Гурав хоногийн “настай” Гэрэлт гудамж

Хэдхэн хоногийн өмнө буюу энэ сарын 9-нд Нийслэлийн Сөүлийн гудамжнаа анхны Гэрэлт гудамжийг сүр дуулиантайгаар нээсэн билээ. Циркийн уулзвараас Наран их дэлгүүр хүртэлх 440 метр орон зайг хамарсан автомашингүй Шөнийн гэрэлт гудамж болгох зорилгоор олон нийтэд зориулсан үзвэрийн дэлгэц, 400 хүний амралтын суудал зэргийг бий болгосон юм.

Дэлхий нийтийн жишгээр ийнхүү шөнийн гэрэлт гудамж санаачилсан сайн талтай хэдий ч төлөвлөлтийн хувьд төдийлөн оновчтой шийдэл биш байсан бололтой. Нээлтийн дараахан иргэдийн санаанд хүрээгүй, сэтгэл дундуур байгаа явдал олон нийтийн сүлжээнд ихээхэн илэрч байсан юм. Уг нь гадаадын улс орнуудад байдаг шиг үнэхээр үзэмжтэй, гоёмсог шөнийн гудамжийг хүмүүс төсөөлж байсан байх.

Солонгосын Бусан хотын Шөнийн гудамж.

Японы Кувана хотын Шөнийн гудамж.

Энэхүү шөнийн гудамжийг бий болгохын тулд тэр орчмын моддыг хөрөөдөн тайрсан явдал бас л нэлээдгүй харамслыг төрүүлсэн. Нэг зүйл шинээр байгуулахын тулд байгаа хуучин зүйлээ устгаж байдаг нь манайхны хэвшмэл араншин гэлтэй. Уг нь моддоо байсан тэр чигээр нь гэрлээр чимэглээд, гоё болгочихож болмоор юм шиг.

Улаанбаатарын Шөнийн гудамж.

Нээлтийн үеэр олон ч хүмүүс хүрэлцэн очиж, тэр хавийн орчин олны хөлд дарагдсан. Үүнийг дагаад хог новш, элдэв ялгадас нөгөө сайхан Сөүлийн гудамжны булан тохойд дүүрчихлээ хэмээн тэр хавийн оршин суугчид халаглаж эхэлсэн. Энэ гудамж тохижилт соёлжилт, орчны уур амьсгалаараа Улаанбаатарын хамгийн аятайхан газар байсан гэдэгтэй хэн ч маргахгүй биз ээ.

Харин Шөнийн гэрэлт гудамж болгосноос хойш тэр орчин нэг л замбараагүй, бараг л зах маягийн төрхтэй болж, ойр орчмын айл өрхүүд дуу шуугианд нь ихэд ундууцах болсон юм. Тэгвэл уг Гэрэлт гудамжийг буцаагаад буулгаж эхэллээ гэх мэдээлэл өчигдрөөс зураг хөрөгтэйгөө цацагдаж эхлэв. Үүнтэй зэрэгцээд “Sister харилцаатай Сөүл хотын захиргаа дургүйцсэн гэнэ лээ” гэх шуум түгэж байгаа хэдий ч үнэн худлыг бүү мэд. Ямартай ч, тэр хавийн оршин суугчдын яс амарч, магнай тэнийн баярлаж байгаа биз ээ.

Гэрэлт гудамжаа буулгаж буй нь. 

Тэгээд ч ойр хавьд нь 45-р сургууль оршиж байгаа нь Шөнийн гудамжинд төдийлөн зохистой бус. Үнэхээр л иргэдийн чөлөөт цагийг өнгөрүүлэх шөнийн гэрэлт гудамжтай болохыг хүсч байвал өөр байршилд, өөрөөр хэлбэл, сургууль цэцэрлэгээс зайдуухан, одоогоор тааруухан тохижилттой байгаа гудамжийг сайжруулах замаар шинээр бий болговол илүү үр өгөөжтэй байхаар. Жишээ нь, Урт цагааны тэр хавийг ч юм уу, янзын сайхан тохижилттой болгоод Шөнийн гудамж нээчихвэл “нэг сумаар хоёр туулай” буудчих бус уу.

Д.Мигаа