“Дэлхийн оюуны олимп”-ийг манай тамирчид хүрэл медалиар эхлүүллээ

АНУ-ын Лас Вегас хотноо өчигдөр эхэлсэн “Memoriad-2016 World Mental Olympics” буюу Оюуны олимпид “Монголын оюун ухааны академи”-ийн тамирчид өрсөлдөхөөр хүлгийн жолоо залсан билээ. Тэдгээр тамирчид  дэлхийн 27 орны 167 тамирчидтай оюун ухаанаа сорин өрсөлдөх бөгөөд эхний тэмцээнүүддээ амжилт гаргаж, медалийн буухиаг эхлүүлсэн тухай эх сурвалж мэдээллээ.

Тодруулбал хамгийн эхний төрөл болох “Хурдны хөзөр”-т Олон улсын хэмжээний мастер Т.Энхжин хүрэл медалийн болзол хангаж, медалийн салхийг хагалсан байна. Тэрбээр нэг багц буюу 52 ширхэг хөзрийг 27 секундэд дарааллаар нь тогтоон алдаагүй нэрлэж ийнхүү хүрэл медаль хүртсэн юм. Үүгээр ч зогсохгүй тус төрөлд 27 улсын 167 тамирчин өрсөлдснөөс 12 байрын 8-ыг нь манай тамирчид эзэлжээ.

О.Туяа