Хөдөлмөрчдийн дуу хоолойг төрд хүргэх жагсаал хийнэ

Монголын үйлдвэрчний эвлэлийн холбоо өнөөдөр мэдээлэл хийлээ. Хэвлэлийн хуралд МҮЭ-ийн холбооны ерөнхийлөгч Х.Амгаланбаатар болон бусад гишүүн байгууллагуудын төлөөлөл оролцсон юм.

Энэ бүтэн сайн өдөр Олон улсын хөдөлмөрчдийн эв санааны нэгдлээ илэрхийлдэг өдөр тохионо. Хуучнаар “Майн нэгэн” хэмээн монголчуудын нэрлэдэг байсан энэ өдөр МҮЭ-ийн холбоо хөдөлмөр нийгмийн хамгааллын тодорхой асуудлаар үзэл бодлоо илэрхийлж Чингисийн талбайд жагсаал хийхээр төлөвлөжээ. Өнгөрсөн оны арванхоёрдугаар сарын 3-ны өдөр гаргасан цалин нэмэгдүүлэх тухай УИХ-ын 108 дугаар тогтоолын хэрэгжилтийг УИХ, Засгийн газраас шаардаж, хөдөлмөрчдийн дуу хоолойг төрд хүргэх юм байна.