130 мянган иргэн цахим карт авчээ
Нийслэлчүүд цахим картаар нийтийн тээвэрт үйлчлүүлдэг болоод нэлээд хэд хонож байна. Шинэ систем учраас иргэдийн дунд тулгамдсан асуудал багагүй гарч байгаа тул нийслэлийн Тээврийн газраас өнөөдөр иргэдийн асуултад хариулт өгөхөөр мэдээлэл хийлээ.
ИРГЭДИЙН ТАВЬЖ БУЙ НИЙТЛЭГ АСУУЛТЫН ХАРИУ
1. Цахим системд шилжсэнээр ямар хөнгөлөлт урамшуулал байх вэ?
ХАРИУЛТ: Урамшууллын асуудлыг хэлэлцэж байна. Тухайлбал, 30 минутын дотор шилжин өөр автобусанд суусан тохиолдолд картнаас дахиж мөнгө суутгахгүй. Өөрөөр хэлбэл үнэгүй зорчино гэсэн үг. Мөн нэг өдөрт олон удаа нийтийн тээврээр зорчсон тохиолдолд 400 төгрөг суутгах зэрэг картын урамшуулал олгодог байхаар хэлэлцэж байна.
2. Хөгжлийн бэрхшээлтэй, ахмад настнуудын хувьд хорооноосоо картаа авна. Тэдний хувьд картаа хаясан ч бүртгэлтэй учраас санаа зовох асуудалгүй. Энгийн иргэд ТҮЦ-үүдээс картаа авсан тохиолдолд хэн гэдэг иргэн, хаанаас авсан нь тодорхойгүй. Тиймээс хаяж үрэгдүүлсэн тохиолдолд яах вэ?
ХАРИУЛТ: Хөгжлийн бэрхшээлтэй, ахмад настнуудын хувьд хорооныхоо халамжийн ажилтнаар дамжуулан картаа худалдаж авна. Харин автобусны буудал дээрх ТҮЦ-ээс карт аваад үрэгдүүлсэн бол “Улаанбаатар смарт карт”-ын дэргэдэх Иргэдэд үйлчлэх төвд хандаж болно. Мөн картаа авсныхаа дараа бүртгүүлж болно. Иргэдэд үйлчлэх төвийн 78 11 12 89 дугаарын утсанд холбогдож мэдээлэл өгнө.
3.Хичээлийн шинэ жил эхлэхээр оюутан, сурагчид автобусаар хөнгөлөлттэйгөөр зорчдог. Тэдний хувьд яах вэ. Картаа хаанаас авах вэ?
ХАРИУЛТ: Оюутнуудын хувьд картыг нь ирэх сарын 15-наас Монголын оюутны холбоогоор дамжуулан олгоно. Харин сурагчдын картыг хичээлийн шинэ жил эхлэхээр олгож эхэлнэ.
4. Бэлэн мөнгөний хайрцгийг хэзээ хүртэл ажиллуулах вэ?
ХАРИУЛТ: Иргэдийн дийлэнх нь картаа худалдан авч, автобусанд картаар үйлчлүүлдэг болж хэвших хүртэл ажиллуулна. Нийтийн тээврээр 500 мянган иргэн зорчдог гэх судалгаа бий. Өнөөдрийн байдлаар эдгээр иргэдийн дөнгөж 130 мянга нь л смарт карт худалдан авсан байна. Тиймээс энэ тоог 500 мянга дөхөх хүртэл бэлэн мөнгөний хайрцаг ажиллуулсаар байна.
5. Смарт карттай холбоотой мэдээллээ хаана өгч, гомдол санал хэлж болох вэ?
ХАРИУЛТ: Иргэдэд үйлчлэх төвийг “Улаанбаатар смарт карт” компанийн дэргэд байгуулсан. Холбогдох утас нь 78 11 12 89 юм. Иргэд смарт карт, цахим системтэй холбоотой бүх мэдээлэл, гомдлоо энэ утсанд өгч болно.
6. Зарим автобусны кондукторууд “Манайх сүлжээгүй, холбогдоогүй учраас мөнгөөрөө явна уу” гэх мэтээр карт авсан иргэдийг хохироож байна. Энэ тохиолдолд яах вэ?
ХАРИУЛТ: Цахим системийг нийтийн тээвэрт үйлчилж буй 1000 гаруй автобусанд бүгдэд нь нэвтрүүлсэн. Автобусны кондуктор, жолоочид бүгд мэдэж байгаа. Тиймээс ийм асуудал гарвал дээрх утсанд холбогдож мэдээлэл өгөх хэрэгтэй.
7. Картын борлуулалт хэр байна вэ?
ХАРИУЛТ: Өнөөдрийн байдлаар 130 мянган иргэн карт авсан байна. Энэ дундаас хөгжлийн бэрхшээлтэй, ахмад настнуудын 50 мянга нь картаа авсан байна.
Холбоотой мэдээ
Сэтгэгдэл ( 0 )