Хурцын тасгийн долоо хоног

Өнгөрсөн долоо хоногийн үйл явдлыг ингэж нэрлэхээс өөр арга алга.   Улс төр болоод нийгмийн хүрээнд болсон үйл явдлууд, иргэдийн уур бухимдал, талцал маргаан дунд болж долоо хоногийг өндөрлөлөө. Гэвч үйл явдал өнөөдрөөс үргэлжилнэ...

           ХАВСАРГАТАЙ УЛС ТӨР

Улс төрд хавсаргатай өдрүүд үргэлжилснийг өмнөх долоо хоногийн үйл явдлаас харж болох. Засгийн газрын эрхмүүдийн өвдгийг чичрүүлэн ОУВС-ийнхан ирснээс энэ хавсарга эхэлсэн. Засгийн газрын үйл ажиллагаанд “хангалттай” гэсэн үнэлэлт дүгнэлт өглөө гэж Ерөнхий сайд хоолой чичрүүлэн өгүүлсэн ч болсон үйл явдлаас дүгнэж үзэхэд,  тийм ч гойд үнэлгээ аваагүй нь илт. “Халамж, тэтгэмжинд тараахгүй” гэж амлан байж авсан мөнгөө хүүхдэд тараалаа гэж шүүмжлэн, мал, уул уурхайн лиценз зэргийг банкинд барьцаалан зээл олгодогийг буруу... гэж үзсэн зэргээс харахад тэд Монголын сул дорой Засгийн газрыг айлгахаар ирсэн нь илт. Ерөнхий сайд Ж.Эрдэнэбат л царайгаа инээх, ярвайх хоёрын хооронд болгож ирээд, “сайн” үнэлгээ өгсөн гээд байгаагаас бус шалгалтанд бүдэрсэн л болов уу... Хөөрхий Засгийн газрынхныг харийнхны өмнө бөхөлзөхийг үл тэвчсэн Ерөнхийлөгч Х.Баттулга өмгөөлж, хаацайлан ОУВС-ийн төлөөлөгчдийг буцаасан. Хариуд нь өөх өгсөн хүнтэй өглөө босоод заргалддагийн үлгэрээр, “Ерөнхийлөгч Засгийн газрын ажилд, хөндлөнгөөс оролцож байна...” гэдэг шүүмжлэлд өртөв. Өөрсдөө олигтойсон бол Ерөнхийлөгчид дуугараад байх ямар шалтгаан байхав дээ. Харин ч өөрийнхөө ажлыг мөрөөрөө бөндийлгөөд, тааваараа багаа бүрдүүлж суухгүй юу. 

    МАН-ын даргын суудалд хэн суух вэ гэдэг таамаг олон нийтийн дунд хүчтэй өрнөж, мөн л дуулиан шуугианыг тариад байна. УИХ-ын дарга М.Энхболдын баруун гарын хүн гэж тодоор яригддаг Ерөнхий сайд Ж.Эрдэнэбат энэ суудлыг зорьж яваа. Түүний өрсөлдөгч МАН дотроо төдийгүй, улс орны хэмжээнд лидер улс төрч гэгддэг Шадар сайд У.Хүрэлсүх. Харин гуравдагч этгээд бол С.Бямбацогт. Эхэндээ дээрх хоёр өрсөлдөгчийн нэр олны дунд газар авч байсан ч УИХ-ын гишүүн Бямбацогт МАН-ын даргад өрсөлдөхөө мэдэгдэв. Ер нь л МАН-ын даргад нэр дэвшигчид ширүүхэн өрсөлдөж байгаа нь илт. Шадар сайд У.Хүрэлсүхийн араас “сүүл тавьсан” гэдэг оргүй үг биш бололтой. Тиймгүй бол У.Хүрэлсүхийн ажлын албаныхан тэр тухай албан ёсны мэдээлэл хийхгүй байсан л даа.

