Н.Алтанхуягийн амь ДЭЭСЭН ДӨРӨӨН ДЭЭР ДЭНЖИГНЭЖ БАЙНА

Ерөнхий сайд асан Н.Алтанхуяг тун саяхан АТГ-т сэжигтнээр дуудагдаж, мэдүүлэг өгсөн билээ. Түүнийг Шинэчлэлийн Засгийн газрын тэргүүн байсан цагаас "Нүүрс" хөтөлбөрөөс эхлээд нэлээд асуудал дагах болсон. Энэ нь түүний туслах болон ойр дотныхныг шоронд хорих хэмжээнд хүрнэ чинээ хэн санах билээ. Энэ асуудал зүгээр нэг хэрэг биш. Н.Алтанхуягийн хэлээд байгаа шиг улс төрийн хэлмэгдүүлэлт юм бол энэ бүхний цаана чухам хэн байгаа вэ? 

Тэрбээр “Ерөнхийлөгчид нэр дэвшинэ гээд хэлчихсэн чинь нэлээн үйл явдал өрнөх юм шиг байна. Мөн саяхан нэвтрүүлгээр ороод Монголын нийгэмд болохгүй байгаа зүйл, түүн дотор цөөн хэдэн хүн улсын хамаг баялгийг сорчлоод, завшаад байна гээд хэлчихсэн чинь манай Ц.Элбэгдорж болон түүний бүлэглэл их л амь тавьж байгаа бололтой.

Цөөхөн хоногийн дотор гурав, дөрвөн эмэгтэйг шоронд хийлээ.

Би өнгөрсөн дөрөвдүгээр сард манай Ерөнхийлөгч ба тэдний бүлэглэлийн бий болгочихсон хууль хяналтын байгууллага дотор хонгил байдаг гэж хэлж байсан. Тэр хонгил руу гаа шахаж оруулах гэж намайг их олон жил оролдож байна. Ерөнхий сайд байх цагаас минь эхлээд хэрэг төвөг элдэв зүйлээр худал үнэн, зохиомол хэрэг үүсгэдэг. Тэгээд миний ойр хавийн хүмүүсийг барьж хийгээд тэд нартай холбогдуулж зохиомол хэрэг оруулж байгаа байх. Надад айж ичих зүйл байхгүй. Үнэн хэзээд ялна гэж итгэж байна” хэмээсэн юм.

Өнгөрөгч дөрөвдүгээр сард тэрбээр Төрийн ордонд хийсэн мэдэгдэлдээ “Монголын ард түмний баялгийг хуйвалдан мөлжиж, хүчирхэгжсэн бүлэглэл Монгол Улсыг маань хувааж эзэмших увайгүй оролдлого хийж байгаа нь “БИТГИЙ ДАВАР” гэж хэлэх цаг бий болголоо.

Буруу замаар будаа тээвэл буцахдаа шороо тээдэг гэх ардын үг бий. Энэ бүхнийг удирдан зохион байгуулж байгаа хүний нэгийг би өнөөдөр нэр цохон хэлье. Хүн бүхэн түүнийг мэдэж байгаа ч хэн ч зориглон хэлж чаддаггүй. Яагаад гэвэл тэр хүмүүсийн үүсгэн байгуулсан шударга бусын хонгилоос айдаг.

Монгол Улсынхаа эрх ашгийн төлөө хэлэх нь зүйтэй гэж үзлээ. Тэр хүн бол шударга байцгаая гэж гарч ирсэн Монгол Улсын Ерөнхийлөгч Ц.Элбэгдорж юм. Ерөнхийлөгч Ц.Элбэгдорж болон түүнтэй үгсэн хуйвалдагч, төрөөс төрсөн тэрбумтны бүлэглэл энэ мэдэгдлийн араас ашиг хонжоогоо хувааж чадахгүй арсалдаж байгаа амин найзуудтайгаа намайг хамаатуулаад “Авлигатай тэмцэх амаргүй ажил юм байна” гэж, энэ ажилд нь саад үзүүлж буй мэтээр ард түмнээсээ тусламж хүсч жүжиглэнэ гэдэгт би огтхон ч эргэлзэхгүй байна. Миний өнөөдрийн мэдэгдэл амь нас, ойр дотны хүмүүст минь аюултай ч гэсэн айх зүйл алга. Ардчиллаа хамгаалж үлдэх цаг ирсэн” гэж байв.

