С.Баяр айдгаа авдартаа хийчихээд ирнэ

Улстөрийн нөхцөл байдлыг урьдчилан мэддэгээрээ алдартай Ерөнхий сайд асан С.Баяр 2012 оны сонгуульд АН ялж, МАХН нь МАН-аас багагүй санал зулгаана гэдгийг гадарлаж, Ерөнхий сайдын үлдсэн хугацаагаа Сү.Батболдод арилжчихаад алс холын АНУ уруу алга болж өгсөн.

Яг түүний тооцоолсноор юм болж, АН ялж авлигын загайлмалсан эцэг экс Ерөнхийлөгч Н.Энхбаярыг барьж хорин хэсэгтээ л түүнээс дутуугүй мөнгө цохисон С.Баярыг айдаст автуулж байв. Мэдээж хойдохдоо санаа зовохооргүй болтлоо их хөрөнгө завшсан С.Баяр АНУ-д очсон даруйдаа Америкийн хэр баргийн баячууд авч дийлдэггүй үнэтэй байшин худалдаж авсан юм. Түүнчлэн экс Ерөнхийлөгч Н.Энхбаяр тэргүүтэй хүмүүсийн гадаад дахь дансыг шалгаж эхэлсэнтэй холбогдуулан өөрт байгаа хөрөнгөө үнэтэй байшингууд болгож нэг ёсондоо авлига, хээл хахууль болон Монгол Улсаас завшсан хөрөнгөө угаасан. Экс Ерөнхий сайд С.Баярын энэ хөрөнгүүдийг авсан мөнгийг Монголын жирийн иргэдийн ихэнх нь төсөөлөх нь битгий хэл зүүдэндээ ч хараагүй.

Ихэнх иргэдийн тоолж ч чадахгүй толгой эргэм энэ их хөрөнгөтэй холбогдуулан УИХ-ын зарим гишүүн Авлигатай тэмцэх газар /АТГ/-ыг С.Баярыг шалгахыг хүссэн. Мэдээж энэ мэтчилэн бүх мэдээлэл алс холын Америкт буй С.Баярт эндэх улстөрийн ертөнцийн “нүд”, “чих”-ээр нь хүрч байгаа. Тиймээс С.Баяр Америкаас өөрийн биеэр ирж энэ асуудалд тайлбар хийхээр болсон тухайгаа мэдээлсэн юм. Мэдээж энэ үеэр түүний АНУ-д угаасан асар их мөнгөний тухай асуудал яригдана. Үүнээс өмнө мөн С.Баяр АНУ-д авлигын мөнгөөр долоон байшин худалдаж аваагүй гэдгээ нотлохоор АТГ-т өөрийн биеэр ирж шалгуулах хүсэлтээ тавьсан тухай мэдээлэл гарсан. Харин өчигдөр АТГ-аас “С.Баяр өөрийгөө шалгуулах хүсэлт тавиагүй” гэж албан ёсоор мэдэгдсэн юм. С.Баяр эндэх “гар”, “хөл”-өөрөө дамжуулан ийм мэдээлэл тараасан болж таарах нь.

Юутай ч, С.Баяр ирэх сонгуулиас өмнө АНУ-аас ирж долоон байшингийнхаа талаар мэдээлэл хийх нь гарцаагүй. Нөгөө талаас овжиноороо зартай С.Баярыг Н.Алтанхуягаас илүү ухаалаг хүн гэж улстөрийн хүрээнийхэн үздэг юм билээ. Саяхан УИХ-ын гишүүн Ё.Отгонбаяр “Н.Алтанхуяг нэлээд нохой зальтай” гэж хэлсэн. Тэгэхээр Н.Алтанхуягийг зажлахгүй залгиж, өлгөхгүй өмхдөг С.Баяр АНУ-аас ирэхдээ айдгаа авдартаа хийчихээд ирэх нь тодорхой биз дээ. Адаглаад авсан байшингуудаа өөр хүний нэр дээр шилжүүлэх гээд арга саам зөндөө.

Ямартай ч, нэгийг хэрэгжүүлж, хоёрыг тооцоолж ирэх С.Баярт эртнээс “сөрсөн базаа” хийх аргаа сүвэгчилж байсан нь дээр байх аа. Тэгэхгүй бол хөлөө ачиж сууж байгаад л “гэмгүй хүн гэлбэлздэггүй” юм гэдгийг харин ч нэг харуулж өгөх байх даа.