Ломбын Нямаа: Миний амьдардаг ертөнцөд хүмүүс нь үхэж жаргадаг

Автор | Zindaa.mn
2015 оны 10 сарын 08

МЗЭ-ийн шагналт зохиолч, яруу найрагч Ломбын Нямаатай уулзаж хөөрөлдлөө. Монголын утга зохиолд Хан Хэнтийн яруу найргийн дэг сургуулийг бий болгосон эл эрхэм эдүгээ “Их засаг” их сургуульд багшилж байгаа нэгэн билээ.

 -Уран бүтээлч хүнээс сүүлийн үед юу хийж байна гэх ч бараг л илүүц асуулт даа...
-Би нэг зохиолын судлалаар нэлээд юм хийдгийг чи юу эс андах вэ. Д.Батбаярын “Мементог бүтээхүй”, “Цахилж яваа гөрөөс” тууж, Д.Пүрэвдоржийн “Чингис” шүлэг, До.Цэнджавын “Хөх жавар” тууж, Жаргалын Барамсайн “Үхэр гэдэг амьтан” зэрэг бүтээлийг судалж ном болгон өлгийдөхөд бэлэн болгосон. Барамсайн тэр өгүүллэг гэхэд зохиогчоо хэлмэгдүүлж байсан бүтээл. Нобелийн шагналт зохиолч, аугаа их М.Шолоховт нэг найзаараа шууд орчуулуулан сонсгоход тэр их зохиолч гурвантаа “молодец” гэж үнэлсэн түүхтэй зохиол. Дорнын их яруу найрагч Бэгзийн Явуухулангийн “Тэхийн зогсоол” дууль, ардын уран зохиолч Сэнгийн Эрдэнийн “Өвгөн шувуу” өгүүллэг хоёрыг уншин судалж байна. Монгол хүний үхэл, монгол амьтны үхэл хоёрыг нэг ёсондоо харьцуулж байгаа хэрэг. Монгол хүн насны эцэст найзуудаа цуглуулж суугаад, сэтгэлийн үгээ хөөрөлдөн, дуугаа дуулаад буцдаг. Өрнийнхөн бол юм хурааж цуглуулсан ч хэнд ч өгөхгүй хав дарж байгаад үхдэг шүү дээ. Тэгэхэд монгол хүн насны наран буцахын цагт хурааж хуримтлуулсан бүхнээ үр хүүхэд, ойр дотныхон, найз нөхдөдөө үлдээгээд явж байдаг. Монгол тэх гэхэд уулын оргил өөд мацсаар өндөр дээр гаруут эх нутгаа нэг сайхан халиагаад эврээ даалгүй нисдэг. Бусад газрын янгир тэгдэггүй л байгаа юм даа. Явуухулан гуай С.Эрдэнэ гуайд “Би ийм дууль биччихлээ. Чи бас гайхалтай өгүүллэг бичсэн. Хангалттай. Одоо хоёул гарч архи ууя” гэсэн гэж байгаа.
-Аливаа амьтан болоод хүний үхэлд хүртэл төрсөн нутаг нь нөлөөтэй гэж хэлэх гээд байна уу, та?
-Эртний их далайн үлдэц болоод ч тэгдэг юм уу, монгол нутаг татах хүч сайтай юм. Тангадын Галсан ахыг гадаадын амьтны хүрээлэнд явж байхад монгол чоно торныхоо цаана дагаж гүйгээд байсан гэж байгаа ш дээ.
-Зохиолч Л.Одончимэдийг Чикагогийн амьтны хүрээлэнд явж байхад монгол тэмээ мэлмэртэл буйлаад, үнэрлэж дагаад, зохиолч Ж.Мягмарсүрэнг Японы амьтны хүрээлэнгээр явж байхад Ерөнхийлөгч Н.Баганбандийн бэлэглэсэн тарвагууд бүтэн жил толгой өндийлгөхгүй байснаа цагаан малгайгаараа даллуут гозойтол босож ирээд хошгироход тайлбарлагч нь гайхсан гэж бичсэн байдаг юм?
-Амьтан хүртэл өөрийнхөө төрөлх чанарыг мартахгүй л байна даа. Мягмарсүрэн ч амьтны талаар аюултай сайхан бичнэ ш дээ. “Барын зулзага бамбар”, “Унагаа зуусан хулан” гэдэг номууд чинь Стивен Томпсоноос ч илүү санагддаг юм ш дээ.  

