Ч.Сайханбилэг:Оюутолгой улс төр, Засгийн газрын асуудал байхаа больсон

Арабын нэгдсэн Эмират улсад албан ёсны айлчлал хийсэн Ерөнхий сайд Ч.Сайханбилэг өчигдөр орой 18,00 цагт эх орондоо ирэв.  Түүнийг айлчилж байх ар хударгаар нууц гэрээ хийлээ хэмээн буруутгаж огцруулах тухай  яриа, санаачлага гараад байгаа. Тэрбээр “Чингис хаан” олон улсын нисэх онгоцны буудалд буусан даруйдаа  хэвлэлийнхэнд мэдээлэл өгсөн бөгөөд айлчлалтай холбоотой хамгийн халуун сэдэв нь мэдээж, Оюутолгойн далд уурхайн санхүүжилтийн гэрээнд гарын үсэг зурсан  гэх сэдэв байсан юм.  

Мэдээллийн эхэнд Ерөнхий сайд Эмират улсад хийсэн айлчлалаа үр дүнтэй байсныг онцлоод ганзага хоосон ирээгүйгээ дуулгав. Айлчлалын долоо хоногийн хугацаанд Монголдоо найман тэрбум ам.долларын хөрөнгө оруулалттай ирснээ хэлсэн.

Тэр Дубай хотод ямар нэгэн нууц гэрээ үйлдээгүй гэдгээ мэдэгдээд Оюутолгойн далд уурхайн санхүүжилтийг шийдвэрлэх төлөвлөгөөнд гарын үсэг зурсан нь гацаад байгаа  бүтээн байгуулалт, хөрөнгө оруулалтыг урагшлуулсан ажил болсон хэмээн дүгнэсэн юм. 

Ерөнхий сайд мэдээллийнхээ үеэр  Оюутолгойн нууц гэрээ гэсэн мэдээлэлтэй холбоотой асуудлаар тэрбээр доорх тайлбарыг өглөө.

Ерөнхий сайд Ч.Сайханбилэг “Оюутолгойн далд уурхайг эхлүүлэх төлөвлөгөөг байгуулаад ирлээ. Гэхдээ би Ерөнхий сайдын зүгээс ямар нэгэн гэрээнд гарын үсэг зураагүй. Бизнес эрхлэгч компаниудын төлөөлөл гарын үсэг зурж, төлөвлөгөөгөө баталгаажуулсан. Энэ төлөвлөгөө байгуулагдсанаар Оюутолгой улс төр, Засгийн газрын асуудал байхаа больсон. Өөрөөр хэлбэл Оюутолгой компани эдийн засгийн харилцаанд орж байна гэсэн үг. Тиймээс Оюутолгойг улстөржүүлэхээ  зогсоовол таарна. Далд уурхайг эхлүүлэхэд эхний ээлжинд зургаан тэрбум төгрөг шаардлагатай.

Нууц далд гэрээ хаана ч байхгүй. Өнөөдрөөс Оюутолгой улс төрийн асуудал биш, компани хоорондын асуудал болсон. Тиймээс цаашид Эрдэнэт үйлдвэр шиг орхих хэрэгтэй. 2009 оны гэрээг хөндөх асуудлыг аль, аль талд нь тавигдаагүй. 2009 оны гэрээг сайжруулах тухай яригдсан. Удирдлагын менежментийн зардал 6 хувь байсныг 3 хувь болгож чадсан. Хоёр талаас ажлын хэсэг гарч онолын ажлын хэсэг гаргаж ажиллахаар болсон. Өмнө нь Монголын тал өгөөжийн 53 хувийг авна. Рио Тинто 47 хувийг авна гэж байсан. Манай зүгээс гадны хоёр ч том компанийн зөвөлгөөг авсан. Ингээд ярилцаж тохиролцсоны үндсэнд 54.9 хувийг манай тал авахаар болсон нь манайд бол маш ашигтай хувилбар юм. Татварын асуудлыг шийдсэн учраас дахин татвартай холбоотой элдэв асуудал гарахгүй. Гэрээг албан ёсоор ил болгоно. Энэ удаагийн явдал бол Монголын талаархи олон улсын ойлголтыг эерэг болгосон. Мөн бондын болон хувьцааны үнэ сүүлийн 20 сар царцаад байсан бол одооноос өсч эхэллээ. Тиймээс улс төрчдийн тоглолтыг болиулж ажлаа хийх цаг болсон. Мөн айлчлалын хүрээнд АНЭУ-аас 1 тэрбум ам.долларын хөнгөлттэй зээл өгөх боломжтойгоо мэдэгдсэн. Ингээд үндсэндээ 7 хоногийн дотор бид 8 тэрбум ам.долларын Монголд оруулж ирэх боломжтой боллоо. Харин ч Монголын тал нөгөө талтай хэлэлцэлгүй нэмэлт  орлого төлөвлөсөн, татварынхан дансыг нь хаасан тохиолдол гарч байсан. Түүнээс болж итгэл алдсан тал бий. Харин одоо бол нэг завин дээр сууснаа хэн хэн нь ойлгож, итгэлцэл сэргэлээ. Засгийн газар Оюутолгойн далд уурхайг урагшлуулж, ажлаа хийж эхэлсэн нь зарим нэг хүмүүст таалагдахгүй байж болно. Гэвч үүнийг дэвэргэх хэрэггүй” гэв.