ХЭРЭГ ХААНААС ЭХЛЭВ

Тэрхүү мэдэгдлээс хойш найман сарын дараа Н.Алтанхуяг АТГ-т дуудагдаж буй нь энэ юм. Энэ хугацаанд түүний ойр дотны дөрвөн ч хүнийг шоронд хориод байгаа билээ. 2012 оны сонгуульд Ардчилсан нам ялалт байгуулж Н.Алтанхуягийг Шинэчлэлийн Засгийн газрын тэргүүнээр томилсон. Хоёр жил гаран ажиллуулаад түүнийг МАН-ын бүлгийн санаачлагаар огцруулж, оронд нь Ч.Сайханбилэгийг Ерөнхий сайдын суудалд залсан байдаг. Н.Алтанхуягийг суудлаас нь огцруулахад Ардчилсан намын нэр бүхий 10 гишүүн нууцаар санал өгсөн гэлцдэг юм билээ.

Энэ бүхэн Шинэчлэлийн Засгийн газрын авч хэрэгжүүлсэн “Нүүрс” хөтөлбөрөөс эхлэлтэй. Жилээс жилд шуудайных нь хэмжээ багасах хэрнээ үнэ нь өсөх нүүрсний өртгийг хямдруулах, хүртээмжийг нь нэмэгдүүлэх үүднээс “Шинэчлэлийн” хэмээх тодотголтой Монгол Улсын Засгийн газар “Нүүрс” хөтөлбөрийг хэрэгжүүлсэн. Энэ хөтөлбөрийн талаар Засгийн газрын ямар нэгэн  тогтоол, шийдвэр гаргаагүй гэх хүмүүс байдаг.

Гэхдээ Монгол Улсын Засгийн газрын гишүүн, Эрчим хүчний сайд асан М.Сономпилийн 2012 оны есдүгээр сарын 26-ны өдөр гаргасан Ажлын хэсэг томилох тухай 13 тоот тушаал цагаан дээр хараар бичигдсэн байдаг.

Ажлын хэсэг юуны өмнө тухайн үеийн зах зээлийн ханшийг судалж, ямар дамжлагаар, хэрхэн хүргэвэл эцсийн хэрэглэгчдийн гарт хамгийн ойр бас хямд байх вэ гэдгийг тооцоолон, сарын дараа Ерөнхий сайд Н.Алтанхуягт танилцуулсан байна. Үүний дараа Ерөнхий сайд асан Н.Алтанхуяг 2012 оны 10 дугаар сарын 23-ны өдөр Багануурын уурхайд ажилласан байдаг.

Иинхүү “Нүүрс” хөтөлбөр 2012 оны 11-р сараас эхлэн тэр өвөлдөө 100 мянган тонн, дараагийн жилд 180 мянган тонн гээд нийт 280 мянган тонн нүүрсийг Улаанбаатарын гэр хорооллын оршин суугчдад нийлүүлжээ.

ХОХИРОГЧ-1

Н.Алтанхуягийн санаачилсан “Нүүрс” хөтөлбөрийг түүний ахлах зөвлөх Л.Гансүх хариуцан ажиллаж байв. Гэхдээ Шинэчлэлийн Засгийн газрын үйл ажиллагаа эхлээд хоёр дахь жилтэйгээ золгож байхад Н.Алтанхуягийг огцруулах тухай яриа Саарал ордноор “нисэлдэв”. 2015 онд  Н.Алтанхуягийн ахлах зөвлөх асан Л.Гансүхийг “Албан тушаалаа урвуулан ашиглаж, улсад онц их хэмжээний хохирол учруулсан” хэмээн буруутгаж, 4.6 жил хорих ялаар шийтгэсэн. Дээр нь улсад учруулсан гэх 3,6 тэрбум төгрөгийн хохирлыг барагдуулах ёстой. Мөн төрийн албанд ажиллах эрхийг нь дөрвөн жилээр хассан билээ. Энэ хэргийг Л.Гансүх ингэж тайлбарлажээ.

