Г.Дэнзэн, Я.Батсуурь нарт хорих ял оноолоо

 Засгийн газрын хэрэг эрхлэх газрын дэд дарга асан Г.Дэнзэн, "Эрдэнэс Тавантолгой" компанийн гүйцэтгэх захирал асан Я.Батсуурь нарын таван хүнд холбогдох шүүх хурал Баянзүрх, Чингэлтэй, Сүхбаатар дүүргийн шүүхэд тав дахь өдрөө үргэлжилж өнөөдөр шүүх шийдвэрээ гаргажээ.

 Шүүхээс Г.Дэнзэнд 3,6 жилийн хорих ял, Я.Батсуурьд хоёр жилийн хорих ялыг жирийн дэглэмтэй эрэгтэйчүүдийн хорих ангид, шүүгдэгч н.Түмэнхүү, н.Төгсбаяр нарт хоёр жилийн тэнсэн харгалзах ял, шүүгдэгч н.Баярмаад мөнгөн торгууль ноогдуулах шүүхийн шийдвэр гарчээ. Мөн шүүгдэгч нараас 5.5 тэрбум төгрөгийг тэнцүү хэмжээгээр гаргуулахаар шийдвэрлэсэн байна. Хорих ял сонссон Г.Дэнзэн, Я.Батсуурь нарыг Урьдчилан хорих 461 дүгээр хорих анги руу авч явсан байна. Тэднийг тушаалаа ашиглаж Шинэчлэлийн засгийн газрын үед “Эрдэнэс Таван толгой” компаниас тендэр авч, Г.Дэнзэн эхнэрийнхээ “Говь повер” компани руу 17 тэрбум төгрөг шилжүүлсэн хэрэгт буруутгасан байна. Тэдэнд холбогдох эрүүгийн хэрэгт прокурорын газар Эрүүгийн хуулийн тусгай ангийн 263 дугаар зүйлийн 263.2 дэх хэсэг, мөн хуулийн 150 дугаар зүйлийн 150.3-т заасан гэмт хэрэгт яллах дүгнэлт үйлджээ.

Т.Түвшин