Д.Амарбаясгалан: Удирдах зөвлөлийн хурлаар Ц.Сандуй 60 тэрбумын бичлэгийг хүлээн зөвшөөрсөн

МАН-ын гишүүн А.Ганбаатар өчигдөр /2017.08.17/ 60 тэрбумын бичлэгтэй холбоотой асуудлаар анх удаа хэвлэлд мэдээлэл өгсөн билээ. 

Тэрээр "Уулзалт болсон нь үнэн. Гэхдээ МАН-ын 16 хүн сонгуульд хэрхэн бэлдэх үү, нийслэлийн намын хорооны үйл ажиллагааг яаж өндөр түвшинд гаргах уу, олон нийт рүүгээ хандсан ямар үйл ажиллагаа хийх үү гэдэг талаар ярилцаж байхад иргэн Г.Доржзодов өөрийн гаргасан санхүүгийн схемээ танилцуулсан. Тэрхүү уулзалтад  эрхүү уулзалтад нийслэлийн намын хорооны дарга Ц.Сандуй, Шадар сайд М.Хүрэлсүх, МАН-ын Ерөнхий нарийн бичгийн дарга  Д.Амарбаясгалан,  УИХ-ын гишүүн Л.Оюун-Эрдэнэ, Г.Доржзодов болон миний бие байсан.  Энэ уулзалтад 60 тэрбум төгрөгтэй холбоотой асуудал огт гараагүй. Шадар сайд У.Хүрэлсүх, УИХ-ын гишүүн Л.Оюун-Эрдэнэ, Д.Амарбаясгалан нарыг  яагаад ярихгүй байгаа нь сонин байна" хэмээх тайлбарыг өгсөн.

Тэгвэл эл асуудлаар МАН-ын Ерөнхий  нарийн бичгийн дарга Д.Амарбаясгалан байр сууриа илэрхийллээ.  Тэрбээр  2016 оны УИХ-ын сонгуулиас хойш  60 тэрбум гэх асуудал гарч ирж нийгмийг бухимдуулж байна.Үүний хамгийн том хохирогч нь МАН. Энэ намын 200 гаруй мянган гишүүд болон өнгөрсөн сонгуулиудад манай намд саналаа өгсөн сонгогчид  хохирч байна. Тэд бухимдаж, зарим нь уурлаж, айж, ичиж  байна. 60 тэрбумын гэх тодотголтой энэ асуудлыг нэг талд нь гаргаж яаралтай шийдвэрлэх зайлшгүй шаардлагатай байна гэж миний хувьд үзэж байгаа. Иргэн А.Ганбаатар өчигдөр мэдээлэл хийхдээ "60 тэрбумын хэлэлцээрт Д.Амарбаясгалан миний биеийг байсан мэтээр ярьж олон нийтийг мөн төөрөгдөлд оруулж асуудлыг улам өргөн болгох гэж хичээж  байгаад нь  ихэд харамсаж байна.  60 тэрбумын гэх тодотголтой асуудлыг  би саяхныг хүртэл эвлүүлэг гэж бодож байсан. Харамсалтай нь саяхан болсон намын УЗ-ийн хурлаар энэ асуудалд холбогдсон  МАН-ын УЗ-ийн гишүүн, НИТХ-ын дарга Ц.Сандуй  уг бичлэгийг өөрөө бодит гэж  хүлээн зөвшөөрсөн учраас эвлүүлэг биш гэдгийг нь ойлгосон. Олон нийтэд хэдэнтээ эвлүүлэг гэж мэдэгдэл хийж байсандаа би харамсаж байгаа. Өнөөдөр намайг АТГ-аас мэдүүлэг  авъя гэж дуудсан. АТГ хурдтай ажиллаж байгаа нь сайн байна. Энэ эрчээрээ асуудлыг нэг талд нь гаргах хэрэгтэй. Миний хувьд 2014 онд болсон энэ яриа хэлэлцээр огт байгаагүй. Энэ үед би АНУ-д суралцаж байсан.

Энэ асуудлыг даруй шийдэж намын нэр хүндийг мөн манай намаар овоглогддог гишүүдийн нэр хүндийг сэргээгээсэй гэж хүсэж байна. А.Ганбаатарын үзүүлсэн миний зургийн тухайд 2015 оны намрын зураг байх шиг байсан. Би хавар нь эх оронд ирж байсан" гэв. 

Тэрээр МАН-ын гишүүн А.Ганбаатарыг өөрийн нэр хүндэд халдсан хэмээн үзэж шүүхэд хандахаа мэдэгдлээ. Мөн Ц.Сандуйг огцрох ёстой хэмээн үзэж байгаагаа илэрхийлсэн юм. 

Ш.Адъяамаа