Ц.Мөнхтөр: Ерөнхий сайдын томилгоо хууль зөрчөөгүй

Ерөнхий сайдын зөвлөх, хэвлэлийн төлөөлөгч Ц.Мөнхтөр мэдээлэл хийлээ. Ерөнхий сайд Ч.Сайханбилэг ажлаа хүлээн авснаас хойш долоо дахь өдөр дээрээ буюу өчигдөр орой Цагдаагийн ерөнхий газар, Тагнуулын ерөнхий газар, Авлигатай тэмцэх газар болон Татварын ерөнхий газрын даргыг солисон билээ. Энэ талаар Ерөнхий сайдын хэвлэлийн төлөөлөгч Ц.Мөнхтөрөөс тодрууллаа.

 - Өчигдөр орой хэд хэдэн агентлагын даргыг үүрэгт ажлаас нь чөлөөлж томилгоо хийлээ. Энэ нь хууль зөрчсөн гэх мэдээлэл гараад байна. Томилгоо хууль зөрчсөн үү?

- Засгийн газрын үйл ажиллагаа тасралтгүй явдаг. Тиймээс томилгооны асуудал хууль зүйн хувьд нээлттэй байгаа. Энэ асуудалд заавал дараагийн танхимыг хүлээх шаардлагагүй. Авлигатай тэмцэх газрын дэд даргыг Тагнуулын ерөнхий газрын даргаар томилоход өөртэй нь санал солилцсон. Тэгэхээр өөрөө тэр ажлаас татгалзах үндэслэл нь өргөдөл бичсэнээс эхэлнэ гэж хуульд заасан байгаа. Тэгэхээр эдгээр томилгоонд хууль зөрчсөн ямар нэгэн асуудал байхгүй.

- Агентлагийн дарга нар ажлаа хэзээ хүлээж авах вэ?

- Өнөөдөр ажлаа хүлээн авсан.  

- Ерөнхий сайд үүрэгт ажлаа авснаас хойш өөр ямар ажил хийгээд байна вэ?

- Ерөнхий сайд Засгийн газраа бүрдүүлэхээр парламентед суудалтай улс төрийн намуудад хүсэлтээ хүргүүлээд, гэрээ хэлэлцээр хийгээд явж байгаа. Үүний зэрэгцээ өнгөрсөн мягмар гаригт Монголбанкны бүрэлдэхүүнтэй уулзаж, мөнгөний бодлого, валютын ханш, мөнгөний нийлүүлэлтийн талаар санал солилцсон. Мөн Сангийн яамныхантай уулзаж, төсөв болон бусад асуудлаар ярилцсан. Ерөнхий сайд чуулган дээр хувийн хэвшлийхнийг дэмжиж байж эдийн засаг сайжирна гэж хэлж байсан. Тиймээс хувийн хэвшлийхнийг хэрхэн дэмжих вэ, ямар бэрхшээл байна гэдгийг чухалчилж үзэж байна. Өнөөдөр Худалдаа аж үйлдвэрийн танхим, Ажил олгогч эздийн холбооны төлөөллүүдтэй уулзана. Маргааш Олон улсын валютын сан, Дэлхийн банкны төлөөллүүдтэй уулзаж Монгол орны эдийн засгийн асуудлаар санал  солилцоно. Бидний шийдэх асуудал эдийн засаг учраас яаралтай эрүүлжүүлэхийн тулд холбогдох бүх байгууллагуудын хүмүүстэй уулзаж байгаа юм.

- Засгийн газрын бүтэц ямар байх бол. Сайдуудаа гаднаас томилох уу?

-Хамгийн эхний асуудал бол ямар намуудтай хамтрах вэ гэдгээ шийдээд дараа нь бүтэц бүрэлдэхүүний асуудлыг шийднэ гэсэн төлөвлөгөөтэй байгаа. Ерөнхийлөгч сайдуудыг гаднаас томилох нь зүйтэй гэсэн байр суурьтай байгаа гэдгийг олон нийт мэдэж байгаа. Гэсэн хэдий ч давхар дээлтэй байх нь нээлттэй. УИХ-ын гишүүн Засгийн газрын гишүүн байхыг хуулиар хориглоогүй байгаа.

Л.Од