“Багш нарын цалин нэмүүлэх түр хороо”-ноос гаргасан хүсэлтээр БСШУС-ын сайд Ц.Цогзолмаа өнөөдөр багш нарын төлөөлөлийг хүлээн авч уулзлаа.
Шинэ Засгийн газрын анхны хуралдаанаар хэлэлцсэн яаралтай шийдэх 2 асуудалд өвөлжилтийн бэлтгэл, багш нарын цалин хөлсний нэмэгдлийг шийдэх тооцоо судалгааг Нийгмийн гурван талт түншлэлийн хүрээнд яаравчлан хийхийг үүрэг болгож энэ хүрээнд яамдуудын хамтарсан ажлын хэсэг байгуулагдаад ажиллаж байгааг сайд мэдээллийнхээ эхэнд танилцууллаа. Салбарын яам болоод хамтарсан ажлын хэсгийн гаргасан тооцоо судалгаанд үндэслэн 2017 онд багтаан багшийн үндсэн цалинг 30-аас доошгүй хувиар нэмэх байр суурьтай байгаа, мөн багш нарын урамшууллыг нэмэх гэсэн 2 чиглэлээр цалингийн эх үүсвэрийг судлан ажиллаж байгаагаа сайд Ц.Цогзолмаа хэллээ.
"Багш нарын цалин нэмүүлэх түр хороо"-ны Ерөнхий зохицуулагч Ц.Мөнхтуяа хэлэхдээ: Багш нарын цалинг 1сая 600 мянга хүргэх тооцоо судалгааг мэргэжлийн хүмүүст хандаж байж гаргасан үндэслэлтэй тоо байгаа. Багш нар шууд 1 сая 600 төгрөгний цалин авна гэж хэлэхгүй. Үндэслэлтэй, үе шаттай нэмүүлэх хүсэлт тавьж байгаа. Тиймээс өнөөдөр багш нарын түр хорооны гишүүдийн төлөөллийг хүлээн авч уулзаж Засгийн газрын болоод салбарын яамны зүгээс барьж байгаа бодлого чиглэл, хийж байгаа ажлаа танилцуулж хамтарч ажиллаж байгаа нь энэ асуудлыг хамтдаа шийдэх, зөвшилцөж зөв гарц шийдлийг олох алхам гэж харж байна гэлээ. Багш нарын цалин нэмүүлэх түр хорооны тавьж байгаа шаардлага бол цалинг үндсэн цалингийн 50 хувиас эхэлж нэмүүлэх хүсэлтэй байгаа. Харин урамшууллын хувьд багш нарын гар дээр олигтой нэмэгдэл ирдэггүй. 2017 оны төсөвт суусан үр дүнгийн урамшуулал 45 хувиар олгогдох ёстой ч 23 хувиар өгч байгааг судлаж хянаж өгөхийг сайддаа хандаж хэллээ.
Уулзалтаар багшийн хөдөлмөрийн үнэлэмжийг нэмэх, бодиттой болгох, багшийн нийгмийн хамгаалал, мэргэжлийн ур чадвар гээд ер нь системийнхээ хэмжээнд өөрчлөлт ахиц дэвшлийг хамтарч хийх талаар харилцан санал солилцож асуудалд уян хатан, ул суурьтай, бодит тооцоо судалгаанд үндэслэн цаашид хамтарч ажиллахаар ярилцлаа.
Сэтгэгдэл ( 4 )
хулгай хийх мөнгөний 10%-иа хасчих.Тэгээд л нэмчихэж болно
Хөөрхий энэ албан тушаалын төлөө яахаас ч буцахгүй болсон энэ авгай багш нарын төлөө юм хийж харагдаач. Боловсролоор тоглохдоо, тоглоно.
Өнгөрсөн жилийн элсэлтийн шалгалтаар Монгол хэлний шалгалтанд орсон хүүхдүүдээс хоёрхон нь авах оноогоо авсан гэсэн мэдээлэл гарч байсан. Минийхээр бол энэ нь багш нарын ажлын үр дүнгийн үзүүлэлт. Баянхонгорын Галуут сумын Мандалын багт 9-н сурагчтай, 11 ажилтантай сургууль байна. Харамсалтай нь тэр сурагчид нь анги дэвшээд сумынхаа сургуульд очиход хамгийн хоцрогдолтой сурагчид болдог юм байна. Тус сургуулийн багш нар нь цалин нэмүүлэх хөдөлгөөнд нэгдчихсэн гэж байгаа. Боловсролын тогтолцоо гэж нэг иймэрхүү.
Хөөрхийдөө энэ багш нар юу хийчихээд улс орон тун хэцүү, хүнд байдалд орчихоод байхад цалингаа нэмүүлэх гээд байгаа юм бол. Цалин 2 дахин нэмэгдлээ маргааш нь худалдан авдаг өдөр тутмын хэрэглээнийх нь барааны үнэ 3-4 дахин нэмэгддэг гэдгийг ойлгодоггүй, мэддэггүй хэрэг үү?