Евро стандартыг Монголд нутагшуулна
Барилга хот байгуулалтын дэд сайд Г.Байгалмаа өчигдөр Германы Заксон-Анхальт мужийн Шинжлэх ухаан, эдийн засгийн яамны төрийн нарийн бичгийн дарга Марко Түлнертэй уулзаж хоёр орны хамтын ажиллагааны талаар уулзалт хийлээ.
Уулзалтын үеэр Монгол улс, ХБНГУ хооронд барилга хот байгуулалт, ус хангамж ариутгах татуургын салбарт харилцаа хамтын ажиллагаа өргөжин хөгжиж байгаад таатай байгаагаа талууд илэрхийлэв. Мөн аймаг сумын төв , төвлөрсөн бус суурин газарт зориулагдсан бага хүчин чадлын ахуйн болон үйлдвэрийн цэвэрлэх байгууламжийг нэвтрүүлэх, Барилгын материалын сорил шинжилгээний лабраторыг шинэчлэх, шинээр барьж байгуулах чиглэлээр тодорхой хамтарсан төсөл хэрэгжүүлэх хэрэгцээ байгаа талаар Монголын тал онцлон тэмдэглэсэн юм.
Уулзалтын хүрээнд барилгын салбарын Евро стандартыг Монгол орны хөрсөнд нутагшуулах, Эрчим хүчний хэмнэлттэй ногоон барилгын технологийг Монголд нэвтрүүлэх, Барилга хот байгуулалтын салбарын нарийн мэргэжлийн инженер техникийн ажилтан сурган бэлтгэх тал дээр ХБНГУ-ын талаас дэмжлэг үзүүлж хамтран ажиллахаа амлалаа.
Өнгөрсөн оны 11 сард Заксон-Анхальт мужийн Магденбург хотод болсон “Ногоон хот- ногоон үйлдвэрлэл” Олон улсын бага хуралд Барилга, хот байгуулалтын дэд сайд Г.Байгалмаа оролцсон байна. Тэрээр уулзалтын үеэр хотод төлөвлөж буй аливаа шинэчлэлийг хийхдээ “ногоон” үзэл баримтлалыг барьж, түүнд чиглүүлэн хөгжүүлэх зөвлөмж өгч ажилладаг тухайгаа дурдлаа.
Холбоотой мэдээ
Сэтгэгдэл ( 0 )