Манай сургуулийн түүхийн багш Чимэдцэрэн гэж буриад авгай “Монголын их сургуульд сурч байгаа юм бол чи монголоор л ярь” гэснээс хойш халх аялгаар ярьж сурсан.

-Та Хэнтийн Дадалын буриад мөртлөө халх аялгаар янзтай цэвэр ярих юм аа?
-Манай басхан Бүдханд яг буриадаараа ярьж байгаа биз. МУИС-ийн монгол хэлний ангид анх элсэн орохдоо би буриадаар ярьдаг хүүхэд байлаа. Манай сургуулийн түүхийн багш Чимэдцэрэн гэж буриад авгай “Монголын их сургуульд сурч байгаа юм бол чи монголоор л ярь” гэснээс хойш халх аялгаар ярьж сурсан.

-Та нэг зохиолын судлал хийж байгаа гэлээ. Тухайн үедээ анзаарч ойлгоогүй ч юм уу, задлал хийх яруу найргийн бүтээлүүд байж л байгаа даа?

-Ардын уран зохиолч Т.Галсангийн төрийн шагналт Ч.Ойдов зохиолчид зориулсан 
“Ард олноосоо тасарсан бол
Алтан өлгийд булаарай
Далай олонтойгоо явсан бол
Далан давхарт оршуулаарай” гэдэг чинь зүгээр ч нэг гашуудлын шүлэг биш юм. Энэ шүлгийн ертөнцийн мөн чанарыг өгүүлсэн далд чанарыг нээнэ гэж бодож байна. Тангадын Галсангийн “Монгол Жангар” бол арван төрийн шагнал ч багадах аугаа сонгодог бүтээл юм шүү.

Жамцын Бадраа багшийн “Жаргаах зүрхэн” гэхэд их учиртай дуу. 
“Хүдэн татсан сарьдаг байна аа хө
Хүний нутгийн хангай юу даа хө
Ээ, Хүслэн татсан амраг тэр минь хө
Ээ, Хүрэн зүрхний уяа юу даа хө” гэдэг дээ. Хөвсгөлийн цаад талын баялаг ихтэй уул нуруудыг Орост таслаад өгчихсөнд харамсан гашуудсан дуу шүү дээ. Тэрнээс зүгээр ч нэг амрагийн дуу биш.

Тангадын Галсангийн “Хилийн овооны нууц” гэж мундаг найраглал “Улирал ба зохиолч” сэтгүүлд хэвлэгдсэн. Тэр бол үнэн сайн бүтээл болсон байна лээ.
-Таныг саяхан нэг ном гаргалаа гэж цахимаар шуугиад байсан. Ямар ном билээ?
-Зохиолч Гүн Аюурзана дүү “Миний амьдардаг ертөнц” шүлгийг минь “Монголын сонгомол яруу найраг” антологид оруулсан байдаг юм. Энэ шүлгээрээ нэрлэсэн зургаан бүлэгт номоо сая хэвлүүллээ. “Амьд ододтой хөөрөлдсөн алтан хором” номыг маань чи мэднэ. Эрдэмтэн зохиолч Ч.Лодойдамба, Ц.Дамдинсүрэн, билгүүн номч Бямбын Ринчен, төрийн хошой шагналт зохиолч Д.Намдаг, ардын жүжигчин Л.Мөрдорж, Ш.Гаадамба, соён гэгээрүүлэгч Мишигийн Цэдэндорж, ардын билэг зүйч Жамцын Бадраа, яруу найрагч Нямбуугийн Нямдорж, билэг танхай найрагч Ринчиний Чойном, яруу найрагч Ламжавын Лувсандорж, Данзангийн Нямсүрэн нартай уулзаж учирч, хөөрөлдөж явснаа нэгэн бүлэг болгон орууллаа. “Дуусаагүй хөрөг”, ярилцлагууд, нэг зохиолын судлал, миний эгэл бор шүлгүүд эл номонд минь багтсан даа. 
-“Миний амьдардаг ертөнц” шүлгээ нэг дуудаач!
 

