2014 онд 66 сэтгүүлч амиа алдаж, 119 сэтгүүлчийг хулгайлжээ

Өнгөрч байгаа 2014 онд дэлхий дахинаа ажлаа хийж явсан 66 сэтгүүлч амиа алдаж, 119 сэтгүүлч хулгайлагдсан хэмээн олон улсын эрх хамгаалах “Хил хязгааргүй сэтгүүлчид”  байгууллагын илтгэлд дурджээ.

Илтгэлд бичсэнээр бол хэвлэл мэдээллийн салбарынханд хамгийн аюултай ороноор Сири тодорсон байна. Тэнд 15 сэтгүүлч амиа алдсан бол бас 7 сурвалжлагч Ойрхи дорнодын зөрчил мөргөлдөөнийг сурвалжилж яваад амиа алджээ. Украинд гэхэд л зургаан сэтгүүлч зэвсэгт мөргөлдөөний золиос болж амь алдсан бол Ирак Ливид дөрвөн сурвалжлагч ажил үүргээ гүйцэтгэж яваад амь нас нь хохирсон байна.

Гэхдээ өнгөрсөн онд амиа алдсан сэтгүүлч, сурвалжлагчийн тоо өмнөх 2013 онд 71 байсныг бодвол буурсан тоо гарч байгаа юм.

Харин сэтгүүлч сурвалжлагчдыг хулгайлах явдал огцом өсч байгааг илтгэлд тэмдэглэсэн байна. Өнгөрч байгаа 2014 онд нийт 119 сурвалжлагч, сэтгүүлчийг хулгайлсны 33-ыг нь гэхэд  манай гаригийн халуун цэгийн нэг болсон Украинд хулгайлжээ. Тэгвэл Ливид 29, Сирид 27, Иракт 20 сэтгүүлчийг ажлаа хийж явсны нь төлөө хулгайлсан байна.

Энэ бүхний зэрэгцээ 2014 онд дэлхий даяар мэргэжлийн ажлаа хийж гүйцэтгэсний төлөө 178 сэтгүүлч, сурвалжлагч шоронд орсон гэж тус илтгэлд бичжээ.

Б.Ариунцэцэг