“2014 оны тавдугаар сарын 9-нд сонинд “Ерөнхий сайдын ахлах зөвлөх Л.Гансүх Монгол улсын хилээр оргон зугтжээ” гэсэн мэдээлэл гарсан. Утга нь Прокурорын байгууллагын эх сурвалжаар “Л.Гансүх охин Цэрэнжагзангийн удирддаг компаниар, тендергүйгээр иргэдэд нүүрс нийлүүлээд, ихээхэн ашиг олсон нь баримтаар нотлогджээ. Мөн улсыг 854 сая төгрөгөөр хохироогоод, АТГ хэрэг үүсгээд шалгаад эхэлмэгц оргон зугтжээ” гэсэн. Энэ нь хугацааны хувьд Х.Тэмүүжин сайдыг огцруулах болон алдарт “Дан дээл, давхар дээлийн асуудал” хэлэлцэж байх үе юм. Энэ мэдээлэл гарснаар Ерөнхий сайдын ахлах зөвлөх авлигачин болсон.

Иймээс Н.Алтанхуягийг “муухай” гэж харагдуулах, “Дан дээл, давхар дээл, Х.Тэмүүжин сайдыг огцруулах гэх мэт “хэрэг”-үүд АТГ-ыг “гар хөлөө” болгож байгаа улсуудын хүссэнээр шийдэгдэхэд хэрэгтэй байжээ. (тэр үед би гүтгэлгийг АТГ зохиосон гэж бодоогүй) Уг нь би бүр дөрөвдүгээр сарын 24-нд Солонгос яваад хагалгаанд ороод эмнэлэгт байсан бөгөөд намайг явах хүртэл манай ажлаар болон гэрээр ямар нэгэн зарлан дуудах ирээгүй юм.

Тухайн моментонд дээрх үйл явдлуудад нөлөөлөхийн тулд намайг ирэхийг хүлээлгүй маш их яарч ийм мэдээлэл гаргасан байжээ. Ингээд тавдугаар сарын 20-нд би Монголд ирэхэд анхны зарлан дуудах ажлын хаягаар Засгийн газрын Хэрэг эрхлэх газрын дэд даргын нэрээр ирээд, тавдугаар сарын 26-ны өдөр сэжигтнээр татах тогтоол гарсан.

Хамгийн сонирхолтой нь намайг сэжигтнээр татах тогтоолын бичвэр сонин дээр гарсан текстээр бичигдсэн байвал яах уу.

Надаар гадаад явахгүй байх баталгаа гаргуулан хоёр хүнээр батлан даалт хийлгүүлээд хуулийн дагуу гадуур байцаахаар таслан сэргийлэх арга хэмжээ авсан. Би ч хэрэг хийгээгүй учраас хуулийн дагуу шалгуулаад учир нь олдоно гэж бодсон.

Араас нь харахад тэр үед АТГ-ынхан намайг албан тушаалаа ашиглан ямар ч шийдвэр гаргах эрхгүй, оргож зугтаагаагүй ,”Нүүрс” хөтөлбөр хэрэгжих хоёр жилд миний охин Монголд байгаагүй, миний охин энэ компанид хувь эзэмшдэггүй, хөтөлбөрийг хэрэгжүүлэхэд улсаас нэг ч төгрөг гаргаагүй учраас тендер зарлах хэрэггүй, 800 гаруй сая төгрөгийг Гансүх аваагүй гэдгийг мэдэж байсан гэж бодож байна. Өөрөөр хэлбэл, намайг ямар ч хэрэг хийгээгүйг мэдэж байсан. Тухайн моментонд л “хэрэг” захиалагчдад нь хэрэгтэй байсан учраас яаруу сандруу энэ зохиолыг зохиосон” хэмээн тэрээр хэд, хэдэн тодорхой үндэслэлээр өөрийгөө буруугүй гэдгийг нотолсон байна.

