Гэр бүлийн гадуурх харилцаа гэмгүй хүүхдийн аминд хүрсэн гашуун түүх

Санаатайгаар долоон настай хүүгийн аминд хүрсэн З.Сэлэнгэ, Б.Барсболд нарт холбогдох хэргийн шүүх хурал өнгөрсөн сарын 22-нд болжээ. Тус шүүх хуралдаанаас долоон настай хүүгийн амийг захиалгаар хөнөөсөн тэдгээр этгээдүүдэд 15-23 жилийн ял оноожээ. Тодруулбал, шүүгдэгч З.Сэлэнгэд 23 жилийн ялыг чанга дэглэмтэй эмэгтэйчүүдийн хорих ангид, Б.Барсболдод 15 жилийн хорих ялыг чанга дэглэмтэй эрэгтэйчүүдийн хорих ангид эдлүүлэхээр тус тус шийдвэрлэсэн байна.

Хэрэг өнгөрсөн оны есдүгээр сарын 6-нд Дорнод аймгийн Хэрлэн сумын 1-р багт гарсан бөгөөд 7 настай хүү амиа хорлосон гэсэн дуудлага Цагдаагийн газарт иржээ. Дуудлагын мөрөөр шалгахад хүүгийн үхэлд гадны нөлөө орсныг тогтоож, уг хэрэгт Б.Барсболдыг холбогдолтой гэж үзэн саатуулсан байдаг. Талийгаач хүүгийн эцэг залуу бүсгүйтэй гэр бүлээс гадуур харилцаа үүсгэж, улмаар гэр бүлээ цуцлуулан хүүгээ орхиж чадахгүй гэснээр бүсгүй  Барсболд гэгчид захиалга өгч, хүүгийн амийг хөнөөлгөсөн байна.

Гэр бүлийн гадуурх харилцаа гэмгүй хүүхдийн амийг авч одсон гашуун түүхийг бусдад сургамж болгох үүднээс дэлгэрэнгүй нийтэлж байна. 

Аавыг нь "авах"-ын тулд хүүг нь хөнөөхийг хүссэн З.Сэлэнгэ

Дорнод аймгийн Хэрлэн сумын 1 дүгээр багт амьдардаг, эрхэлсэн тодорхой ажилгүй З.Сэлэнгэ 1992 онд төрсөн, бүрэн дунд боловсролтой, гоо сайханч мэргэжилтэй. Тэрбээр хэрэг гарахаас өмнө талийгаач хүүгийн аавтай эр, эмийн харьцаатай байжээ. Улмаар эхнэртэй нь маргалдсаны улмаас өс хонзонгийн сэдэлтээр насанд хүрээгүй П.Барсболдод захиалга өгч, долоон настай хүүгийн амь насыг хөнөөлгөсөн байна.

Тэрбээр шүүхэд мэдүүлэхдээ “Хүүгийн аавтай дотно харилцаатай байсан болохоор би жирэмсэн болсон. Энэ талаараа эхнэрт нь хэлэхэд, намайг удаа дараа дарамталж зовоосон. Би хүүхдээ 12 долоо хоногоос дээш тээсэн байсан учир үр хөндүүлж болохгүй байсан. Надаас 20 насаар эгч байж маш бүдүүлэг, байж боломгүй үгээр доромжилж, мессеж бичдэг байсан.... Эрүүгийн төлөөлөгч нар үүрээр манайд орж ирэхдээ намайг залилж авч явсан. Тэгээд 2016 оны есдүгээр сарын 09-ний өдөр намайг хорьсон. Маргааш нь тогтоол танилцуулсан. Тэгэхэд л би юу болоод байгааг мэдсэн. Би Барсболдыг өөрийнхөө талаар худлаа мэдүүлээд байна гэж бодож байна. Тулган шаардалтаар энэ хэргийг хүлээлгэсэн. Би өөрөө 5 настай охинтой. Тийм болохоор надад тулгаад байгаа энэ хэргийг үйлдээгүй” гэжээ.

Захиалгаар хүний амь хөнөөсөн П.Барсболд

Хүүгийн амийг хөнөөсөн тэр 1998 онд төрсөн 18 настай, бүрэн дунд боловсролтой, мэргэжилгүй, ам бүл 4, өвөө, эмээ, эгчийн хамт амьдардаг, эрхэлсэн тодорхой ажилгүй нэгэн ажээ. 

Тэр З.Сэлэнгийн захиалгаар түүнтэй урьдчилан үгсэн тохиролцож бүлэглэн, 2016 оны есдүгээр сарын 06-ны өдөр Дорнод аймгийн Хэрлэн сумын 1-р багт оршин суух 7 настай Т-г биеэ хамгаалж чадахгүйг мэдсээр байж, гар утасны цэнэглэгч, уртасгагч залгуураар хоолойг нь боомилж, санаатай амь насыг нь хөнөөсөн байна.

Тэрбээр шүүх хуралдааны үеэр мэдүүлэхдээ ”Өмнө нь мөрдөн байцаалтад өгсөн миний мэдүүлэг үнэн, зөв. Өөр нэмж ярих зүйлгүй. Үйлдсэн хэрэгтээ гэмшиж байна. Уучлалт гуйж байна” гээд, хөнгөн ял оногдуулахыг хүссэн байна.