  ГУРВАН ТООРОЙ БАЙШИН БАРИАД ДУУСААГҮЙ ҮЛГЭР

Дайны хажуугаар дажин гэгчээр, Засгийн газрынхныг сандралдаж байх үеэр Сарнай, Сувдаа нар муудалцаад олныг гайхшуулав. “Гурван тоорой байшин барьжээ...” гэж хүүхдүүд дуулдаг даа! Тэгвэл гурван хүүхэн байшин барихаар зорьсон байна. Дээрх дуутай дүйцүүлж ойлговол нэгдүгээр хүүхэн хүүхэд “цуглуулж”, хоёрдугаар хүүхэн мөнгө цуглуулж, гуравдугаар хүүхэн тоосго цуглуулжээ... гэж ойлгогдохоор. Зовж зүдэрсэн олон өнчин нойтон хүүхдэд орох орон барьж өгөх гэж байгаа тухай учирлан барин хэдэн тоосго цуглуулсан, Сувд-Эрдэнэ, Сарнай нарын муудалцаан цахим ертөнцийнхнийг төдийгүй гэр бүлийг талцуулж орхив. “Готов нь авна уу, Шадав нь авна уу” гээд орхимоор ч өрөвч гэнэн түмний хөлс шингэсэн мөнгийг булаацалдаад байхаар олон түмэн тэссэнгүй бололтой. Тэдэн рүү “чулуу”  шидэж эхлэв. Удалгүй хоорондоо маргацгааж, улмаар бие биеэ барьж идэх дөхөцгөөсөөр дараагийн долоо хоногийн нүүрийг үзлээ. Тэдний мэтгэлцээн маргааныг хараад энгийн хүн бүү хэл бурхны толгой ч эргэмээр...Үнэхээр хүүхдийн төлөө чин сэтгэл өвөрлөсөн Дарь эхүүд үү, хүний арьс нөмөрсөн чаралба нар уу гэдгийг хуулиас өөр хэн ч ялгаж салгаж дийлэхээргүй бололтой. “Сарнай” гэдэг төвтэй болчихоод хэдэн хүүхэд тааваараа жаргаж байвал сайхан л хэрэг. Харин ядарсан хүүхдүүдийн нэр барин сайхан сэтгэлт түмний итгэлээр тоглож байгаа бол өөр хэрэг. Тэдний дунд Дэлгэр гэх эмэгтэй аль талд нь орж байгаа нь мэдэгдэхгүй бөмбөрч байгааг ч орхиж боломгүй... Эцсийн дүндээ энэ үйл явдлын маргаашнаас олон түмэн элдэв хандив, гуйлгад гар сарвайх нь юу л бол. Энэ маргааны хохирогч нь Сарнай, Дэлгэр, Сувдаагийн хэн нь ч биш харин ядарч туйлдсан хүүхэд багачууд л болж үлдэхээр дур зураг л харагдаж байна.

ЭЛСЭЭГҮЙ СУРГУУЛИАСАА ХӨӨГДСӨН АНХНЫ ОЮУТАН ТОДРОВ

Цахим орон зайд Осоржамаа гэх хүү дуулиантай орж ирээд олон долоо хоногийг үдсэн. Түүний хувьд хамгийн урамгүй нь өнгөрсөн долоо хоног байв бололтой. “Урилгаа ч буцаагаад авчихлаа, байрнаасаа ч хөөгдчихлөө. Одоо надад алдах юм алга...” гэсэн урамгүй постоос нь ийнхүү дүгнэхэд хүрлээ. Хүн гэдэг уруудахад нь нэгнээ түлхэнэ үү гэхээс нааш гээд гараа сунгадаг нь даанч цөөн. Түүнийг дээрх постны дор бичсэн сэтгэгдлүүдээс харж болох юм. Хүүг улам дорд үзсэн, тавласан, тохуурхсан сэтгэгдлүүд үргэлжилнэ. Өөр нэгэнсэн бол амиа хорлочихоор... Сэтгэлийн хаттай хүү юм гээч. Амьдралд хөл тавьж яваа хүүд ирээд сураад боловсроод, цааш алхдаа... гэж урилга гардуулчихаад буцаагаад авч байдаг.”Сити” дээд сургууль ч сургууль юм аа. Тийм л ухаантнуудыг сургаж төлөвшүүлдэг юм бол анхнаасаа дуугүй л байх хэрэгтэй шүү дээ. Осоржамаагаар дамжуулж сурталчилгаагаа хийсэн Сити дээд сургуулийг тийм ч олон хүн мэддэггүй байв. Одоо харин “Осоржамаагийн сургууль” гэдгээр нь сайн мэдэх боллоо. Цаашдаа “элсээгүй оюутнаа хөөсөн анхны сугууль уу?” гэж нэгнээсээ лавлах биз. Осоржамаа ч ороогүй сургуулиасаа хөөгдсөн анхны оюутан боллоо. Иймэрхүү л хурцадмал долоо хоног өндөрлөж шинэ долоо хоногтойгоо золголоо бид...

            Л.Ганзул

www.zindaa.mn