Г.Алтан Тусгаар Тогтнолын ордонг барьцаанд авах хүсэлт гаргажээ

“Үлэг гүрвэлийн төв музей” буюу хуучнаар Лениний музейн барилга, байгууламжийг газрын хамт барьцаанд тавьсан тухай мэдээлэл өнгөрөгч онд хэвлэлээр цацагдаж байсан билээ. Нийслэлийн МАН 2012 оны 11 дүгээр сарын 06-ны өдөр № 03 тоот Зээлийн гэрээ байгуулан 1.000.000 /нэг сая/ ам.долларыг иргэн Г.Алтангаас зээлсэн баримтыг Төр өмчөө баталгаажуулан бүртгэх явцдаа олж тогтоосон юм. Харин ТӨХ-ны зүгээс, төрийн өмч, онцгой объект болох музейн барилга, түүний доорх газрыг үүргийн гүйцэтгэлийг хангах баталгаа болгож бусдад барьцаалсан болохыг мэдсэн даруйдаа Монгол Ардын Намд хандан, дээрх үл хөдлөх эд хөрөнгүүдийг барьцааны гэрээний шаардлагаас сольж, барьцаанаас чөлөөлөхийг шаардлага хүргүүлээд байсан ч өнөөг хүртэл ямар нэгэн хариу өгөөгүй байна. Тэгвэл иргэн Г.Алтангийн зүгээс МАН-д олгосон нэг сая ам.долларын зээлийн барьцаагаа өөрчлүүлэх хүсэлтийг Дүүргийн иргэний хэргийн нэгдүгээр шүүхэд гаргажээ. Ингэхдээ тэрбээр, итгэмжлэгдсэн төлөөлөгч Г.Сарангэрэлээрээ дамжуулан дараах хүсэлтийг шүүхэд гаргасан байна. Үүнд, “Г.Алтан миний бие МАН-д зээл өгч, МАН-ын өмчлөлийн байр /Үлэг гүрвэлийн музей/-г барьцаалсан болно. Гэтэл төрийн өмч болсон тул барьцаа өөрчлөх нэхэмжлэл гаргаж байна. Хэрэв барьцааг өөрчлөх бол МАН-ын байр Тусгаар тогтнолын ордныг барьцаатай эсэхийг шалгасны эцэст МАН-ын байраар сольж өөрчлөн барьцааг хангах шийдвэр гаргаж өгнө үү. Өөрөөр хэлбэл, өмчлөх барьцааг чөлөөлөх тохиолдолд зээлдэгчийн эрх ашгийг хамгаалан МАН-ын байрлаж буй Тусгаар тогтнолын ордны байраар барьцааг солих шийдвэр гаргана уу. Шаардлага хангасан Г.Алтангийн итгэмжлэгдсэн төлөөлөгч Л.Сарангэрэл” гэжээ.   Эндээс Лениний музейн өмчлөлийг тогтоох шүүхийн ажиллагаа бүрэн дуусаагүй нь харагдана. Шүүхээс МАН-ын байр болох Тусгаар тогтнолын ордныг Г.Алтангийн барьцаанд өгөх эсэхийг шийдэхээр дахин хуралдах бөгөөд энэ үед МАН-ынхан намын байраа өөр нэгэн Алтанд барьцаалан зээл авчихсан байх вий гэх хардлага Г.Алтан болоод ард олонд байна.