О.Сэргэлэн: Ээжийнх нь элэгний 33 хувийг охинд шилжүүлэн суулгасан

Улсын нэгдүгээр төв эмнэлэг, Эх хүүхдийн эрүүл мэндийн төв, БНСУ-ын "Асан" анагаах ухааны төвийн хамтарсан баг долоон настай Л.Бүжинлхам охинд элэг шилжүүлэн суулгах хагалгааг өнгөрсөн бямба гаригт амжилттай /2017.04.22/ хийсэн билээ. 

Л.Бүжинлхам охины  биеийн байдал хүндэвтэр байсан тул хоёр улсын эмч нар хамтран ажилласан юм. Энэхүү хагалгаа нь манай улсын элэг шилжүүлэн суулгах 34 дэх хагалгаа бөгөөд хүүхдэд хийсэн гурав дахь хагалгаа болж байгаа юм. Тус хагалгааг удирдсан Монгол Улсын хүний гавъяат эмч О.Сэргэлэнтэй ярилцлаа.

 -Хагалгааны дараа Л.Бүжинлхам охины  биеийн байдал ямар байна. Охины биед шилжүүлэн суулгасан элэг хэдий хэр хугацаанд дасан зохицох вэ?

-Хүүхдийн биеийн байдал одоохоноо тогтвортой байна. Эрхтэн шилжүүлэн суулгах төвийн эрчимт эмчилгээний тасагт эмчлэгдэж байна. Одоогоор хүүхэд амьсгалын аппаратнаас гүйцэт салаагүй байгаа. Хүүхэд ухаантай байгаа. Шинжилгээ болоод бусад үзүүлэлтүүд харьцангүй гайгүй.  Мөн шээсний гарц хэвийн. Хагалгаанд орохоос өмнө хүүхдийн маань цусны бүлэглэлт муу байсан одоо ч мөн хэвээр байна. Энэ тохиолдолд бага зэрэг цус шүүрэх тохиолдол бий. Гэхдээ одоохондоо бид ажиглан зохих ёсны шинжилгээ, эмчилгээнүүдийг хийгээд л байж байна.

Бид хүүхдэд элэг шилжүүлэн суулгах  хагалгааг гурав дахь удаагаа хийлээ. Энэ удаад ээж нь донор болсон. Хүүхдэд элэгний зохилдлогоо том хүнийхээс ялгаагүй.  Харин ховхрох урвал гэж гардаг. Энэ нь илүүтэй хүүхдэд тохиолдох магадлал их байдаг. Яагаад гэвэл  хүүхдийн дархлааны урвал хүчтэй байдагтай холбоотой. Гэхдээ бид ажиглалтаа үргэлжлүүлж байна. Хэрэв дээрх илэрвэл зохих ёсны арга хэмжээг авна.

-Ээжээс  нь  элэгний хэдэн хувийг  авсан бэ?

-Гуравны нэг буюу ойролцоогоор 33 хувийг авсан. Том хүнд 66 хувийг авдаг бол хүүхдэд бага элэг суулгадаг учраас зөвхөн зүүн дэлбэнг нь авч суулгасан байгаа. Хүүхэд болон том хүнд  элэг шилжүүлэн суулгасны  дараах хариу урвал ерөнхийдөө ойролцоо.  Тухайлбал, том хүнд 100-150 гр цус гарахад ноцтой өөрчлөлт  төдийлөн гараад байдаггүй. Харин хүүхдэд 50 граммаас дээш цус гарахад л ноцтой өөрчлөлтүүд гардаг учраас байнгын хяналтад байлгах  шаардлагатай.

-Элэг ургадаг эрхтэн. Тэгэхээр охины элэг хэдий хэр хугацаанд төлжих вэ?

-Донорын элэг гурван сарын дараа гэхэд 80 хувь нь төлждөг. Хүүхдийн тухайд том хүний элэг суулгасан учраас харьцангүй гайгүй.