Хөтөлбөр хэрэгжих хоёр жилийн хугацаанд нэг ч удаа санхүүгийн тайлан зөрж байгаагүй, Багануур ХК ямар ч алдагдалгүй ажиллаж байсан гэдгээ удаа дараа мэдэгдсэн. Гэвч шүүгч, эрх мэдэлтнүүд сонсохыг хүссэн зүйлээ сонсож, хэлэхийг хүссэн зүйлээ л хэлж байлаа.

ХОХИРОГЧ-2

Мөн энэхүү “Нүүрс” гэх тодотголтой хэрэгт нэгэн нягтлан бодогч бүсгүй холбогдсон нь Б.Мөнгөнтуяа юм. Тэрбээр “Эм Жи Эл Эс Би” компанид Ерөнхий нягтлан бодогчоор ороод хоёр жил гаруй болсны дараахан АТГ-аас түүний ажил, гэрийг нэгжиж, цагдан хорьжээ.

Б.Мөнгөнтуяагийн ажилд орох, “Нүүрс” хөтөлбөр хэрэгжиж эхлэх хугацаа хоёр давхцсан. Харамсалтай нь Б.Мөнгөнтуяагийн шинэ ажил, “Нүүрс” хөтөлбөр хоёр хоёулаа эмгэнэлтэйгээр төгссөн юм.

Тэрбээр суллагдсаныхаа дараа “Ер нь шүүх хурал болтол юунд яллагдаад хоригдоод байгаагаа ч ойлгоогүй. Шүүх хурал дээр ямар хэрэгт холбогдоод байгаагаа ойлгож эхэлсэн гэхэд болно. Намайг зургаан сар хоригдож байх хугацаанд аав, ээж, нөхөр маань маш хүнд байдалтай байсан. Манай аав дээд боловсролтой сэхээтэн хүн байдаг юм. Охиноо хоригдож эхэлсэн цагаас хойш Монгол Улсын хууль хяналтын бүх байгууллагад өргөдөл гомдол гаргасан байдаг. АТГ-ын шат шатны дарга нар, Хууль зүйн яам, сайд, прокурорын газрын шат шатны дарга нарт, Ерөнхий сайд, Монгол Улсын Ерөнхийлөгч Ц.Элбэгдоржид хүртэл намайг хууль бусаар хоригдож байгаа үндэслэлүүдийг хууль зүйн тайлбартай нь хүргүүлж, хууль бусаар цагдан хоригдож байгаа учир суллаж өгөх хүсэлтийг өгсөн байдаг. Харамсалтай нь хаашаа ч хандах боломжгүй болсон байсан. Ямар ч арга зам байхгүй. Өөрөө гарахын тулд худлаа ярилтай нь биш гүрийгээд л зургаан сар найм хоносон. Яах гээд байгаа нь мэдэгдэхгүй хоригдож байгаад Шинэчлэлийн Засгийн газар огцорсон шөнө буюу арваннэгдүгээр сарын 5-ны шөнө ажлын цаг дуусчихсан байхад сулласан. Цагдан хорих төвөөс гарсны дараа найм хоног хэтрүүлж хорьсон байсан” хэмээсэн.

Түүнийг хорих болсон шалтгаан өнөөх л “Нүүрс” хөтөлбөрөөс “мөнгө идсэн” хэрэг. Суллагдахдаа Багануур ХК-д 800 сая төгрөг, Төрийн албан хаагчийн эрх мэдлээ урвуулан ашигласан гэсэн үндэслэлээр 19 сая 200 мянган төгрөгийн торгууль төлөх болжээ. Гэхдээ тэр төрийн албан хаагч биш, зүгээр л хувийн компанийн нягтлан бодогч байсан шүү дээ.

