. Гэтэл улсад бүртгэлгүй эм худалдаалж байхад хяналт тавьж байх ёстой МХЕГ хаана ямар ажиллаж хийж явна гэдэг нь тодорхойгүй байна. Бас л манай буруу байхгүй, маш их ачаалалтай ажилладаг. Тэр бүрчлэн очиж хяналт шалгалт хийж чадахгүй байна гэсэн хариултыг өгч байгаа юм. Хяналт шалгалт хийх ёстой МХЕГ, хариуцлага тооцох ёстой ЭМЯ иймэрхүү зүйл ярьж байна. Харин энэ асуудалд хэн хариуцлага хүлээх вэ гэдэг нь тун хачирхалтай. УИХ-ын гишүүн гэдэг албан тушаал бизнес хатагтайд зүгээр нэг гуншин аята,  сонин биш байгаа бололтой. Гадны улс оронд төрийн түшээгийн хувийн бизнес ард түмнийх нь 16 хүүхдийн аминд заналхийлсэн бол албан ёсоор уучлалт гуйхаас эхлээд албан тушаалаасаа огцордог байх юм. Харин манай "бенз" хатагтай хаана амарч, юу бодож яваа бол.