Коммент: Содон кадр У.Хүрэлсүхийн олон өнгө

Улс төрийг сонирхолтой болгодог цөөн эрхэм бий. Тэдний нэг нь МАН-ын Ерөнхий нарийн бичгийн дарга асан У.Хүрэлсүх. Дургүйг нь хүргэсэн хэний ч хамрыг хаана ч нээхэд бэлэн тэр дундаж кадр биш. Магадгүй МАН-ын үе үеийн генсекүүд дотроос хамгийн тод зан төрхтэй нь ч байж мэднэ. Амбийц ихтэй атлаа огцом шийдвэр гаргадаг түүнд Шадар сайдаар ажиллах санал ирж байсан удаатай. Тухайн үед Ерөнхийлөгч эсэргүүцэж байсан нь үнэн ч тэр зүгээр л татгалзаж чадсан. Үүгээрээ У.Хүрэлсүх ганган харагдсан. Бас МАН-ыг гоё харагдуулсан. Мөн УИХ-ын гишүүнийхээ бүрэн эрхээс татгалзсан тоотой улс төрчдийн нэг. Харин өнгөрөгч сард урлагийн тайзнаас их улс төрдөө эргэн ирж буйгаа зарласан. Одоо тэрбээр Ч.Сайханбилэгийн Засгийн газарт Шадар сайдын албанд очих нь тодорхой боллоо. Харин тэмцэгч чанар ихтэй У.Хүрэлсүхийн улс төрд эргэн ирж буй үйлдлийг хэвлэлүүд хэрхэн харсаныг “Коммент” булан хүргэж байна. 

• МАН-ын хүчтэй нэгэн лидер улстөрд эргэн ирж байгаагаа зарлаж эхлэв.

                                                                                             News.mn 2014.05.17 

• Ядарсан үед нь эхнэрээсээ нүүр бууруулаагүй эр хүний зангарага заасан.

    Shuud.mn 2014.06.12

• МАН-ын одоогийн Ерөнхий нарийн бичгийн дарга Ж.Мөнхбатыг гараас нь хөтлөн явж өнөөдрийн өндөрлөгт хүргэсэн хүн нь өөр хэн ч биш гагцхүү У.Хүрэлсүх тул МАН-ын удирдлагыг гартаа атгахад түүнд ямар нэгэн саад бэрхшээл байхгүйтэй адил билээ.

Өглөөний сонин 2014.06.18

• УИХ-ын гишүүн, МАН-ын Ерөнхий нарийн бичгийн дарга асан У.Хүрэлсүх улс төрдөө биш урлагт эргэн ирлээ гэсэн мессеж анхаарал татаж байна. Энэ мессежэнд гэнэн хүмүүс л итгэж байна даа.

24tsag.mn  2014.11.03    

• У.Хүрэлсүхийг олон залуус хүрээлэн хэдийд, хэзээ ямар арга хэлбэрээр гарч ирэхээ ярилцах болжээ.

24tsag.mn 2014.11.03    

• У.Хүрэлсүх өөрийн имижээ өөрчилж урлагаар дамжуулан намын нөхөд, гишүүд, дэмжигчдэдээ улстөр дэх орон зайгаа эзлэхээр ирснээ  илэрхийлэв.

Grandnews.mn 2014.11.04 

•  У.Хүрэлсүхийн орон зай эрх баригч, МАН-ын мөнхийн өрсөлдөгч АН-д хүртэл дутагдаж байна.

Garag.mn 2014.11.04

• 2016 оны сонгуульд МАН У.Хүрэлсүхээр “толгойлуулбал” залуусаараа хүч түрүүлбэл, ялалтын уухай цуурайтаж мэднэ.

Garag.mn 2014.11.04

• У.Хүрэлсүхгүй Монголын улс төр сонирхолгүй байдаг нь үнэн. Тэр эргэн ирж байна. 

Grandnews.mn 2014.11.04

• Урлагийн тайзан дээрээс улс төрөөс урваагүй гэдгээ зарласан түүний дотор ямар том амбиц нуугдаж байгааг таамаглахад ядах юмгүй мэт. 

News.mn 2014.11.04

• МАН-ын 27 дахь их хурлаар хотын фракцынханд эрх мэдлээ алдсан С.Баяр, У.Хүрэлсүх нар улстөрд эргэн ирснээ ийнхүү зарлаж байгаа  нь 2016 оны сонгууль их л сонирхолтойгоор зурагдаж байна.

Ikon.mn 2014.11.04

• Цав цагаан хүрэм, тас хар нүдний шил зүүж имижээ өөрчилсөн түүний дотор  ямархуу нүүдэл байгааг  улс төрийн хүрээнийхэн, тэр тусмаа намын нөхөд нь олж харахыг хичээж байна. 

News.mn 2014.11.04 

• Гадаадад төгссөн залуус хэн юм бэ? гэдэг байсан У.Хүрэлсүх гадаадад төгссөн залуусыг ч урьж уулзан хүчээ зузаатгаж байна.

Medee.mn 2014.11.05    

•    Тэр хүмүүсийн андуураад байгаа шиг урлагт биш улс төрдөө ирлээ. Гэхдээ урлаг ойлгодог, өвчин зовлонг даван туулсан, найз нөхөддөө үнэнч, өрөвч нинжин нэгний дүрээр улс төрийн тайзан дээр гарлаа.

Ардчилал сонин 2014.11.07  

• Одоо эргээд харахад У.Хүрэлсүх хариуцлагаа хүлээж албан тушаалаа өгье ч гэж өгөөгүй мэт харагддаг.

Зууны мэдээ сонин 2014.11.07

• Хэд хэдэн сонгуулийн хүнд үед бараагаа ч харуулалгүй алга болсон түүний хувьд эргээд улс төрд орж, намын нөхдийнхөө өмнө том дуугарна гэдэг туйлын халуун бөгөөд хүнд гэдэг нь ойлгомжтой. 

Зууны мэдээ сонин 2014.11.07

• Намын нөхөд нь ажил ч үгүй, мөнгө ч үгүй лааз өшиглөж АТГ-т дуудагдан баргар царайлж байсан хүндхэн үед мань эр гадаад руу одож, түрийвч нимгэнтэй хүн тэр бүр очоод байдаггүй Австралийн эрэгт тухалснаар сураг тасарсан.

Gogo.mn  2014.11.07

• Улс төр дэх алдагдсан нөлөөгөө эргэн олохын тулд концерт хүртэл тоглож, захиалгат пиараа хийлгүүлээд эхэлсэн байна.

Uls.mn 2014.11.07

• Тэр улс төрдөө эргэн ирж байна. У.Хүрэлсүх байна шүү гэж намынхандаа санууллаа.

Zindaa.mn 2014.11.07 

•  Эдийн засгийн шинжээчдийн “Элгээрээ хэвтчихсэн” гэсэн оноштой улс орныг сэргээн засах ажиллагаанд Ч.Сайханбилэг, У.Хүрэлсүх нар та биднийг түүчээлэн орохоор болж байна.

Wikimon.mn 2014.12.05

• АН-аас Ч.Сайханбилэгийг Ерөнхий сайдад дэвшүүлэнгүүт МАН-аас У.Хүрэлсүхээ дэмжээд эхлэв. Өөрөөр хэлбэл бэрс бэрсээ түлхэв гэдэг шиг.

Wikimon.mn 2014.12.05

• Шадар сайдын албанд С.Бямбацогт биш У.Хүрэлсүх нь дээр.  

Hunnu.mn 2014.12.05

А.Алтаа