Ч.Сайханбилэгийг огцоруулбал АН нэр хүндээ нэг мөсөн сэгсэрнэ

Энэ намрын халуун сэдвүүдийн нэг нь Ерөнхий сайд Ч.Сайханбилэгийг огцруулах, эс огцруулах тухай болоод байна. АН-ыг засаглаж чаддаггүй хэмээн ярьдаг. Угтаа энэ намыг эрх барьж байх үед Засгийн газар нь хамгийн тогтворгүй байдаг. Эрх барьж байсан 4 жилийн хугацаандаа Засгийн газраа дөрвөнтөө огцруулж байсан гашуун түүх энэ намд бий. Чухамдаа үүнээс нь залхсан сонгогчид АН-ыг томоожихыг хүлээж 20 шахам жил дангаар эрх барих эрхийг нь өгөөгүй билээ. Харин 2012 оны сонгууль удаан хүлээсэн боломжийг нь энэ намд эргүүлэн өгсөн.  Гэхдээ тэд урьдах явдлаасаа ухаажаагүй хэвээрээ байна.

Мөнөөх фракци хоорондын зөрчилдөө хөтлөгдсөн, байгуулсан Засгаа унагахын тулд хүний өөрийн хэнтэй ч эвсэж чаддаг, хэсэг бүлгийн эрх ашгийг улсынхаас дээгүүр тавьдаг нь яг янзаараа байна. Н.Алтанхуягийн Засгийн газрыг сөрөг хүчинтэйгээ хавсарч унагаснаар энэ нам нэр хүндийнхээ хүүдийг эргүүлж сэгсрэх дээрээ тулаад байна. Н.Алтанхуягийн үед тус намын рейтинг МАН-аас 5 хувь дээгүүр байсан бол одоо МАН нийгэм дэх үнэлэмжээрээ АН-ыг гүйцэж түрүүлчихээд байна. Энэ бол сонгуулийн оноог хасах айхтар нөхцөл байдал гэсэн үг.   

Олны яриагаар ирэх 11 дүгээр сард Ч.Сайханбилэгийг огцоруулах асуудал үндсэндээ шийдэгдчихсэн гэх. Одоо ч Ерөнхий сайдыг огцоруулах гарын үсэг цуглуулж буй. Лавтайяа огцоруулах бичигт УИХ-ын 11 гишүүн гарын үсэг зураад байгаа гэсэн. Ч.Сайханбилэгийн өөрийнх нь намын журмын нөхөр Р.Амаржаргал хүртэл гарын үсгээ зурчихсан байгаа. Одоо найман гишүүн гарын үсаэг зурчихвал энэ асуудлыг УИХ-д өргөн барина. Ингэсэн тохиолдолд Ерөнхий сайдын огцрох зам нь бараг шуударчихлаа гэсэн үг.  Тэгээд ч Ч.Сайханбилэгийг тонгорох бэлэн зэлэн шалтгаан байгаа. Тэр нь Дубайн гэрээ. Хоёр хоногийн өмнө Засгийн газрын өгсөн мэдээллээр бол Оюутолгойгоосоо монголчууд 2037 он хүртэл ногдол ашиг хүртэхгүй гэнэ. Уг нь өмнөх гэрээ ёсоор 2023 оноос ашгаа хүртэж эхлэхээр байсан юм. МАХН-ынхан энэ “сахил хүртээд шал дордсон” гэрээний гол буруутнаар Ч.Сайханбилэгийг нэрлэж байгаа.  Ер нь түүнийг буруутгах шалтгаан мундахгүй.  Хамгийн гол нь улс орны эдийн засгийн өнөөгийн нөхцөл байдал. Түүнд бас улс төрийн дэмжлэг үнэхээр дутаж байгаа.

Түүнийг огцруулах сонирхол олон хүн, тэр дундаа нам дотор нь ч хүчтэй байгаа байх. Гэхдээ юманд учир бий. Ирэх сонгууль хүртэл жил ч хүрэхгүй хугацаа үлдлээ. Ийм хэдхэн сарын настай Ерөнхий сайдын суудлын төлөө нэр нүүрээ баастах сонирхол намд нь ч, гишүүдэд нь ч уг нь баймааргүй. Эрх барих хугацаа нь сараар хэмжигдэж байгаа энэ үед АН Засгаа дахин онхолдуулбал тогтвортой засаглалыг хүсч байгаа иргэдийнхээ хүсэл зоригийн эсрэг явдал болох төдийгүй нэр хүндээ нэгмөсөн шороотой хутгахаас хэтрэхгүй байж мэднэ.  

Өчигдөр АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр хэвлэлийнхэнд мэдээлэл өгөх үеэр асуултанд хариулахдаа: “Иргэд улс төрийг, Засгийн газрыг тогтвортой ажиллахыг шаардаж байна. Ч.Сайханбилэг сайдыг огцруулахгүй. Манай нам улс орны эрх ашгийн төлөө Засгийн газрын тогтвортой үйл ажиллагааг хангаж ажиллана. Ч.Сайханбилэг Ерөнхий сайдыг огцруулна гэдэг бол Монгол Улсын эрх ашигт харш юм...Ойрын хугацаанд улс төрийг тогтворжуулахын төлөө Ардчилсан нам ажиллана” хэмээн хариулсан. 

Гэхдээ энэ үгэнд итгэхэд бэрх. Шар ордны шивэр авир яриаагаар бол Ч.Сайханбилэгийг 11 дүгээр сард огцруулна. Тэр ч бүү хэл дараагийн ерөнхий сайдаар С.Эрдэнийг нэрлэчихсэн байгаа шүү дээ. Ийм бор шувуу нисээд эхэлсэн нь цаанаа улс төрийн том зорилго, тооцоо байгааг илтгэнэ. Улс төрийн ил далд шийдлийн угтал оршил нь нэг иймэрхүү янзаар эхэлдэг дээ. Эрх мэдэл хуваарилалтын өнөөгийнх шиг тогтолцоо, зарчим үйлчилж байсан цагт Засгийн тэргүүн нь салхи хаанаас эргэнэ, тэр зүг л бөмбөрөхөөс өөр гарцгүй.