Жигүүр ургуулдаг Ө.Энхтүвшин буюу ”ХЭРЭГГҮЙ” САЙД

Шинээр байгуулагдсан Засгийн газрын сайд нарыг танилцуулах цуврал үргэлжилж байна. Энэ удаад Монгол улсын Шадар сайд Ө.Энхтүвшинг zindaa.mn онцоллоо.

 Намын нөхдөдөө захидал илгээж, Монгол Улсын 30 дахь Ерөнхий сайдын сэнтий өөд зүтгээд, хүчээ мэдрээд авсан Ө.Энхтүвшин “сонирхож” байсан Засгийн газартаа Шадар сайдын албанд тохоогдсон. Үүнийг нь "Ерөнхий сайдын суудалд ойрхон суулаа" гэж хөндлөнгийн “ажиглагчид” жиргэцгээж байна. Өмнө нь буюу 2014 онд МАН-ын дарга М.Энхболдод хандаж, албан тушаалын томилгооны асуудлаар захидал бичиж байсан “туршлага” түүнд бас бий. Захидал бичихийн хувьд бол гаршсан, эмзэг цэгийг үзгээр “хатгахдаа” тун мэргэн хүн ч гэж ярьцгаадаг.

 Цаг хүндхэн байхад намын даргын суудалд сууж, МАН-ын нөхдийн дээрээс харж, захирч тушааж явсан тэрбээр Шадар сайдын албан үүргээ хүлээж авсан даруйдаа "хамгийн хэрэггүй хүн” гэдэг нэр зүүсэн. Учир нь Отгонтэнгэр ууланд осолдсон уулчдыг эрж хайх үйл ажиллагааны үеэр Шадар сайдтныг, сандарч мэгдсэн, эрэл хайгуулд анхаарлаа хандуулсан хүмүүсийн ажилд садаа болсон гэж олон нийтийн мэдээллийн хэрэгслээр шуугив. Хоол унд зөөлгөж, тух эрсэн гэж ч буруутгуулаад авлаа.  Нисдэг тэргээр Отгонтэнгэр хайрханыг хоёронтоо тойрч, эрэл хайгуулын ажиллагаанд оролцсоноо “илтгэсэн”-ийг нь ямбалсан гэж үзэцгээж, түүний зүг мөн л чичилцгээв. 

 Шадар сайд хүн зовж зүдэрсэн, гай гамшиг тохиолдсон, зуд турханд нэрвэгдсэн болгоны зүг сэтгэл чилээх учиртай. Улс эх орны хэмжээний найр наадмыг ч ахлах үүрэгтэй. Өөрөөр хэлбэл ард түмний жаргал, зовлонг хуваалцах хамгийн ойрын хүн юм. Тэр ч үүргийнхээ дагуу тийш мордсон нь тийм гомдол дагуулав. Ерөнхий сайд У.Хүрэлсүх Шадар сайдаар ажиллаж байх үедээ түймэр унтраалцаж, Тавантолгойн тоос шороон хөшигт замаар нүүрс зөөдөг асуудлыг цэгцлэхэд, биечлэн үүрэг өгч ажиллаж байсан нь саяхан. Түүнтэй жишиж харсан биз. Ө.Энхтүвшин сайдын хувьд улс төрд шинэ хүн биш. Дургүй нь хүрвэл нам дотроо жигүүр энэ тэр байгуулаад, “дайчин” шинжээ дөвийлгөж сүрийг үзүүлж ч чаддагийг нь хүмүүс мэднэ. МАН-ын намын суудалд нэгэнтээ тухлаад авсан нь тэр “сүр хүч”-нийх нь буян гэж харагддаг. Сайдын суудалд ч заларч үзсэн туршлага түүнд бий. БСШУ-ны Сайд, ЗГХЭГ-ын даргаар ажиллаж, УИХ-д хэдэнтээ сонгогдсон нь түүнийг том байр суурьтайн дээр, аливаад ултай хандахаар болсоныг илтгэнэ. Тэр ч утгаар нь ард түмнээ мэдэрнэ, ойлгоно гэж Шадар сайдын албанд томилсон нь гарцаагүй. Гэвч түүнийг БСШУ-ны сайдаар ажиллаж байх үед буюу 2007 оны хичээлийн шинэ жил зутруухан эхэлж байсныг олон түмэн мартаагүй байх. Олон сургуулийн засварын ажил дуусаагүй, шинэ сургуулийн барилгууд тогтоосон хугацаандаа ашиглалтанд орж амжаагүйгээс, эсгий гэр, сумын клуб, Засаг даргынхаа албан конторт хүүхдүүд номын дуу сонсож байв. Ажил хийгээгүй биш хийсэн. Даанч цагтаа амжаагүйн улмаас тэр л дээ. Тэр нь түүнд сургамж болж үлдсэн биз.

 УИХ дахь МАН-ын бүлгийн даргаар сонгогдчихоод хуулийн хугацаанд УИХ-ын даргад танилцуулаагүйгээс болж, зургаан сарын хугацаанд намаа УИХ-д бүлэггүй суулгасан нэгэн бурууг тэр үүрч ирсэн. Монголын агуу эх орончдын нэг Шадар ван Чингүнжавын нутаг буюу Хөвсгөл аймгийн Цагаан-Уул сумын харьяат тэрбээр түүхч, түүхийн багш мэргэжилтэй нэгэн. Өссөн төрсөн нутаг, өвөлсөн сурсан эрдэм мэдлэгийг нь хөөвөл яалт ч үгүй Монголын төлөө цохилох зүрх, зүтгэх сэтгэлтэй хүн гэмээр. Монголын сэтгүүлзүйн салбарт ч нэлээд хэдэн жил зүтгэсэн хүн юм. “Ардын эрх”, “Үнэн” сонинуудад тоймчоос, эрхлэгчийн албыг хашиж байсан нь Ө.Энхтүвшин гэх энэ эрхмийн бас нэгэн давуу чанарыг илтгэнэ.

 Сэтгүүлчийн ажил гэдэг нийгмийн аль ч давхаргыг мэдүүлдэг, таниулдагаараа давуу талтай. Энэ мэргэшил нь  ч түүний Шадар сайдын ажилд дэм болох билээ.   Засгийн газрын ээлжит хуралдаан өнгөрсөн аравдугаар сарын 25-ны өдөр болоход Шадар сайд Ө.Энхтүвшинг Монгол-Оросын Засгийн газар хоорондын Монголын хэсгийн, Монгол-Хятадын Засгийн газар хоорондын Монголын хэсгийн, Эрдэс баялаг, эрчим хүч, дэд бүтцийн Монгол-Хятадын зөвлөлийн Монголын хэсгийн даргаар давхар тохоон томилсон юм. Тэгэхээр Шадар сайдын нуруун дээр урд, хойд хоёр хөршийн Засгийн газартай Монголын Засгийн газрыг төлөөлөн харилцах эрхэм үүрэг оногджээ. Ямартаа ч Ерөнхий сайдыг орлоно гэдэг өөрийнх нь мөрөөдөл биелсэнтэй агаар нэг санагдаж байгаа биз ээ. 

З.Говьсайхан

www.zindaa.mn