УИХ-ын гишүүн асан М.Батчимэг АН-ын дарга болох гэнэ

Орон нутгийн сонгуулийн дараа улс төрийн хүрээнд нэгэн том үйл явдал өрнөнө. Энэ нь Ардчилсан намын дарга хэн болох вэ гэдэг марафон юм. Тэгвэл одоогийн байдлаар тус намын даргад санаархаж буй маш олон хүн байгааг эх сурвалжууд хэлж буй. Ерөнхийлөгч Ц.Элбэгдоржийн зүгээс П.Цагааныг намын дарга ил цагаан дэмжиж буй бол Х.Баттулга, З.Энхболд нарын зүгээс Д.Эрдэнэбатыг зүтгүүлж байгаа гэх. Харин Н.Алтанхуяг хэн нэгнийг даргаар өргөмжлөхөөс илүү өөрөө дахин намын дарга болох хүсэл тээж яваа. Р.Амаржаргал, Ж.Батзандан, Л.Гантөмөр нарын хүмүүс ч намаа тэргүүлэх сунгаанд нэлээн нэр дээгүүр цогиж яваа билээ. Тус намын Үндэсний зөвлөлдөх хорооны хурлаар хэнийх нь нэр цойлж гарч ирэхийг одоогоор таах боломжгүй ч хамгийн боломжтой гэх хувилбар одоо хүртэл алга байгаа нь нууц биш. АН-ын хувьд шинэчлэлийг хэрэгжүүлэх даргыг сонгоно гэсэн олон нийтийн хүлээлт байгаа хэдий ч одоогийн нөхцөлд олон фракцуудын бүгдийнх нь эрх ашгийг төлөөлж чадах, эв эеийг сахиулах хэн нэгэн хэрэгтэй байгаа нь бодитой үнэн юм. Тэгвэл дээр нэр дурьдсан эрхмүүдийн хэн нь ч энэ шалгуурт тэнцэхгүй. Тэд тус тусын фракц, эрх ашгийг төлөөлж таарна. Хотын мэр асан Э.Бат-Үүлийн нэр энэ тохиолдолд хамгийн хүчтэй, боломжтой нь байсан ч тэрээр С.Зоригийн амь насыг хөнөөсөн хэрэгт нэр холбогдсон учраас энэ удаад өрсөлдөөний гадна үлдэх болов уу.

Ийм дүр зураг өрнөж байх агшинд нэгэн содон мэдээлэл улс төрийн хүрээнд дуулдаж эхэллээ. Энэ нь УИХ-ын гишүүн асан М.Батчимэг АН-ын даргын марафонд нэрээ дэвшүүлсэн тухай мэдээлэл юм. Эмэгтэй хүний хувьд өнөөгийн АН-д үүсээд буй үл ойлголцол, эвдрэлцлийг хамгийн эергээр шийдэж чадах хувилбар гэж тэр өөрийгөө үзжээ. Хэрвээ түүний хүсэл биелсэн тохиолдолд АН түүхэндээ анх удаа эмэгтэй даргатай болж магадгүй байна. 

Д.Дамдинжав