Төрийн тусгай албан хаагчдын эмнэлэг ”Хийлч Эмүжингийн цаг”-тай боллоо

"Авьяаслаг Монголчууд" шоуны "өхөөрдөм хийлч"-ийн дүрээр бидний танил болсон хийлч Э.Эмүжин охин "Төрийн тусгай албан хаагчдын нэгдсэн эмнэлэг"-ийн үйлчлүүлэгч, хамт олонд зориулж хийлийн аялгуу тоглож сонирхууллаа.

Тэрбээр тус эмнэлэгтэй байнга хамтран ажиллахаар болсон бөгөөд өөрийн уран бүтээлүүдээсээ танилцуулж байх юм байна.

Өдгөө Хөгжим бүжгийн коллежийн 6-р ангийн сурагч тэрбээр олон нэр хүндтэй уралдаануудад амжилт үзүүлж байжээ.

Цухас дурдвал, 2016 оны Нийслэлийн шилдэг сурагч, 2016 оны ХБК-ийн шилдэг сурагч, 2015 онд ОХУ-ын Хабаровскд зохиогдсон Новие Имена уралдааны тэргүүн байрын шагналтай, 2015 онд ОХУ-ын Чайковскийн уралдаанд оролцсон, 2014 онд Бүгд Найрамдах Чех Улсад зохиогдсон Косианы нэрэмжит уралдааны 3-р байрын шагнал зэргийг хүртсэн байна. 

Д.Тамир