“Нүүрс” хөтөлбөртэй холбоотой хэргийг сөхөж үзвэл энэ мэт ойлгомжгүй зүйлс олон гарч ирнэ. Шинэчлэлийн Засгийн газар огцордог шөнө Б.Мөнгөнтуяаг сулласан нь улс төрийн ямар нэгэн явуулга байсан байж магадгүй гэх хардлага олон хүнд төрсөн.

ХОХИРОГЧ-3

Гурав дахь хохирогч бол Н.Алтанхуягийн төрсөн охин А.Саранзаяа. Тэрээр  “Цэвэр агаар” санд мэргэжилтэн хийдэг байсан бөгөөд захирал асан Н.Хүрэлсүх, нягтлан бодогч Н.Хулан нарын 11 хүнийг бичиг баримт хуурамчаар үйлдэж, хуурамч гэрээ хийж 2,2 тэрбум төгрөг завшсан байж болзошгүй гэсэн үндэслэлээр АТГ шалгаж, холбогдох хэргийг Дүүргийн эрүүгийн хэргийн анхан шатны I шүүх 2014 оны хоёрдугаар сард хэлэлцэж, гэм буруутай нь тогтоогдсон найман хүнд 1-8 жилийн хорих ял оноож, улсад учруулсан хохирлыг нь төлүүлэх, тодорхой хэмжээний хөрөнгө хураах ял оноосон.

А.Саранзаяаг холбогдуулан шалгаж байсан ч түүнтэй холбоотой хавтаст хэргийг АТГ-аас прокурорт шилжүүлэн хянаад гэмт хэргийн бүрэлдэхүүнгүй гэсэн үндэслэлээр хэргийг хэрэгсэхгүй болгосон байдаг.

ХОХИРОГЧ-4

Ерөнхий сайд асан Н.Алтанхуягийг огт алдаагүй гэж хэлэхгүй. Түүнд том алдаа бий. Дөнгөж сургуулиа төгссөн залууд итгэл хүлээлгэн 2008 оноос хойш хамтарч ажиллаж, өөрийнхөө ахлах зөвлөхөөр хүртэл томилсон. Дараагаар нь 2012 онд намаа сонгуульд ялсны дараа өөрөө Ерөнхий сайд болж, Г.Дэнзэнг ЗГХЭГ-ын дэд даргаар томилсон байдаг. Чухам тэр үеэс Н.Алтанхуягийг “өргөс” гэж хардаг хүмүүсийн нүдэнд хамгийн амархнаар тонгорчих боломжтой субьект нь Г.Дэнзэн байв. Залуухан, төрийн томоохон албан тушаалд “сайн ах”-ын хүчээр очсон тэр бол Н.Алтанхуягийн “сул тал” байсан. Үүнийг хашир хүмүүс андахгүй шүү дээ. Нэг үгээр хэлбэл, Н.Алтанхуягийг унагах бэлээхэн олз гэсэн үг юм. Олон нийт, мэдээллийн хэрэгслээр шуугиад байсан шиг Г.Дэнзэн Н.Алтанхуягийн хүргэн байсангүй. Н.Алтанхуяг дүүгийнхээ охиныг зөвлөхөөр ажиллуулсан нь хожим Г.Дэнзэнгийн эхнэр болох хувьтай байж л дээ.

УИХ-ын гишүүн Н.Амаржаргал Ч.Сайханбилэгийг Ерөнхий сайдаар томилогдсоны дараахан “Н.Алтанхуяг хэтэрхий зөөлөн. Сайдуудаа хуралдаа суухыг гуйдаг. Өнөөдүүл нь үгэнд нь ордоггүй. Би түүнд хэлж л байсан. Жаахан хатуу бай гэж” хэмээн ам алдсан удаатай.

Н.Амаржаргалын үгнээс харахад Н.Алтанхуяг улс төрд “хэт зөөлдсөн” бололтой. Гэтэл түүнийг унагахын тулд бүх л бүтэн хууль хяналт, улсын байгууллага яагаад хөдлөх болов гэдэг нь бүр ч сонин. 

