Өнөөдөр ”Болор цом”-ын эзэн тодорно

Үгийн урлагт шимтэгч, түүгээр сэтгэлээ хөглөн ариусгадаг хүн бүхэн “Болор цом” наадмын тухай сураг тавьсаар суудаг билээ. Тэгвэл Монголын зохиолчдын эвлэлээс жил бүр уламжлал болгон зохион явуулдаг шилдэг яруу найраг, шилдэг шүлэгчийг тодруулдаг утга уянгын их наадам өнөөдөр болно. Наадам хоёр үе шаттай зохиогддог бөгөөд нэгдүгээр сарын 15-наас бүртгэл эхэлсэн.  Уламжлал ёсоор наадамд оролцох хүсэлтэй яруу найрагч өөрийн хоёр бүтээлээ МЗЭ-д ирүүлснээс 33 найрагч хоёрдугаар шатанд өрсөлдөхөөр тунан үлдээд байна.

Наадмын хоёрдугаар шатны шалгаруулалт өнөөдөр  “Соёлын төв өргөө”-нд 18.00 цагт эхэлж “Болор цом”-ын эзэн тодорно. Уран зохиолыг түгээн дэлгэрүүлэх, уншигч зохиолчдыг холбох зорилгоор сүүлийн жилүүдэд орон нутагт зохиогдож ирсэн уг наадам энэ жил Улаанбаатар хотод болж буйгаар онцлогтой. 1983 онд анхлан зохиогдож 33 дахь жилдээ золгож буй тус наадмын “Болор цом”-ын эзэд болон “Болор цом” хүртсэн шүлгүүдийг нэрлэвэл

• 1983 он. Хөдөлмөрийн баатар Д.Пүрэвдорж: “Хүн төрөлхтөнд хэлэх үг”
• 1984 он. Ардын уран зохиолч Д.Цоодол: “Нэр нь тодроогүй баатрууд”
• 1985 он. Ардын уран зохиолч Б.Лхагвасүрэн: “Шагнал”
• 1986 он. Яруу найрагч Т.Очирхүү: “Чулууны магтаал”
• 1987 он. Ардын уран зохиолч П.Бадарч: “Тэмээ”
• 1988 он. Ардын уран зохиолч Т.Галсан: “Жирмийн сүлжээ”
• 1989 он. Соёлын гавьяат зүтгэлтэн Ц.Чимэддорж: “Малчин”
• 1990 он. Д.Нацагдоржийн шагналт Б.Ичинхорлоо: “Тэнгэр”
• 1991 он. Д.Нацагдоржийн шагналт Б.Ичинхорлоо: “Эх нутаг”
• 1992 он. Ардын уран зохиолч Б.Лхагвасүрэн: “Хил дээр бичсэн шүлэг “
• 1993 он. Ардын уран зохиолч Д.Цоодол: “Миний муусайн найз нар” 
• 1994 он. Д.Нацагдоржийн шагналт Ц.Хулан: “Ганцхан ижийдээ унших шүлэг”
• 1995 он. Яруу найрагч Б.Доржпалам: “Хөөрлийн шүлэг”
• 1996 он. Төрийн шагналт Д.Төрбат: “Ижий шүлэг”
• 1997 он. Ардын уран зохиолч Д.Цоодол: “Хуучин дэр модны дууль”
• 1998 он. Ардын уран зохиолч Б.Лхагвасүрэн: “Ижийтэйгээ байхад”
• 1999 он. Соёлын гавьяат зүтгэлтэн Ц.Чимэддорж: “Элсэн тасархай”
• 2000 он. Яруу найрагч Г.Мөнхцэцэг: “Янжинлхам бурханд гуйж мөргөх шүлэг”
• 2001 он. Төрийн соёрхолт Ц.Бавуудорж: “Хүрэл чоно”
• 2002 он. Д.Нацагдоржийн шагналт А.Эрдэнэ-Очир: “Зам”
• 2003 он. Яруу найрагч Д.Урианхай: “Шөнийн онгоц”
• 2004 он. Д.Нацагдоржийн шагналт Ж.Баяржаргал: “Арга билгийн ертөнц”
• 2005 он. Яруу найрагч Ж.Мөнхбат: “Бурхан хүсэл”
• 2006 он. Яруу найрагч Б.Галсансүх: “Англи хэлэнд итгэж зориулав”
• 2007 он. Яруу найрагч Ш.Лхамноржмаа: “Газрын үг”
• 2008 он. Яруу найрагч Л.Хасар: “Миний нэг өдөр ингэж санагдаад...”
• 2009 он. Яруу найрагч Х.Эрдэнэбаатар: “Нэргүй шүлэг”
• 2010 он. Д.Нацагдоржийн шагналт Ц.Хулан: “Би-Цагаан Дарь эх”
• 2011 он. Яруу найрагч Д.Болдхуяг: “Монгол хэл”
• 2012 он. Яруу найрагч Н.Гантулга: “Уулсын сэтгэлгээний тэлэлт “
• 2013 он. Яруу найрагч Л.Моломжамц: “Хэзээ ба хожмыг өгүүлэх зангирмал үгс”
• 2015 он. Б.Мягмаржав “Реквием” шүлгээр тус тус “Болор цом” хүртэж байжээ. Харин 2016 оны шилдэг найрагч өнөөдөр тодорно.