-“Миний амьдардаг ертөнцөд тэнгэрт нь од түгдэггүй
Миний амьдардаг ертөнцөд ганцхан өнгийн, улаан цэцэг ургадаг
Миний амьдардаг ертөнцөд ус нь уруугаа биш өөдөө урсдаг
Миний амьдардаг ертөнцөд шувууд нь мөлхөж явдаг
Миний амьдардаг ертөнцөд хүмүүс нь үхэж жаргадаг” гэсэн л шүлэг байгаа юм.

-Жаахан гунигтайдуу л шүлэг юм даа?
-Дэлхийн утга зохиолыг анзаарч байхад харамсал эмгэнэлийн бүтээлүүд л цагийн шалгуур дааж үлдсэн байдаг юм даа. Монголын их зохиолч Ванчинбалын Инжанааш ч гэсэн “Ертөнцийн арван хүний ес нь зовлон шаналантай” гэсэн байдаг нь бас л бодууштай үг юм шүү. 
-Яруу найрагч Д.Урианхай гуай “Нэг л хүүхэд траншейнд амьдарч байхад би энэ харгис төрөөс ганц ч шагнал горьдохгүй” гэж тангарагласан гэдэг. Одоогийн төр засгаа та юу гэж бодож явдаг бол?

Хүүхдийг гудамжинд гаргадаг, ард түмнээ цагаан ууттай зовлон үүрүүлээд тарчлаадаг төр гэж байж болохгүй.

 -Өмнөд Солонгосын Ерөнхийлөгч Пак Ин Ха номондоо “Дүү маань гудамжны үзүүрт нэг хүүхэд байна гэхээр нь авчруулан ирээдүйд нь санаа тавилаа” гэсэн байна лээ. Монголын төр тэгэхэд үр хүүхдүүдийн ирээдүйг бодохгүй байгаа. Төрд тийм хүнлэг, ухаантай хүн гарч ирэхгүй байгаа нь тун харамсалтай. Хүүхдийг гудамжинд гаргадаг, ард түмнээ цагаан ууттай зовлон үүрүүлээд тарчлаадаг төр гэж байж болохгүй. Достоевский “Хүүхэд зовоодог төрийг ардчилсан төр гэхгүй” гэж хэлсэн.

 

Урианхай найрагч эх оронч сэтгэл, мөс чанарын том илэрхийлэл юм шүү. Хүүхэд зовоосон нийгэм хэзээ ч хөгжихгүй.

Куба гэж коммунист дэглэмтэй орон л гээд байдаг. “Нэг хүүхдийн шүд хорхойтоход Фидель Кастрогийн ширээн дээрх цаас чичрэн хөдөлдөг” гэж Монгол Улсаас анх удаа Гаванагийн их сургууль төгссөн Чулуун гэж миний анд мундаг дипломатч хэлсэн.

Тэгэхэд өнөөдөр Элбэгдоржийн ч юм уу, Сайханбилэгийн ширээн дээрх цаас хөдлөх үү. Хүүхдийн гэгээн сэтгэлийг ингэж будантуулж болмооргүй л санагддаг юм. 

