ӨМНӨГОВЬ: Номгон сумын ЗДТГ 37 жилийн дараа шинэ байртай боллоо

Автор | Zindaa.mn
2017 оны 01 сарын 27

Өмнөговь аймгийн хэмжээнд 2008 оноос эхлэн 15 сумын Засаг даргын Тамгын газрын байрыг шинэчлэх ажлыг эрчимжүүлэн 12 дахь сумыг Засаг даргын Тамгын газрын шинэ байртай болголоо. Энэ сарын 25-ны билэгт сайн өдөр нээлтээ хийсэн Номгон сумын ЗДТГ-ын шинэ байрыг орон нутгийн төсвийн хөрөнгө оруулалтын 941 сая төгрөгийн санхүүжилтээр “Эрдэнийн гүн говь” ХХК барьж гүйцэтгэсэн байна. Барилгын чанар стандартын хувьд хамгийн сүүлийн үеийн шийдлээр барьж байгуулсан бөгөөд Номгон суманд баригдсан анхны 3 давхар барилга юм.

Өнөөдрийг хүртэл төрийн үйлчилгээг иргэдэд хүргэж байсан хуучин байрны хувьд 1980 онд ашиглалтанд орсон ба 37 жилийн дараа шинэ байртай болж байна. Шинэ Засаг даргын Тамгын газрын байртай болсноор иргэдэд хүрэх төрийн үйлчилгээ илүү ил тод нээлттэй, хүртээмжтэй, хүнд сурталгүй, түргэн шуурхай болно гэдэгт ард иргэд итгэл хүлээлгэж байлаа.

Номгон сумын ЗДТГ-ын шинэ байрны нээлтэнд аймгийн Засаг даргын орлогч Х.Батболд, ИТХ-ын ажлын албаны дарга Б.Галхүү, ЗДТГ-ын ТЗУХ-ын дарга А.Ганзуузай, НҮҮГ-ын дарга А.Цогбаяр болон хөрш зэргэлдээ сумдын удирдлагууд хүрэлцэн ирж баяр хүргэж ажлын өндөр амжилт хүссэн юм. Шинэ байрны тохижилтонд шаардлагатай 30 сая төгрөгийг аймгийн ЗДТГ-аас шийдвэрлэж өглөө.

Эх сурвалж: Өмнөговь аймгийн ЗДТГ

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top