Р.Нямдорж байгаа цагт шинэ ордонд бөхийн барилдаан болохгүй

Монгол түмний хоёр том баярын нэг “Цагаан сар” эхэлхэд 10 гаруй хоног үлдээд байгаа билээ. Сар шинийн баяраар Монголчууд бидний хүсэн хүлээдэг зүйл бол яах аргагүй хүчит бөхийн барилдаан. Хотол олноороо цуглан үндэсний бөхөө үзэж суух нь уламжлал болсон зүйл. Тэгвэл жилийн жилд бөхийн барилдааныг зохион байгууулахад гардаг асуудлуудын нэг нь билетийн асуудал. Ганцхан битүүний өдөр зардаг болохоор бөхөд хайртай ард иргэд маань өвлийн хүйтэнд хонон өнжин дугаарлан байж авдаг, цөөхөн зарагддаг учраас зарим нэг нь авч чадалгүй тасалбар дуусдаг. 20-25 мянган төгрөгөөр ихэвчлэн зарагддаг тасалбараа арай хийн байж дугаарлан авлаа дараагийн асуудал гарч ирнэ. Хэрхэн яаж үзэх вэ?

Бөхийн өргөөн машины зогсоол болон гаднах талбай маш давчуу хэдэн талаас нь орон сууц барилгууд шахаад баригдчихсан зэрэг асуудлуудад стрессдэн байж нэг бөхөө үздэг нь бас нэг үндэсний соёл болжээ. Үндэсний бөхөө бөхийн өргөөндөө үзэх нь мэдээж уламжлал болсон зүйл ч Бөхийн өргөөнд үздэг 2500 хүнээс гадна үзэх гэсэн өчнөөн мянган хүн тасалбар дууссан гэсэн шалтгаанаар гэртээ харьдаг. Харин сүүлийн үед сошиал ертөнцөөр сар шинийн бөхийн барилдааныг шинэ ордон болох “Буянт-Ухаа” спорт цогцолборт зохион байгуулж яагаад болдоггүй юм бэ? Гэсэн хүмүүсийн асуултууд газар авч байна.

Энэ нь тийм ч боломжгүй зүйл мэт. Учир нь “Буянт-Ухаа” цогцолбор гаднаа машины зогсоол, талбай элбэг дээрээс нь бөхийн өргөөнөөс хоёр дахин их суудалтай тасалбар дууссан гэсэн шалтгаанаар үзэж чадаагүй хүмүүс бүрэн үзэх боломжтой юм. Ямар ч байсан жижигхэн зайнд шахцалдаж, бухимдан, нэг нэгнийгээ харааж, хэрэлдэх хүмүүсийн дүр зургийг бид харахаа болих байх. Энэ тал дээр “Буянт-Ухаа” спортын цогцолборын хамт олон ч дуртай байгаагаа илэрхийлж өөрсдийн фэйсбүүк пэйж хуудаснаа дараахь мэдэгдлийг хийсэн байна.

Харин Монголын Үндэсний Бөхийн холбоо болон Монгол Улсын цолтой нэр хүнд бүхий бөхчүүдээс санал бодлыг нь сонсох гэсэн болов ч Бөхийн холбооны тэргүүн Ц.Нямдоржоос айсан уу яасан, мэдэхгүй тэр бөхийн холбооноосоо асуу, би яаж мэдэх юм тэгээд яах юм гэхчлэн утасны цаанаас зандарч байлаа. Харин Бөхийн Холбооны ажилчдаас асуух гэтэл дамжиж явсаар Тэргүүнээс асуу гэж нөгөө л нэг үндэсний бөхийг атгасан Ц.Нямдорж дээр очлоо.

Гэвч түүнээс бас л хариу байхгүй. Үндэсний бөхийн холбоо ер нь шат шатандаа хүндрэлтэй улсууд байхаас гадна хэдэн бөхчүүдээр мөнгө хийдэг бизнесийн нэгэн урсгал болоод удаж байгаа. Ц.Нямдоржтой нэгдсэн түүний хараан дор байдаг хэдэн бөхчүүд ч гэсэн ард түмний хайр хүндэтгэлээр өдий зэрэгт явж байгаагаа мэдэхгүй хэнхэгэрхэж яваа. Эцсийн дүнд үзэгчгүй, дэмжигчгүй бол ямар ч спорт үнэ цэнэгүй байдаг.

Нэгэн цагт МУ-ын Арслан П.Бүрэнтөгс “МБҮХ-г шинэчлэх цаг нь болсныг тэмцээн, барилдаан болгон харуулсаар байна” хэмээн хэлж байсан. Мөн бидний бахархал болсон Аваргууд болох Х.Баянмөнх, А.Сүхбат нар бөхийн холбооны шударга бус үйл явдлуудыг олонд дэлгэж ширүүн тэмцэж байсан нь саяхан. Ямар ч байсан Монгол түмний санал болгоод байгаа шинэ ордонд бөхийн барилдаан Ц.Нямдорж бөхийн холбооны тэргүүн байх хугацаанд зохион байгуулагдахгүй нь бололтой.

Б.Тэнгис