Г.Дэнзэнг 2015 оны тавдугаар сард  АТГ-аас баривчилсан. Түүнийг Эрдэнэс Таван толгойн ТУЗ-ийн даргаар ажиллаж байхдаа эхнэрийнхээ нэр дээр байдаг“Говь повер” компанийг тендерт ялуулж, 17 тэрбум төгрөг өгсөн гэх асуудалд буруутгаж буй. 2014 оноос эхтэй энэ хэрэг өнөөдрийг хүртэл шийдвэрлэгдэлгүй, үргэлжилсээр л байна. Өнгөрсөн хугацаанд Г.Дэнзэнг хоёр ч удаа саатуулж, нэг удаа батлан даалтад гаргаад байв. Хамгийн сүүлд Г.Дэнзэнг гадуур байцааж байгаад өнгөрсөн есдүгээр сарын 29-ний өдөр дахин саатуулсан. Г.Дэнзэнг үргэлжлүүлэн хорих эсэхийг шийдэх шүүх хурал энэ оны 11-р сарын 24-ний өдөр болж, шүүхээс түүний цагдан хорих хугацааг нэг сараар сунгаж, мөрдөн байцаалтын ажиллагааг үргэлжлүүлэхээр болсон.

БИ ЕРӨНХИЙЛӨГЧИЙН СОНГУУЛЬД НЭРЭЭ ДЭВШҮҮЛНЭ

Уншигч та анзаарсан бол дээрх дөрвөн хохирогчийн хэрэг Н.Алтанхуягийг Шинэчлэлийн Засгийн газрын тэргүүнээр ажиллаад хоёр жил болсны дараагаар буюу огцрох асуудал яригдаж байх үед тохиосныг мэдсэн байх.

2014 оны 11-р сард Н.Алтанхуягийг Ерөнхий сайдын суудлаасаа огцроход дахин өөр хүн хэлмэгдэх шаардлагагүй боллоо гэж олон нийт таамагласан. Тэрээр Сайдын суудлаасаа огцорч гишүүн байх хугацаандаа дуугарах үедээ дуугарч, хэлэх үедээ хэлсээр л байлаа. Гэвч түүний хүч улам доройтсоор байсан юм. 2016 оны сонгуулийн өмнө буюу дөрөвдүгээр сард тэрээр нэгэн ноцтой мэдэгдлийг Төрийн ордонд хийсэн. Анх удаа Ерөнхийлөгч Ц.Элбэгдоржийг олон нийтийн өмнө, хэвлэл мэдээллээр “Шударга бусын хонгилын ХААН” хэмээн зарласан. Үүний араас ирэх дарамт, шахалтаас айхгүй байгаагаа ч мөн дуулгасан юм. Н.Алтанхуяг айгаагүй байж болох ч эргэн тойрныхонд нь  тийм ч таатай санагдаагүй байх. Тэрээр Сайдын суудлаа асар өндөр үнээр өгсөн шүү дээ.

2016 оны УИХ-ын сонгууль болж Ардчилсан нам бараг л сүйрэв. УИХ-ын 76 суудлын ердөө ес нь л тэднийх болсон юм. Энэ нь Ардчилсан намын хувьд асар том цохилт, асар том хагаралыг авчирсан гэж хэлж болно. Н.Алтанхуяг дахиад л чимээгүй байсангүй. Тэр ирэх оны Ерөнхийлөгчийн Сонгуульд нэрээ дэвшүүлнэ гэдгээ өнгөрөгч арваннэгдүгээр сарын 9-нд олон нийтэд мэдэгдэв.

Ерөнхийлөгчийн сонгуульд нэрээ дэвшүүлэхээ зарласнаас хойш 20-хон хоногийн дотор түүний ойр дотны хоёр эмэгтэйг АТГ-аас саатуулж, эхнэр Х.Сэлэнгийг хилээр гарахыг хориглоод байгаа юм. Тэгэхээр хохирогч дөрөв биш долоо боллоо гэсэн үг.

