Ч.Сайханбилэгийн оноо алдах эхлэл нь дэд сайдуудын ихэрлүүлсэн томилгоо байв

Дэд сайд гэж хотонд босгосон мануухай шиг эрх мэдэл, эрхлэх тодорхой үүрэггүй нэг албан тушаал олны хараалыг мөн ч идэж байна. Ерөөсөө ийм албан тушаалыг хуульчилж үгүй болгоё гэсэн санал ч яваад байгаа. Дэд сайд бол төрийн албан хаагч биш, улс төрийн албан тушаалтан. Нэг үгээр хэлбэл намуудын бялуу хүртээх нэг арга боломж, хэн нэгэнд зориулсан албан тушаал. Заавал байлгах гэж улайраад байдгийн учир шалтгаан энэ.  МАН сөрөг хүчин байх үедээ дэд сайдуудын талаар шүүмжлэлтэй ханддаг байснаа хамтраад ирэхээрээ харин 180 градус эргэчихсэн, тоо толгойг нь нэмэгдүүлэхэд  идэвхийлэн оролцсон билээ.

Мордохын хазгай гэдэг шиг Ч.Сайханбилэгийн олон түмэнд оноо алдах эхлэл нь энэ дэд сайдуудын ихэрлүүлсэн томилгоо болсон бөгөөд энэ салхинд МАН-ын нийгэм дэх үнэлэмж ч чамгүй ганхаж гунхсан юм.

Тэгээд шийдлийн Засгийн газрынхны маани мэгзэм болчихоод байгаа таналт хасалт  дэд сайд мэтийн дэмий орон тоо руу бус, жирийн албан хаагч, жирийн иргэд рүү эхэлж чиглэсэн нь ихээхэн бухимдал үүсгээд байгаа. Ерөнхийдөө бол дээдэст ээлтэй, доодост халтай ийм л Засгийн газар байгуулагдчихаад байна.  УИХ-ын гишүүн Г.Уянга энэ байдлыг нэгэнтээ “Жирийн иргэд бүсээ чангалсаар байгаад одоо голоо таслах нь. Харин эрх мэдэлтнүүд  идэж уусаар байгаад тэлээгээ таслах нь” гэж ёжилсон нь өнөөгийн үнэн дүр төрх. 

Иргэдийн зүгээс эдийн засгийн хямралтай үед төр хамгийн түрүүнд цомхон чадварлаг байх ёстой хэмээн харж байгаа.  Нүдэнд орсон өргөс мэт адлагдаж, нийгэмд үнэлэмж хүндлэлгүй болсон дэд сайдын орон тоог цомхотгох талаар УИХ-ын гишүүн С.Ганбаатар, Л.Эрдэнэчимэг нарын дөрвөн гишүүний гаргасан санал өчигдөр байнгын хорооны хурал дээр унасан ч харин нэгдсэн чуулган дээр дэмжигдэж  хэлэлцэгдэхээр боллоо.  Хэрэв энэ санал  батлагдвал УИХ-ын гишүүд  олон нийтийн зүгээс чамгүй талархал хүлээх нь дамжиггүй. Үнэхээр л тэд ард түмний төлөөлөл юм бол иргэдийнхээ л санаа бодлын илэрхийлэл  болж баймаар.  Дэд сайдын орон тоог цомхотгох санаачлага гаргасан болон дэмжсэн гишүүдэд талархал илэрхийлэхээс гадна  дэд сайдуудын суудлыг хэвээр байлгахын төлөө саналаа өгсөн гишүүдийн нэрсийг ил тод зарлах нь зөв байх. Хэн нь хэн бэ гэдгийг олон нийт сайн мэдэж аваг.

 Дэд сайдын орон тоо туслах, жолоочоос эхлээд унаа машин, утас шөрмөс гэхчлэн дагалдах хангамж ихтэй. Эдүгээ 17 дэд сайд ажиллаж байна. Үнэхээр төсөв хүндэрч, улаан голоо цохих гээд байгаа бол энэ мэт дэмий орон тоогоо цомхотгож төсвөө хэмнэх уг гаргалгаа, логик нь байх учиртай.  

УИХ-ын Төсвийн байнгын хорооны дарга Б.Болор “Засгийн газар төрийн албыг 15 хувиар цомхотгоно гээд жирийн албан хаагчдыг ажлаас нь чөлөөлж байгаа. Тэгсэн атлаа дэд сайд нарыг нэмсэн. Дэд сайдыг дагаад туслах, жолооч гээд бий болдог. Зардал өндөртэй”  хэмээн тодотгож байсан юм. Тийм бол энэ өндөр зардлыг хэмнэж чадах эсэхээс УИХ-ын гишүүд оноо авах алдах эсэх нь хамаарах нь байна. Харж л байя.

П.Булган