Т.Уянга болон бие даагч гишүүд ХҮН намд элсэнэ

Монголын хамгийн отгон нам болох Хөдөлмөрийн Үндэсний Намыг анх байгуулагдсан цагаас эхлэн УИХ-ын гишүүн С.Ганбаатарын нам хэмээн шуугиж байсан. МҮЭХ-ний Ерөнхийлөгчөөр олон жил ажилласан, түүнийхээ гавьяагаар олонд танигдсан улс төрд орсон тул "Хөдөлмөрийн" гэх тодотголтой нам түүнийх гэхэд эргэлзэх хүн байхгүй. Гэтэл С.Ганбаатар гишүүн үүнийг өөрийн биеэр үгүйсгэж байлаа. Харин эх сурвалжийн мэдээлж байгаагаар тэрбээр УИХ-ын ээлжит чуулганы үеэр "минийх биш" гэж байсан намдаа элсэхээр болж байгаа аж. Түүгээр ч барахгүй Хөдөлмөрийн Үндэсний намд бусад бие даагч гишүүд болох Ц.Даваасүрэн, Х.Болорчулуун нар энэ отгон намд элсэхээ зарлах гэнэ.

УИХ дотор бие даагчдын бүлэг байгуулаад байсан тэднийг хамтарч ажиллахад гайхах зүйлгүй. Харин МАХН-МҮАН-ын "Шударга ёс" эвслээс УИХ-ын гишүүн болсон Т.Уянга тэдэнтэй нэгдэнэ гэсэн мэдээлэл олны анхаарлыг татаж байна. Тэрбээр үе үе намынхаа бодлогын эсрэг байгаагаа мэдэгдэж хэд гурдан үг хэлдэг. Намаасаа гарч, бие даагч гишүүн болж магадгүй гэх мэдээлэл ч өмнө нь гарч байлаа. Ирэх долоо хоногт МАН-ын зургаан сайдыг огцруулж, Засгийн газрын бүтцэд өөрчлөлт оруулах сургаар тэд ийм шийдвэр гаргаж байгаа бололтой.

С.Ганбаатарын хувьд ХҮН намыг байгуулж, түүнд уригдаж байгаа мэтээр орно гэдэг нь аль эртний төлөвлөгөө байсан байх. Харин бусад гишүүдийн хувьд Засаг солигдож байгаа нь нөлөөлсөн бололтой. Олон гишүүн нэгдэж чадвал ХҮН нам Засгийн газарт орж чадах ч юм билүү, хэн мэдлээ...