П.Барсболд хэрэг гарахаас хоёр хоногийн өмнө буюу 2016 оны есдүгээр сарын 04-ний өдөр З.Сэлэнгээс хүүг алах захиалга авсан талаараа мөрдөн байцаалтын явцад мэдүүлжээ. Мөн “Тухайн үед амыг нь дагуулаад “Тэгье” гэж хэлсэн. Яг ална гэж бодоогүй. Сэлэнгээ эгч Ц-тэй уулздаг байсан. Түүнээс жирэмсэн болсон байхад нь “Ц-гийн эхнэр хоолонд нь юм хийж өгсөн” гэж Сэлэнгээ эгчээс сонссон. Тэр үед Сэлэнгээ эгчийн хүүхэд нь зулбасан. Тэгээд адилхан түүний хүүхдийг нь хорлох гэж намайг гуйсан. 2016 оны есдүгээр сарын 04-ний өдөр Сэлэнгээ эгч намайг гуйсан. Тэгээд “Маргааш орой гэртээ байхад нь хоёулаа очъё” гэж ярилцаад, 2016 оны есдүгээр сарын 05-ны орой 20:00 цагийн орчим Сэлэнгээ эгч хамт дэлгүүрээс хоёр хос резинэн бээлий авсан. Гэтэл тэр орой гэрийнхэн унтахгүй байсан учраас гарч чадаагүй. Тэгээд маргааш нь буюу 2016 оны есдүгээр сарын 06-ны өдөр хоёулаа гарч, Ц-гийн гэрийн ойролцоо очиж, эхнэрийг нь гэрээсээ гарахаар нь би гэрт нь орж, хүүхдийг нь алсан. З.Сэлэнгээ эгч гудамжны үзүүрт хүлээж байсан” гэж мэдүүлсэн байна.

Хохирогч хүү хэрэг гарахын өмнө гал тогооны өрөөндөө түүнд гар утсан дээрх зургаа үзүүлээд, юм яриад сууж байжээ. Гэтэл гэмт этгээд хажуунаас нь хоёр гараараа хоолойг нь шахаж боосон аж. Улмаар хүүгийн бие сулрахаар нь боохоо больж, урт сандал дээр дээш харуулаад хэвтүүлсэн байна. Үүний дараа хүү гэнэт амьсгалсан гэдэг ба энэ үед гэмт этгээд сандарч, ширээн дээр байсан гар утасны цагаан өнгөтэй цэнэглэгчийн утсаар хоолойг нь ороож, шалан дээр хэвтүүлэн, залгуурт залгаатай байсан цахилгааны уртасгагчийг хүзүүгээр нь 2-3 удаа ороож, татсан талаараа мөрдөн байцаалтын явцад мэдүүлсэн байдаг.

Талийгаач хүүгийн аавын мэдүүлэг...

Талийгаач хүүгийн аав “З.Сэлэнгэтэй 2015 оны хавар, гуравдугаар сарын орчим анх танилцсан. Ер нь дотно харилцаатай байсан. Намайг Сэлэнгэтэй харилцаатай болохыг эхнэр мэддэг. Гэр бүлийн хэрүүл маргаан байнга гардаг байсан. Сэлэнгээ манай эхнэр рүү мессеж бичдэг байсан юм билээ. Хэрэг гарахаас сарын өмнө байх эхнэр “Сэлэнгээ хүүхдэд чинь заналхийлээд мессеж бичээд байна. Хүүхдийн чинь толгойг залгих юм биш биз дээ” гэж хэлэхэд “Хүүхэд ямар буруутай юм бэ, яав л гэж” хэлээд, хайхраагүй өнгөрсөн. Надтай дотно харилцаатай байхдаа 2015 оны намар Сэлэнгээ жирэмсэн болж, би авахуулах гэж мөнгө өгөөд, хот руу явуулахад авахуулаагүй. Дараа нь эгчтэй нь уулзаад, “Сэлэнгээ хүүхдээ яасан бэ” гэхэд “Эм уугаад зулбуулна. Хөдөө аваачиж, оршуулж ирээд хүүхдийнхээ хариуг авна гэж ярьж байсан. Тэр намайг гэр бүлтэйг мэдэж байгаа мөртлөө “Надтай сууна, танд хүү гаргаж өгнө” гэж ярьдаг байсан. Би түүнд “Чамтай сууна гэж юу байхав дээ” гэж хэлдэг байсан. Намайг гэр бүлээсээ салахгүй болохоор хүүхдийг маань хороож, хүүхэдгүй болвол эхнэрээсээ сална гэж бодож, хүүг маань хорлосон гэж бодож байна” гэж мэдүүлжээ.

Жигшүүрт эл хавтаст хэргийн түүхээс харахад гэр бүлийн гадуурх харилцаа ямар их хор хөнөөлтэй болох, түүнээс гарах үр дагавар ямар аймшигтай хэрэг болдгыг бэлхнээ харуулж байгаа юм. Хамгийн гол нь энэ бүхний эцэст хүүхэдп хохирч, бүр амь насаа хүртэл алдаж байгаа нь дэндүү харамсалтай. 

С.Баяр

Эх сурвалж: Zindaa.mn