-Та хэдэн жил багшилж байна?
-МУИС-ийг төгссөнөөс хойш дөчин зургаан жил ардын хүүхдүүдэд багшиллаа. 
-Энэ олон жилд хүүхдийн авьяас чадварыг тан шиг таньж, Монголын утга зохиолын ертөнцөд өөрийн гэсэн яруу найргийн дэг сургуулийг бий болгосон хүн ховорхон. Миний мэдэхээр модернист яруу найрагч Баатарын Галсансүх л лав таны гарын шавь даа?
-Мянга есөн зуун далаад оноос сургуулийн захирал энэ тэр хийгээд явчихсан хүн л дээ, би. Монголын бүх хүүхдийг цоорсон эрдэм боловсролтой болгоно гэдэг хэцүү. Оюун ухааны далайгаас хутгах савны хэмжээ нь янз бүр. Том шанагатай хүүхэд байна. Жижиг шанагатай хүүхэд байгаа. Бүгдийг нь эрдэмтэн болгочихно гэвэл үлгэр. Хүн гэдэг амьтан өөрийнхөө үйлийн үрээр бүрэлдэн бий болдог ертөнц. Америкийн эрдэмтэн Гильфорд “Авьяастай хүүхдийг хөгжүүлэх онол”-ыг бий болгосон юм. Хэнтий аймгийн Өндөрхаан сумын хоёрдугаар сургууль буюу одоогийн “Тэмүжин” цогцолборын бага ангийн хичээлийн эрхлэгч байхдаа ангиудаар явж авьяастай хүүхэд хайлаа. Математикийн багш Товуудоржийн удирдсан дөрвийн А ангид ороод “Та нар ямар ном уншив” гэсэн чинь тээр ард сууж байгаа гозгор цагаан хүү “Зүрхний хилэн”-г уншсан гэж байна. “Юу гарч байна” гэсэн чинь маш мэдрэмжтэй ярьж байх юм. Тэгж Галсансүхийг олж авсан юм. Жаахан ээрүү, хэлгий хүүхэд байсан.
-Бага ангийн багш Данзангийн Нямсүрэн шавь Дашбалбарынхаа хэлийг засах гэж чулуу хүлхүүлсэн гэдэг шиг юм ярих гээд байна уу?
-Дэндэвийн Пүрэвдорж гуайн “Бурхад ба хүмүүс” шүлэглэсэн романыг дөрөв дөрвөн мөрөөр нь хувааж өгч цээжлүүлсэн. Тэр сайхан найргийг чангаар уншаад байхаар чинь хэлний гажиг дороо арилдаг байхгүй юу.
-Галсансүх чинь одоо жигтэйхэн хэлэмгий хурдан ярьдаг хүн ш дээ?
-Өөрөө эртэд зурагтаар энэ тухай ярьж байна гэнэ лээ. Хоёр жилийн дотор л хэл нь сайжирсан. Өдөрт таван шүлэг заавал ч үгүй бичүүлнэ. Ингээд долоо, наймдугаар ангиасаа л надаас тасраад явчихсан. Гильфорд гуайн онолд “Авьяастай хүүхэдтэй өдөр бүр ажиллах, багш хүн шавьдаа үлгэрлэхүйц номын сантай байх, шавийнхаа аав ээжтэй зохис төгөлдөр харьцаж ойлголцох, сайн ном уншуулах” гэсэн зүйлс байдаг юм. Үүнээс хойш яруу найрагч Гансүрэн, Занданхүү, Наранчимэг, Сонинбаяр нарын авьяастай хүүхдүүд яг л ийм замналаар хүмүүжсэн. Галсансүхийг аравдугаар ангиа төгсөхөд хэлэх үггүй болоод Нямбуугийн Нямдоржид хүлээлгэн өгсөн дөө. Галсансүх орос хэлийг гэхэд үгээр нь биш сэтгэхүйгээр нь сурсан оюуны чадамж өндөртэй хүүхэд байгаа юм. 
-Та Нямбуугийн Нямдоржийг нэг багш гээд, нэг нөхөр гээд яриад байх юм. Үе тэнгийн хоёр уу?
-Бид хоёр Хэнтийд хөдөөгийн сургуульд багшийн ажил нэгтэй явсан үе бий. Ер нь л үе тэнгийн нөхөр шиг сайхан нөхөрлөж явсан даа. Тэр бүхнээ би номондоо тодорхой бичсэн.
-Мишигийн Цэдэндорж гуай бол яах аргагүй таны багш даа?
-Би 1965 оны аравдугаар сарын 10-ны өдөр шүлгийн нэг уралдаанд түрүүлсэн юм. Тэгэхэд Миүшигийн Цэдэндорж багш намайг ихэд тоож, гарын үсгээ номондоо бичиж, гэрээ зааж өгсөн. Тэгж багш шавь барилдсаны тавин жилийн ой энэ онд тохиож байгаа юм. Тиймээс би “Миний амьдардаг ертөнц” номынхоо хуримыг энэ сарын 10-ны өдөр ташруулан Хүүхдийн номын ордонд хийхээр товлосон доо.

Л.Батцэнгэл 

Сэтгэгдэл ( 13 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
sanaa (87.96.185.31) 2017 оны 04 сарын 01

teneg setguulch shulgiig n oilgosongui dee

0  |  0
jawzaa smile(59.153.113.18) 2017 оны 01 сарын 24

mundag hvn shv . iim hvnii shawi ni bolj ywsandaa baharhdag

0  |  0
Г.Энхбат (202.179.29.157) 2016 оны 11 сарын 26

Мундаг багшаасаа сурах юм их байнадаа...Хэлсэн үг бүр нь биднийг гэдэг!!

0  |  0
Г.Энхбат (202.179.29.157) 2016 оны 11 сарын 26

Мундаг багшаасаа сурах юм их байнадаа...Хэлсэн үг бүр нь биднийг гэдэг!!