-Энэ удаагийн элэг шилжүүлэн суулгах хагалгааг БНСУ-ын эмч нартай хамтарсан гэдгээрээ нэлээдгүй онцлог байлаа. Хагалгааны явцад  БНСУ-ын эмч нар яг ямар үүргийг гүйцэтгэв.

-Л.Бүжинлхам охины  биеийн байдал хүндэвтэр дээр нь элэг шилжүүлэн суулгах хагалгаа нь  хүнд хагалгаанд тооцогддог. Охин маань өмнө нь хоёр ч удаа хагалгаанд орж байсан учраас наалдац ихтэй, цус алдсан, биеийн байдал нь  маш сул байсан. Ээжийнх нь  хувьд мөн анатомийн онцлогтой. Уг нь зүүн дэлбэнг аваад суулгахад зөвхөн нэг ширхэг цөсний зам, нэг артер залгагддаг бол энэ бүхэн нь салаа байсан зэрэг шалтаануудтай байсан учраас  БНСУ-ын "Асан" анагаах ухааны төвийн эмч нарт хүсэлт тавьсны дагуу хамтран ажиллалаа. "Асан" төвөөс нэг мэдээгүйжилтийн эмч, хоёр мэс заслын эмч  нарын хамтаар хагалгааг амжилттай хийлээ. Багш нар маань бидэнтэй байсан учраас сэтгэл санааны хувьд бид харьцангүй  тайван байсан.

-Хагалгаа 30 цаг орчим үргэлжилнэ гэж тооцоолж байсан бол 16 цаг орчим үргэлжилсэн шүү дээ. Энэ тухайд?

-Цөсний замыг ялгахад ойролцоогоор гурван цаг зарцуулагддаг. Тэгвэл охины цөсний зам төрөлхийн битүүрэлтэй учраас дээрх хугацаа зарцуулагдаагүй. Мөн ялгадаж байгаа талбай нь  харьцангүй бага учраас энэ хэрээр  арай бага хугацаа  зарцуулагдсан.  Том хүний тухайд зөвхөн хэвлийг нээхэд  хоёр цаг гаруй хугацааг зарцуулдаг бол хүүхдэд нэг цаг орчим үргэлжилдэг. Өөрөөр хэлбэл хүүхдэд  хийгдэж байгаа талбай харьцангүй бага учраас хугацааны хувьд  урагшилдаг талтай. Цөсний зам залгахад дөрвөн цаг, цөсний замыг ялгахад 2-3 цаг мөн хэвлий нээж, хаахад тус бүр хоёр цаг зарцуулагддаг. Том хүний хувьд 27-28 цаг болно.  Хугацааны хувьд үүгээрээ л ялгаатай наашилсан байгаа.

-Охиныг одоогоор хагалгаанд орсон эмч нар харж байгаа юу?

-Элэг шилжүүлэн суулгасан хагалгааны дараа 24 цагийн  хяналтад  заавал байх ёстой.  Манай элэгний багийн эмч нар, Эх хүүхдийн эрүүл мэндийн төвийн эрчимт эмчилгээний тасгийн эмч нар хамтран  охиныг 24  цагийн турш хянаж байна.

-Охинд яг одоо ямар эмчилгээнүүд хийгдэж байгаа вэ?

-Хүүхдийн биеийн байдал ямар хонов гэдэг дээр өглөө бүр 7 цагаас хуралдаж танилцаад тухайн өдөр ямар эмчилгээ хийгдэх үү гэдгийг багаараа  зөвшилцөж байна.  Хэрэв зайлшгүй шаардлага гарвал эмч нарын баг яаралтай хуралдана.

Ээжийнх нь  бие  ямар байгаа вэ?

Харьцангүй тогтвортой биеийн байдал нь гайгүй байна. Ээж нь босоод явж байгаа.

Ш.Адъяамаа

Эх сурвалж: ZINDAA.MN