Орост бага зэрэг халамцуугаар жолоо барихыг зөвшөөрч магадгүй

ОХУ-д авто тээврийн жолоо мушгиж байгаа хүн цоо эрүүл байх ёстой гэсэн хууль үйлчилдэг. Тэгвэл 2009 оноос хойш мөрдөгдөж байгаа “хуурай хууль”-ийн заалтыг зөөлрүүлж магадгүй гэсэн яриа хэвлэлд гарчээ. "Аргументы недели" сонин Төрийн Думын гишүүнээс авсан гэсэн тайлбартайгаар дээрх мэдээллийг цацсан байна. Думын хэсэг гишүүд “Замын хөдөлгөөний аюулгүй байдлын тухай хуульд нэмэлт өөрчлөлт оруулах тухай” хуулийн төслийг боловсруулсан бөгөөд үүнд жолоочийн цусанд 0.2-0.3 промилль спирт байж болно гэсэн заалт орж байгаа аж. “Одоогийн байдлаар ОХУ-ын Замын хөдөлгөөний аюулгүй байдлыг зөрчсөн тохиолдлын дийлэнхийг цуснаас нь 0.2 промилль спирт илэрсэн, өөрөөр хэлбэл жаахан амсчихаад машин жолоодсон зөрчил эзэлж байгаа. Ийм хэргээр Шүүгдэж байгаа олон жолооч байна. Хэрвээ хуульд өөрчлөлт орвол эдгээр жолооч нарын хэрэг хэрэгсэхгүй болох юм” гэж уг депутат ярьжээ. Түүнээс гадна “Архи огт хэрэглэхгүй байх” хууль нь замын цагдаа нарыг авлигад автах гол шалтгаан болж байгааг тогтоожээ.  

С.Төгөлдөр