Т.Энхболд:Санхүүжилт шийдэгдэхгүй бол газраа Хятадуудад худалдана

Дархан-Уул, Сэлэнгэ  аймгийн ахмадуудыг орон сууцтай болгохыг шаардан Тусгаар тогтнолын  талбайд дөнгөтэй суулт хийсэн иргэн Т.Энхболдоос зарим зүйлийг тодрууллаа.

-Намайг Товуудоржийн Энхболд гэдэг. Би Дархан-Уул аймгийн уугуул иргэн. 2012 Ахмадын орон сууцны хөтөлбөр санаачлан эхлүүлсэн. Монголд анхны тохиолдол гэж болно. Тухайн үед УИХ-ын гишүүн Д.Хаянхярваа, С.Ганбаатар нарт хандахад санхүүжилтийг шийдвэрлэх боломжтой гэсэн ч өнөөдөр  гацчихлаа.

-Суултаа нойтон өлсгөлөн болгоно гэсэн үү?

-Маргаашнаас нойтон өлсгөлөн зарлана. Ерөнхийлөгч, ЗГХЭГ-ын дарга, Сангийн сайд, Хөдөлмөр, нийгмийн хамгааллын сайд нараас ямар нэгэн тодорхой хариулт өгөхийг хүсээд байгаа юм. Санхүүжүүлж чадна, чадахгүй гэсэн.

-Эдгээр албан тушаалтны хэн нэгнээс хариулт ирээгүй юу?

-Ерөнхийлөгчийн зөвлөх гэж хүн ирж уулзаад  Ерөнхийлөгчөөс ямар тус авмаар байна гэсэн. Ерөнхийлөгч шийдвэр гаргах ёстой биз дээ. Би зургаан жил хөөцөлдөж байна. Авлига авах гээд байгаа юмуу. Би өгвөл ахмадын орон  сууцны дээврээс дутна шүү дээ. Хэрэв санхүүжилт шийдвэрлэгдэхгүй бол газраа хятадуудад зарахаас аргагүй.

-Нойтон өлсгөлөн зарлахад эрүүл мэндийн байдал  шалтгаална. Та зохих газарт хандсан уу?

-Чингэлтэй дүүргийн Засаг даргаас суулт хийх зөвшөөрөл авах гэж есөн сар зургаа хоног явсан. Нойтон өлсгөлөн зарлахаар боллоо гэхэд “Би мэдэхгүй. Шүүхэд хандаж, эмчийн магадлагаа ав гэсэн. Эмнэлгийн даргатай нь уулзахаар би мэдэхгүй, Засаг дарга, дүүргийн цагдаа мэднэ гэх юм.

 Д.Амар

www.zindaa.mn