Н.Алтанхуягийг яагаад АТГ шалгах болсон бэ?

Улс төрийн өндөр албан тушаалтнууд “сааль” ихтэй суудлаасаа буухдаа АТГ-ын хаалга татах нь хэвийн үзэгдэл болжээ. Ерөнхий сайд Н.Алтанхуягийг АТГ-аас шалгаж эхэлсэн ч чухам ямар учраас вэ гэдэгт тайлбар хийхгүй байна. Н.Алтанхуягийн талаар сураглаж очсон сэтгүүлчдийг хөөх шахуу явуулж байгаагаас үзвэл Н.Алтанхуягийг шалгаж байгаа нь үнэн аж. Тэрбээр Ерөнхий сайдын суудлаасаа буухаасаа өмнө “Төр засгийн үйл ажиллагаанд АТГ учруулж байгаа нэг хохирол нь хүмүүсийн томилгоонд эрээ цээргүй оролцдог болсон явдал.  Прокурорын хяналтыг тийш нь авчихлаа. Олон юмыг нэг доор бөөгнүүлэхээр сөрөг үр дагавар гарч байгаа юм. АТГ-т бизнес эрхэлж байгаа хүмүүсийг шууд барьж аваад сэгсрээд шоронд хийгээд байх шаардлага төдийлөн байхгүй” хэмээн шүүмжилж байсан юм. Тэгвэл суудлаасаа буусан Ерөнхий сайд асан Н.Алтанхуяг ямар учраас АТГ-ын “бай” болсон байх магадлалтай талаарх баримтуудыг хүргэе.

Аавынх руу татсан “Нүүрс хөтөлбөр”

Н.Алтанхуягийг нийслэлийн иргэдэд зориулж хийсэн хамгийн сайн ажил бол “нүүрс” хөтөлбөр гэдэг. Дундаж амьдралтай иргэдийн орлогоос давсан, хөөсөрсөн үнэтэй байсан нүүрсний үнийг буулгаж чадсаны үр дүн одоо ч харагдаж байна. Даанч энэ хөтөлбөрийг хэрэгжүүлэхдээ Н.Алтанхуягийн зөвлөх байсан Л.Гансүх дундаас мөнгө идсэн,  3.6 тэрбум төгрөг завшсан хэрэгт орооцолдож “аавын хаалга” татсан. Л.Гансүхийн хэрэг дуусаагүй, батлан даалтад гарсан байгаа билээ. Тиймээс туслахынх нь энэ мөнгө завшсан гэх хэрэгт Н.Алтанхуяг оролцсон байж магадгүй юм.

Зарцуулалтаа зарладаггүй “Чингис бонд”

Эхнээсээ л хэл ам дагуулсан “Чингис бонд”-ын зарцуулалтын асуудал одоо ч олон нийтийн анхаарлыг татсаар байна. Дэлхийн зах зээлээс олж ирсэн 1,5 тэрбум долларыг юу юунд зарцуулсан, тэр нь үр дүнтэй байгаа эсэх тал дээр маргаан үргэлжилсээр байна. Ерөнхий сайд асан Н.Алтанхуяг “Чингис бонд”-оор мөнгө босгож, түүний зарцуулалтыг хянаж байснаараа бүх нарийн асуудлыг мэдэж байгаа нь гарцаагүй. Хэрэв “Чингис бонд”-д асуудал үүссэн бол түүнийг хянаж байсан Н.Алтанхуяг ч асуудлаас салахгүй нь толорхой юм. Тиймээс түүнийг “Чингис бонд”-ын асуудлаар шалгагдаж эхэлсэн гэх таамаг байна.

255 сая төгрөгийн “Бумбардай” комикс

Н.Алтанхуягийг Ерөнхий сайд байхад “Бумбардай” комикс олон улсын үзэсгэлэнгээс шагнал авч амжилттай яваа. Гэхдээ энэ комикс Н.Алтанхуягийг АТГ-аас шалгах болсон бас нэг шалтгаан байж болохыг үгүйсгэхгүй. Өмнө нь түүнийг Ерөнхий сайдын багц 50 тэрбум төгрөгөөс “Бумбардай” есөн цуврал ном бүтээх ажилд 255 сая 600 мянган төгрөг, “Эх хэлний эзэд” медиа хөтөлбөр хэрэгжүүлэхэд 500 гаруй сая төгрөг зарцуулсныг хууль бус хэмээн үзэж АТГ-т  шалгуулах хүсэлт гаргаж байлаа. Тус номыг гаргахдаа тендерийн хуулийг зөрчсөн талаар "Бумбардай" патентаа өнгөрсөн долдугаар сарын 1-нд авсан бол Ерөнхий сайд Н.Алтанхуяг тендергүйгээр мөнгийг нь шилжүүлэхийг зургадугаар сарын 29-ны өдөр шийдсэн байна. Хуульд зааснаар бол тендер зарлаж шалгарсан компанид нь эрхийг нь олгодог. Гэтэл тендер зарлалгүйгээр ганцхан газарт давуу эрх өгсөн нь Ерөнхий сайд болон Н.Эрдэнэбаяр нар нь хоёулаа хууль зөрчсөний илрэл” гэж мэдэгдаж байлаа.

Охин А.Саранзаяагийн “хуурай гарсан” хэрэг

Ерөнхий сайд Н.Алтанхуягийн охин А.Саранзаяаг "Авлигатай тэмцэх газар"-аас шалгасан нь хэсэгтээ л олон нийтийг шуугиулсан. Нийт таван тэрбум төгрөг “идсэн” “Цэвэр агаар” сангийн хэрэгт холбоотой гэж шалгаж байлаа. Тэрбээр Сангийн яамны Төрийн сангийн Төлбөр тооцооны мэргэжилтэнээр ажиллаж байсан бөгөөд эрүүгийн хэрэг үүсгэн тусгаарлан шалгаж байгаа гэх мэдээлэл гарсан. Гэсэн ч “Цэвэр агаар сан”-гийн хэрэг холбогдсон бусад хүмүүс яла авч, А.Саранзаяа ганцаар үлдэж хоцорсон юм. Тиймээс Ерөнхий сайдын охин “хуурай гарсан” энэ хэргийн үйл явцад Н.Алтанхуяг оролцож “чимээгүй” болгосон байх магадлалтай гэж зарим хүн хардаж байна.

Эдгээрээс гадна Орон сууцжуулах 8 хувийн зээл, 888 төсөл, аймгуудыг нийслэлтэй холбосон авто зам, Гудамж төсөл зэрэг өмнөх Засгийн газрын бүтээн байгуулалтын ажлуудыг хэрэгжүүлэхдээ албан тушаалаа урвуулан ашиглаж улсад хохирол учруулсан хэмээн шалгаж байх магадлалтай гэх олон янзын таамаг байна. Учир нь дээрх хөтөлбөрүүдийг хэрэгжүүлэх явцад "но" гарсан талаар явган яриа гардаг байсан ч Н.Алтанхуягийг Ерөнхий сайд байх хугацаанд хуулийн байгууллагаас шалгаж байгаагүй билээ. 

Т.Гэрэл