Дараагийн Ерөнхий сайд С.Эрдэнэ гэв үү

Ийм нэгэн “бор шувуу” ордон дотуур нисээд эхэлчихэж. Өнгөрсөн долоо хоногт УИХ-ын чуулганаар төсвийн тодотголын эхний хэлэлцүүлгийг хийж, гишүүдийн зүгээс ихээхэн шүүмжлэл өрнүүлэв. Төсвийг хөрсөндөө буулгах гэсэн Сангийн сайдын хичээл зүтгэлээс бодит алдагдал хэд байгааг сонссон хүмүүс Засгийн үйл ажиллагааг асар их шүүмжлэв. Энэ бүх шүүмжлэл эцэстээ нөгөө л Ч.Сайханбилэг Ерөнхий сайдад хариуцлага тооцох ёстой гэсэн хандлагыг олон нийтэд өглөө. Тэгээд ч Засгийн газрыг огцоруулах олон шалтгаан үүсээд байгаа гэхэд болно.

Тэгвэл энэ үймээнийг улам дэврээж, улс төрд халуухан өдрүүдийг эхлүүлж мэдэх нэгэн мэдээлэл ордноос түгэж байгаа нь дараагийн Ерөнхий сайд бол Хүн, амын хөгжил, нийгмийн хамгааллын сайд С.Эрдэнэ гэсэн мэдээлэл юм. Тэр  ч байтугай С.Эрдэнийн Засгийн газрын хар зураг хэдийнэ гарчихсан гэх. Тухайлбал, Засгийн газрын Хэрэг эрхлэх газрын дарга нь УИХ-ын даргын зөвлөх А.Гансүх байх гэнэ.

Тиймдээ ч Шийдлийн Засгийн газрыг огцоруулах гол сценарыг УИХ-ын дарга З.Энхболд МАХН-ын дарга Н.Энхбаяртай хамтран бичиж буй. Тэд ирэх арваннэгдүгээр сард энэ Засгийн газрыг унагана гэсэн мэдээллийг эх сурвалжууд мэдээлж байна. Мэдээж энэ бүхний төлөөс нь Н.Энхбаярт зориулсан Өршөөлийн хууль. Тэд Өршөөлийн хуулиас авлига, албан тушаалтын заалтуудыг авч хаяхгүй гэж улайрч, үүндээ хүрэхийн тулд Хуульзүйн байнгын хорооны даргыг томилолгүй удааж, чуулганы хуралдаанаас завсарлага авч цаг хожиж байгаа гэж болно. Энэ хэрээр Өршөөлийн хуульд нэмэлт өөрчлөлт оруулах асуудал гацаад байгаа юм.

Тэрчлэн АН-ын дүрмээр бол намын дарга нь Ерөнхий сайдын албан тушаалаа хаших ёстой. Гэтэл одоо өөр, өөр хүн тус албан тушаалуудад эзэн сууж байгаа. Тэгэхээр З.Энхболд Ерөнхий сайдаа ч намын даргаа ч авах их холын санаархалтай байгаа талаар улс төрийн хүрээнийхэн ярьж байна.

 Ерөнхийдөө замаа засчихсан учраас одоо Засгийн газрыг унагах амархан болсон биз. Үндсэн хуулийн цэцийг 150 сая төгрөгийн үнэтэй “Lexus 570” машин болон 300 гаруй сая төгрөгөөр хахуульдсан баримттай, нотолгоотой хэрэгт унаад буй Засгийн газар одоо тун ярвигтай байдалд орчихлоо. Дээрээс УИХ-ын гишүүн Г.Уянга Дубайд үзэглэсэн “Оюутолгой”-н гэрээний асуудлаас болж Ерөнхий сайд Ч.Сайханбилэгийг огцруулах тогтоолын төсөл боловсруулаад гишүүдийн гарын үсгийг цуглуулаад эхэлчихсэн. Уг бичигт нь нийт 11 гишүүн гарын үсэг зурчихсан байгаа. Одоо нэмээд 8 гишүүн гарын үсэг зурчихвал Ерөнхий сайдыг огцруулах эрх зүйн боломжтой болно. Мөн О.Баасанхүү гишүүний “шүд сугалах” ажиллагаа байна.  Дээр нь  МАХН-ын дарга Н.Энхбаяр “МҮАН-ыг МАХН-тай нэгд, М.Энхсайханыг намын даргын суудлаа Н.Батцэрэгт өг” гэх мэтчилэнгээр бужигнуулаад байгаа. Үүнд нь М.Энхсайхан дургүй байгаагаа илэрхийлсэн. Энэ байдал даамжирсаар “Шударга ёс” эвсэл задарвал нөхцөл байдал мөн л Ерөнхий сайдын эсрэг эргэнэ гэсэн үг.

Энэ мэтчилэнгээр Засгийг огцоруулах гэсэн санаархал бүхий хүчнүүд өнгөрсөн өдрүүдэд улам л олширлоо. Тэр ч байтугай намын нөхөд нь ч Ерөнхий сайдаа хамгаалахгүй бололтой. “Засаг огцорох эсэхээ өөрсдөө шийднэ биз” гэсэн хүйтэн хөндий үгийг намын Ерөнхий нарийн бичгийн дарга нь хэвлэлээр дайв. Ийнхүү улс төрд халалт үүсгэж, улсын эдийн засаг нам унасан энэ үед дахин нэг хэрэггүй бужигнаан төр засагт үүсч магадгүй болоод байна.