0  |  0
133 Г.Ууганжаргал(124.158.90.56) 2016 оны 11 сарын 26

Таниасаа мэдлэг хуримтлуулж байдагтаа баярлаад ханахгүй ээ багш аа.урт удаан насалж олон түмний хүүхийн мэлмийг нээж байгаарай.

0  |  0
enhee(202.179.23.197) 2016 оны 11 сарын 26

Nymaa bagsh maani saihan hun shuu, odoo hurtel huuhduuded bagshlaal dandaa l nom unsh gdj heldegsen n, ih daruuhan , Gavyat bagsh bolsoniign heleh gd yamnaas humuus zalgaj helsen chini shalgalttai baina gd utsaa tasaltsan gesen hehehe

0  |  0
131baasandemberel(202.70.46.219) 2016 оны 11 сарын 26

Manai bagsh estoi mundag hvn shvvv helj bui vg yarij bgaa yarianaas n ih zvil suraltsaj bolno .Bagshiin erem shavid gj tvvnii bagsh ch gsn erdem medlegiin ohi uurhai bsn n lavtai . Mundag bagshaaraa hicheel zaalgadgaaraa mash ih baharhdag shvvv

0  |  0
Saruul(202.9.40.203) 2016 оны 11 сарын 26

Saikhan xun shuu ajildaa ugluu ochood 5 ug soliod buun erch such avdav daa

0  |  0
Temercheder bi beer.(148.60.83.134) 2015 оны 10 сарын 09

Nyamaa naizdaa bayar hyrgye!hyyhdyyd talarhadag naiz daa!yamar yabsnaa oiriin yed harilzaya!Nyamdorjiin dotno andyyd yabj dee!!bid nar....Hentiin seheetnyydiin dynd zohiolch heden nehedtei saihan chag ye aldyyrsaar .....

0  |  0
Л. НЯМАА БАГШДАА(180.149.78.21) 2015 оны 10 сарын 08

МАНАЙ ЛОМБЫН НЯМАА БАГШ БОЛ МЭДЛЭГ, ЯЛАНГУЯА СЭТГЭХУЙН АСАР ТОМ ЕРТЕНЦ ШУУ ДЭЭ!!!! НАМАЙГ БАРУУН 8 ЖИЛД ХЭСЭГХЭН АЖИЛЛАХАД ( 1983.11-1984.02) 40 ГАРУЙ УЛСЫН ОЮУТНУУДТАЙ ХАМТ СУРЧ БАЙСАН НАДААС Л ИЛУУ ДЭЛХИЙ ЕРТЕНЦИЙГ ”. АЛГАН ДЭЭРЭЭ” ТОЛЬДОН ХАРДАГ МЭТ Л ААШЛАНА ШУУ ДЭЭ!!! МУНДАГ АА, БИДНИЙ БАГШ!!!! АЙМГИЙН ТЕВД Л ЛАВ НЯМАА БАГШ ШИГ ТИЙМ ОНЦГОЙ ОЮУНТАЙ НЬ ЛАВ Л БАЙГААГУЙГ БИ БАТТАЙ ХЭЛНЭ. ТУН ЧИГ СОНИН УЗЭГДЭЛ ШУУ ДЭЭ!!! БАХАРХМААР. ОДОО Ч ГЭСЭН БИ ЭНЭ ТУХАЙ ХААЯА БОДНО ШУУ. ТА МИНЬ УРТ САЙХАН НАСЛААРАЙ. ТАНТАЙГАА УДАХГУЙ УУЛЗАЛДАЖ НЭГ САЙХАН ” ФИЛОСОФИ”ДОНОО. ПУРЭВДАГВЫН ЭРДЭНЭХУЯГААС

0  |  0
z(202.70.43.74) 2015 оны 10 сарын 08

Nymaa bagshdaa eruul enhiig husye Bidniig baga baihad manai surguuliin hicheeliin erhlegch zahiralni Namdaldagva bagsh bailaa saihan sain bagsh nar shuu Ta nartaa az jargal ene horvoogiin hamgiin sain saihan urt naslahiig husye

0  |  0
2222(43.242.242.51) 2015 оны 10 сарын 08

Гайхамшигтай хүн шүү. Аз жаргал хүсье

0  |  0
Top