ХОХИРОГЧ-5

Өнгөрөгч арваннэгдүгээр сарын 16-нд түүний төрсөн дүү Н.Наранцэцэгийг Чингис хаан Олон Улсын нисэх онгоцны буудлаас баривчилж, хорих 461-р анги руу авч явсан. Чухам ямар шалтгаанаар Н.Наранцэцэгийг  хорьсон нь тодорхойгүй байсан бөгөөд түүнийг өмгөөлөгчтэй нь ч уулзуулаагүй байна. Харин 11-р сарын 22-ны шүүх хурлаар Н.Наранцэцэгийг Эрүүгийн хуулийн 263.2 буюу “Төрийн албан тушаалтны эрх мэдлээ урвуулан ашигласан”, 150.3 буюу “Бусдын итгэмжлүүлсэн эд хөрөнгийг шамшигдуулсан” гэх зүйл ангиар сэжигтнээр татан, цагдан хорих, таслан сэргийлэх арга хэмжээ авсан гэжээ. Түүний өмгөөлөгч О.Чулуунчимэгийн хэлснээр Н.Наранцэцэг нь төрийн албанд нэг ч өдөр ажиллаж байгаагүй аж. Тэрбээр Н.Алтанхуягийн эзэмшлийн “Хаан жимс” амралтын газрыг хариуцаж, ажиллуулдаг байсан байна.

ХОХИРОГЧ-6

Н.Алтанхуягийн төрсөн эгчийн охинийг мөн л АТГ саатуулж, хорих 461 дүгээр ангид саатуулжээ. Дүү Н.Наранцэцэгийг саатуулсны маргааш буюу 11-р сарын 17-нд түүний эгчийн охинийг саатуулсан тухай албаны эх сурвалж мэдээлсэн. Гэхдээ энэ нь чухам Г.Дэнзэнгийн эхнэр Г.Уянга уу, өөр хүн үү гэдэг нь одоо болтол маргаантай, тодорхойгүй байгаа юм. Зарим эх сурвалжийн мэдээлснээр “Н.Наранцэцэгийн бэр Ц.Насанбат нарыг Боловсрол Соёл шинжлэх ухааны яам, зарим дүүргийн Тамгын газраас зарлан явуулсан нийт 4.2 тэрбум төгрөгийн санхүүжилт бүхий тендер хууль бусаар явагдсан байгаатай холбогдуулан, сэжигтнээр тооцож, цагдан хорих таслан сэргийлэх арга хэмжээг авсан” гэжээ.

ХОХИРОГЧ-7

Энэхүү нийтлэлийн эхэнд Ерөнхий сайд асан Н.Алтанхуягийг АТГ-т мэдүүлэг өгөхөөр явсан тухай цухас дурдсан. Тэгэхээр тэр бол долоо дахь хохирогч мөнөөсөө мөн. Н.Алтанхуягийг дөрвөн цагийн турш байцаасны эцэст явуулсан байна. Тэрбээр гарч ирээд нэг ч үг дуугаралгүй явж одсон юм. Магадгүй түүнийг “Амаа хамхи” хэмээн АТГ-аас үүрэгдсэн байж ч болох. Өчигдөр буюу энэ сарын 1-нд түүнийг цагдан хорьсон тухай мэдээлэл цахим орчноор явсан ч албаны эх сурвалжийн ямар ч мэдээлэл гараагүй. Н.Алтанхуягийн гэх тодотголтой энэхүү хэрэг цаашид хэрхэн үргэлжлэхийг таамаглахад тийм ч хэцүү биш. Түүнд Женко Х.Баттулга шиг гараа өргөөд, анир чимээгүй алга болох, эсвэл Н.Энхбаяр шиг асар их хорсол заналыг өвөртлөх гэсэн хоёр сонголт бий. Хэрэв тэр үнэхээр цэвэр бол ард түмэн түүнийг дэмжих гэсэн гурав дахь сонголт байж болох л юм.

Б.Энх-Уянга

www.zindaa.mn