МАН-ын дарга нар хүүхдүүдээ дэд сайдын марофонд сойж байна

Н.Алтанхуягийн Засгийн газар огцорч, дараагийн Ерөнхий сайд, яамдын сайдыг томилох гэж сар гаруй хугацаанд  тохиролцож байж сая нэг юм Засгийн газрыг "элэг бүтэн" болгов. Эх орон, ард түмнээ бодож бүх нам хамтарч байгаа гэх боловч хоёр долоо хоногийн турш өдөр бүр сайдын суудлын тохиролцоо хийсээр арай гэж дууссан.

Харин одоо дэд сайдуудын томилгоо буюу дараагийн "бялуу"-ны хуваарилалт явагдаж эхэллээ. Засгийн газарт хамтарсан намууд суудлынхаа тоогоор дэд сайдын квот авсан. АН дөрөв, МАН долоо, "Шударга ёс эвсэл" гурав, ИЗЗН нэг дэд сайдын суудал "хүртжээ." Дараагийн "бялуу" хуваарилах ажил намууд дунд мөн л үл ойлголцол, маргаан үүсгээд байгаа аж.

МАН л гэхэд Удирдах зөвлөлийн өргөтгөсөн хуралдаанаа хийж долоон дэд сайдынхаа нэрийг ярилцаж, шөнийн 02.00 цаг болтол маргалдсан сурагтай. Тус намын "Ахмадын золбоо"-гийхон өөрсдийн хүнээ дэд сайд болгох гэж улайрч байна гэх "бор шувуу" нисч байна. Тухайлбал, МАН-ын дарга асан, УИХ-ын гишүүн Ө.Энхтүвшин хүү Золбоогоо, /Хууль зүйн сайд/ асан Ц.Нямдорж хүү Анхбаярыгаа, "Эрдэнэт үйлдвэр"-ын захирал асан Ч.Ганзориг хүү Г.Тэмүүлэнгээ дэд сайдад зүтгүүлж байгаа аж. Мөн МАН-ын намын байгуулалт хариуцсан Нарийн бичгийн дарга Х.Булгантуяа, Үндэсний цэцэрлэгт хүрээлэнгийн захирал Б.Саранчимэг, БСШУ-ны дэд сайдаар ажиллаж байсан, "Бишрэлт" группийн Ерөнхийлөгч Б.Ундармаа, Эрдэс баялаг, эрчим хүчний дэд сайдаар ажиллаж байсан Ц.Гарамжав, Хөрөнгийн биржийн захирал асан, Элчин сайд Хангайн хүү Х.Алтай, Сү.Батболдын туслах асан Нийслэлийн МАН-ын дарга Ц.Сундай нарын нэр яригдсан байна.

УИХ-ын гишүүн Ц.Нямдорж, Ө.Энхтүвшин, "Эрдэнэт үйлдвэр"-ийн захирал асан Ч.Ганзориг нар хүүхдүүдээ дэд сайд болгох гэж улайрч байгаа нь анхны тохиолдол биш. Албан тушаалын томилгоо хийх болохоор л мөнгөтэй хүмүүс, дарга нар хамаатан садан, үр хүүхэд, өөрийнхөө хүнийг чихэх гэж улайрдаг нь үеийн үед байсаар ирсэн асуудал. Энэ мэтчилэн эрх мэдэлтэй хүмүүс хүүхдүүдээ өндөр албан тушаалд чихдэг асуудал тасрахгүй нь бололтой.

2012 оны сонгуулиас хойш нэр хүнд нь өсч байсан МАН хэлсэн ярьснаа умартан, албан тушаал эрх мэдлийн төлөө сөрөг хүчний байр сууриа орхин АН-ын "өвөр рүү" гүйн орж, хүндээ хөнгөнөөс өгсөн. Хэдий АН биднийг гуйсан, эх орноо бодож засагт орж байгаа гэх боловч сайдын сэнтийн төлөө нам дотроо тэмцэлдэж байгаа нь ямар ч нам, улстөрчдөд албан тушаал чухал гэдгийг харуулж байгаа юм. Ядаж л хүүхдүүдээ дэд сайд болгочих "том" зорилго байна шүү дээ, тэдэнд.

АН-ын хувьд Ерөнхийлөгч, Ерөнхий сайд, "Шонхор" фракц, "Нэг ардчилал" тус бүр нэг хүнээ дэд сайдад томилох сурагтай. Цөмийн энергийн газар татан буугдсантай холбоотойгоор даргаар нь ажиллаж байсан Н.Тэгшбаярт дэд сайдын суудал хүртээж байгаа аж. Мөн Хөдөлмөрийн яамны Жижиг дунд үйлдвэрийн газрын дарга Б.Баттүвшин, Ерөнхий сайд асан Н.Алтанхуягийн зөвлөх М.Хүдэрбаатар нарын нэр яригдаж байгаа.

Харин "Шударга ёс эвсэл", ИЗНН-ын дэд сайдын нэр хараахан тодроогүй байна. Ийнхүү дэд сайдуудын марафон тун эрчтэй өрнөж байна.

Л.Одончимэг