Шинэхэн ДЭЛХИЙН АВАРГЫН түүхэн замналтай танилц

Монголчууд өнгөрсөн шөнө Чөлөөт бөхийн тав дахь Дэлхийн аваргаа өлгийдөн авлаа. Эх орныхоо төрийн далбааг Парисын тэнгэрт эгшиглүүлсэн эрхэм алдрын эзэн бол П.Орхон. Тэрбээр1993 оны намар арванхоёрдугаар сарын 25-нд Өвөрхангай аймгийн Зүүнбаян-Улаан суманд төржээ. Багын сэргэлэн, цовоо, аливаад дүйтэй, адтай П.Орхон тэшүүр, шатар гээд спортын олон төрлөөр хичээллэдэг байв. Харин хожмоо хүн төрөлхтөний аугаа спорт Чөлөөт бөхтэй бие сэтгэлийг нь холбосон хүн бол төрсөн ах П.Од-Эрдэнэ нь юм. Энэ талаар П.Орхон "2007 онд манай нагац ахын хүү Б.Цолмон, Б.Жавхлан нар чөлөөт бөхийн секцэнд орсон нь миний төрсөн ах П.Од-Эрдэнэд их нөлөөлсөн гэдэг. Тэгээд би ахыгаа дагаад чөлөөт бөхийн спортод орсон" хэмээн ярьжээ.

П.Орхон ээж Б.Пүрэвдуламын хамт

Ийнхүү хүсэл мөрөөдөлдөө хөтлөгдөн Чөлөөт бөхөөр 10 дахь жилдээ хичээллэсний үр дүнд өнөөдөр ДЭЛХИЙН АВАРГА хэмээх эрхэм алдрын эзэн болж, ээж аав, элгэн түмнээ баярлуулж байна. Түүний анхны багш гавьяат дасгалжуулагч Ц.Хосбаяр.

П.Орхон багшийнхаа шавь болсноос ердөө хоёр сарын дараа  дүүргийн аварга болж, амжилтын гараагаа эхэлж байжээ. 

Түүнээс хойш Армийн ДАШТ, Азийн АШТ, УАШТ, олон улсын тэмцээнээс олон медаль хүртэж, эх орныхоо нэрийг дуурсгаж явна. П.Орхон 2013 онд олон улсын хэмжээний мастер цолны болзол хангасан байна.

П.Орхон багш нарын хамт

К.Ичог ялсан бахдам түүх

П.Орхон домогт бөх К.Ичог өвдөг сөхрүүлэв

2016 оны 1 сар

П.Орхон 2016 оны УАШТ-ээс өмнө олимпын бус жин болох 55 кг-д барилддаг байлаа. Улмаар олимпын жил гэдэг утгаараа өнгөрсөн жилийнхэд жин өгсөж, 58 кг-д барилдсан нь амжилтын үүдийг нээсэн гэхэд хилсдэхгүй.

2016 оны УАШТ-д 58 кг-д зодоглохдоо эхний тойрогт дотны найз, ДАШТ-ий алт, мөнгөн медальт С.Цэрэнчимэдийг ялсан.

Дараа нь удаах өрсөлдөгчдөө өвдөг шороодуулсаар аваргын төлөөх барилдаанд Э.Гантуяаг хожиж, улсын аваргын анхны түрүүгээ хүртсэн. Энэ бол гаргаад буй олон амжилтынх нь эхлэл байв.

Энэ жил УАШТ-д дахин жин өгсөн, 63 кг-д зодоглосон нь спорт сонирхогчдын анхаарлыг дахиад л татав. Учир нь энэ жинд олимпын хүрэл  медальт, дэлхийн хошой аварга, гавьяат тамирчин С.Батцэцэг барилддагийг Та андахгүй биз ээ.Тэд ч шилдэг гэдгээ баталж, шигшээд шалгарсан. Аваргын төлөөх барилдаанд П.Орхон С.Батцэцэгийг оноогоор цэвэр ялан, түрүүлж, бас л шуугиулав.

Түүний найз залуу Н.Лхамгармаа

Мөн энэ жилийн УАШТ-д эрэгтэйчүүдийн 70 кг-д түүний найз залуу, Армийн дэлхийн аварга Н.Лхамгармаа аварга болж, анхны түрүүгээ хүртсэнийг нь дурьдахгүй өнгөрч боломгүй. Хар багадаа чөлөөт бөхийн дэвжээнээ танилцаж, өдгөө хоёр биенээ түшиж, тулж яваа нь тэдний амжилтад их нөлөөлж байгаа нь мэдээж.

Аваргыг ялж аварга боллоо

Аваргыг ялж аварга болдог гэдэг. Дэлхийн алдарт бөх С.Батцэцэг, К.Ичо нарыг ялж чадсан тэрбээр өнөөдөр ДЭЛХИЙН АВАРГА болж чадлаа. Тэрбээр алтын төлөөх барилдаанд  ДАШТ-ий алт, хүрэл медальт, Европын хошой аварга Украины Юлья Ткачийг 6:3-аар ялснаар Монгол Улсын алтан соёмбот далбаагаа Парисын тэнгэрт мандуулав. 

С.Баяр

Эх сурвалж: Zindaa.mn

П.Орхоны ДЭЛХИЙН АВАРГА болж буй бичлэг