Төрийн нарийны суудлаас түмэнд “танигдсан” Сайд Ж.Бат-Эрдэнэ

Зунжин, намаржин олныг шуугиулан байж байгуулагдсан Засгийн газар эмх журмандаа оров. Энэ удаад тус Засгийн газрын Зам тээврийн сайд Ж.Бат-Эрдэнийг Zindaa.mn сайт онцолж байна.

 Булган аймгийн Хутаг-Өндөр сумын харьяат гэгддэг тэрбээр өмнө нь  Зам тээврийн салбарт Төрийн нарийн бичгийн даргын хариуцлагтай албыг хашиж байсан туршлагатай нэгэн билээ. Булган аймгаас УИХ-ын сонгуульд нэр дэвшиж, сонгогдсон Ж.Бат-Эрдэнэ моринд хорхойтой нэгэн. Улсын наадамд морь айрагдуулаад үзчихсэн догь уяач. Тэр “хоббигоороо” УИХ-ын дарга М.Энхболдтой дөрөө харшдаг биз. УИХ-д сонгогдохоосоо өмнө Булган аймгийн Уяачдын холбоог тэргүүлж, хөдөөний хусуур сойз зүүсэн дэвэргэн уяачдын цөсийг хөөргөж явав. Хоёр жил орчим Булган  аймгийн МАН-ын даргаар ажиллаж, тэндээ суурь сахиж байгаад, УИХ-д үзчихсэн сүйхээтэй эр. Ер нь Булганыхаа тойргийг алдахгүйн тулд хоёр жил “усласан”-ны хүчинд УИХ-ын гишүүнээр сонгогдсон хүн л дээ.

 Айл болгоны уяаны шонг хоёр жил эргэчихэд жирийн малчид гэрийн эзнийхээ энтэй дотносолгүй яахав. Тэгээд л “таньдаггүй бурханаас, таньдаг чөтгөр дээр” гэж үзсэн биз... Түүний өрсөлдөгч аргагүй гэнэн, дуу цөөтэй хүн байж таарсан нь ч аз болсон байлгүй. АН-ын нэр дэвшигч UFC группын ерөнхийлөгч О.Амартүвшин гэх залуухан “наймаачин” туршлага дутаад түүнд “уначихсан”. УИХ-ын сонгуулийн өмнөхөн тэрбээр өөрийн фейсбүүк хуудсаар дамжуулан амьдралын түүхээ эгээ л зохиолч шиг өгүүлсэн нь олны сэтгэлд нийцсэн нь дамжиггүй. Арван жилийн онц сурлагатай хүүхэд дээд сургуулийн шалгалтандаа уначихаад их ичсэнээ ч дэлгэсэн нь хүний хайр татсан байлгүй. Сонгууль болдогоороо болсон учир одоо мэдээж өнгөрсөн асуудал. Нүдээрээ инээж, дарууханаар ярьж явдаг тэрбээр холын бодолтой хүн гэдгээ хэдэнтээ харуулсан. Засгийн газар огцрохын өмнөхөн Ерөнхий сайд асан Ж.Эрдэнэбатад нэгэн төсөл өргөн барьсаныг санаж буй биз ээ. “Хуулийн дайтай төсөл боловсруулсан гавьяатай эрхэм” гэх зэргээр сэтгүүлчдийг өөрийн өмнөөс дуугаргаад авсан санагдана.

 “Шинэ хөдөө ” нэртэй дээрх төсөл мах сүү, жимс ноос ноолуур зэрэг хөдөө аж ахуйн бүтээгдэхүүний үйлдвэрлэлийг дэмжнэ гэдэг утгаараа тийнхүү сэтгүүлчдийн сэтгэлийг хөдөлгөсөн биз. “Төрийн сайд гэдэг Төрийн нарийн биш шүү...” гэсэн хоржоонтой  үгээр УИХ-ын гишүүн Л.Болдоор ”дайлуулан” ажлаа хүлээж авсан тэрбээр хэд хэдэн ажил санаачлан Төрийн сайдын албаа эхлүүллээ. Тухайлбал, Ж.Бат-Эрдэнэ салбарынхаа тулгамдаж буй асуудлуудтай  саяхан танилцав. Энэ үеэр салбар байгууллагуудад тодорхой үүрэг чиглэл өгсөн байна. Тодорхой хэлэхэд, Тавантолгой-Гашуунсухайт, Нарийнсухайт-Шивээхүрэн чиглэлийн төмөр замын ажлыг хэрхэн үргэлжлүүлэх талаар тодорхой санал боловсруулах үүргийг Монголын төмөр зам ТӨХК-д даалгалаа. Мөн Төмөртэйн төмөр замтай холбогдох бүх материал, баримт бичгийг танилцуулах үүргийг ч өгсөн байна.

 Түүнчлэн УБТЗ-ын нэн түрүүнд хийж хэрэгжүүлэх шаардлагатай их засварын ажил, Сайншанд-Агь-Сүмбэт чиглэлийн хоёр дахь төмөр замыг барих асуудал болон зүтгүүр вагон шинэчлэхэд шаардлагатай санхүүжилтийн талаарх саналаа боловсруулж, танилцуулахыг даалгав. Түүнчлэн Бүс нутгийн логистикийг хөгжүүлэх төслийн ажлыг эрчимжүүлж 2018 онд бүрэн дуусгах үүрэг даалгаварыг өгсөн зэрэг тодорхой чиглэлийг гаргаж, дээрх даалгаврын хариуг хүлээж авах өдрөө зарласан байна. Ямартаа ч тэрбээр Замчдын баярын өдөр буюу энэ сарын 30-нд Авто замын эхлэл цэгт хүндэтгэл үзүүлсэн. Сайдын ажлын зам, цаашдын өндөр карерийн замаа еслол төгөлдөр эхлүүлсэн гэлтэй. Энэ уруул жимийж, нүдээрээ инээсэн царай нэгэн бол их ажилсаг, хэлсэнээ хийлгэдэг даргын царай, эсвэл олны таамаглаж буйгаар зальтай хүний шинжийг  илтгэнэ. Алин болохыг цаг хугацаа харуулах тул илүүг нурших хэрэггүй бизээ.

З.Говьсайхан

www.zindaa.mn