“Малыш” Б.Энхтүвшин: Оюутолгой, оффшорын хэргийг цэгцэлсний дараа л С.Зоригийн хэрэг илэрнэ

      Монголын ардчилалын нэрт зүтгэлтэн Дэд бүтцийн сайд асан С.Зориг агсаны амь насанд халдаж, хэрцгийгээр хөнөөсөн хэрэг гарсанаас хойш 19 жил өнгөрөв. Амь насыг нь бүрэлгэсэн хэрэгт буруутнаар зарим хүнийг шалгаж ял шийтгэл оноосон. Гэвч хэргийн захиалагч хэн болох, дээрх этгээдүүд амь насанд нь халдсан гэмт хэрэгтнүүд мөн үү?.. гэсэн асуултууд эзэнгүй тэнүүчилсээр. Түүний багын найз, ардчилалын төлөө мөр зэрэгцэн тэмцэж явсан журмын нөхөр “малыш” Б.Энхтүвшинтэй уулзаж, хэргийн талаар цөөн асуултанд хариу авлаа...

-Өнөөдөр ардчиллын алтан хараацай гэгддэг С.Зориг агсан бусдын гарт харамсалтайгаар амиа алдсан эмгэнэлт өдөр. Нэгэн цагт мөр зэрэгцэж явсан нөхрийн хувьд хэргийн талаар ямар бодол, таамаглалтай байдаг бол?

-Бид хоёрын хувьд бол ерөнхий боловсролын сургуульд хамт сурч байсан Москвад хамт сурч байсан, их сургуульд хамт ажиллаж байсан. Ойр дотны хүн нь би. Өөрөөр хэлбэл... миний найз, миний найз гэж өмчирхдөг хүмүүс байдаг шүү дээ. Тэгж ярьдаггүй боловч хамгийн дотны найз нь ерөөсөө л би ганцаараа. Би дотны найзынх нь хувьд, цагдаагийн төлөөлөгч хүн учраас гурван өдөр сууж гүйцэтгэх ажлын мэдээллийг танилцуулах санал өгч байсан. Миний дотны найз учир миний үүрэг гэж бодсон удаа бий. Ийм хүнд гэмт хэргийг илрүүлэх нэр төрийн хэрэг. Албыг нь хашиж байгаа хүн биш учраас бусдад бололцоог нь олгох хэрэгтэй. Энэ хэргийг илрүүлэх тийм төвөгтэй ч юм биш. Гэхдээ  одоо нэлээн төвөгтэй болчихлоо. Төвөг бий болсон учраас ойрын оролцогч би болж байна. Захиалагч байгаа нь тодорхой байна. Хамааралтай улсуудын /хүмүүсийн/ хүрээ их болсон байна. Ийм нөхцөл байдлаас болоод, хуулинд заагдаагүй тохиолдлоор “нууц” гэдгээр хаалт хийсэн байна. Тэгсэнээрээ бас ч муу биш. Цаашаа олон гогцоо асуудлыг нээх бололцоо олгож байгаа юм. Хамрагдах хүрээ өргөн байдаг юм байна. Ганцхан захиалагч, зохион байгуулагч гэдгээр зогсохгүй байна. Бүр холын оролцогчид байна. Хамгийн наад захыг нь аваад үзэхэд хуулийг буруу ашиглаж,  нууц хүрээ үүсгэхээс гадна яг энэ хүрээнд албан тушаалын гэмт хэрэг үйлдсэн байна. Энэ хэрэг Оюутолгойгоос шим хүртэж байгаа болон офшор данстануудын асуудлуудыг шийдээд ирэхээр нэг тийш болно.

-С.Зориг агсаны амь насанд халдсан эл хэрэгт холбогдуулан хүмүүст ял шийтгэл оноосон. Таныхаар бол яг ч эцэслээд шийдчихээгүй юмаа даа?

-Одоо дараагийн асуудал болсон. Тэр бол нэг хэсэг  эхний асуудал байлаа шүү дээ. Удаан хугацаанд нөхцөл бүрдэж байсан. Зарим мэргэжлийн хүрээний хүмүүстэй ярихад энэ одоо дахиад удчихлаа л даа... гэж байна. Ер нь ихэнх гэмт хэргийн сэдэлт шунахайн сэдэлтэй байдаг. Энэ бол цэвэр шунахайн сэдэлт. Шунахай гэхээр, эд хөрөнгийг шунал, албан тушаалын болон бусад шунал байна, тийм ээ? Гэхдээ энэ хэрэг илэрнэ. Энэ хэмжээнд хүртэл авч ирж илрүүлэлтийг нааштай болгосонд нь талархаж байгаа. Анхнаас нь ингэж тусгайлан хийж байгаа нь тактикын асуудал байсан байх.

-Захиалагчийн тухайд. Олон нийт бол дээрх хүмүүст буруу өгөхгүй байна. Захиалагч нь хэн болох түүнийг ил болгохыг хүсээд байх шиг...?

-Энэ хэрэг бол захиалагчтай. Тухайбал зохион байгуулагч ойр холын оролцогчид хамаарлын хүрээ гээд их зүйл бий. Хуулинд байдаггүй зүйлийг би бас яриад байна шүү дээ. Эрүүгийн хуулинд бол захиалагч гэж бий, зохион байгуулагч гэж бий.Тэгхээр энэ хэрэгт  хамаарлын хүрээ бол байна. Ойр, холын зайнаас оролцсон оролцоо байна. Үүнийг их өргөн хүрээтэй цаашаа авч явах байх.

-Хэрэг хэзээ эцэслэн шийдэгдэх бол. Таамаг, багцаа бий болов уу?

-Дээр би хэлсэн. Оюутолгойн ашиг шимээс хүртэгсэд, офшор данстнуудын асуудлыг цэгцэлчихвэл... гэж. Тэнд асуудлын олон гогцоо зангилаа нуугдаж байгаа. Тэгэх юм бол цаанаас нь энэ хэрэг тодроод гараад ирнэ. Ер нь асуудал нааштай болсон.

Л.Ганзул

www.zindaa.mn