МБХ: Зээлийн хүүг захиргаадлын аргаар хязгаарлах нь эдийн засгийн хөгжлийг ухраана

УИХ-ын нэр бүхий гишүүд  банкны зээлийн хүүгийн дээд хэмжээг жилийн 18 хувийн хүүгээр хязгаарлах тухай хуулийн төсөл боловсруулж УИХ-д өргөн мэдүүлээд байгаа юм. 

Энэ асуудлаар Монголын Банкны Холбооноос мэдэгдэл гаргажээ. Тус мэдэгдэлд "Монгол Улсад банк, санхүүгийн байгууллагын зээлийн хүүг захиргаадлын аргаар хязгаарласан аливаа хууль батлах нь хөрөнгө оруулалт, бизнесийн орчинг эрс муутгасан, санхүүгийн салбарт гажуудал үүсгэж тогтворгүй болгосон, эдийн засгийн хөгжлийг ухраасан ноцтой алдаа болохоор байна.    

Хоёрдугаарт, Дэлхийн 80 орчим улс орны туршлага, олон улсын түвшний судалгааны үр дүнгээр банкны зээлийн хүүнд хуулиар хязгаар тогтоох оролдлогууд анхны зорилгодоо хэзээ ч хүрч байгаагүй. Харин эсрэгээрээ зээлийн эрсдэл нэмэгдэх, хүү өсөх, хүртээмж муудах, олголт буурах, санхүүгийн зуучлал эрс хумигдах, далд эдийн засгийг дэмжих, эдийн засгийн хөгжил, доройтол зэрэг сөрөг үр дагаварт хүргэдэг нь нотлогдсон.

Гуравдугаарт, төрөөс макро эдийн засаг, бизнесийн орчныг тогтвортой эерэг байлгах, нийт эдийн засгийн эрсдэлийг бууруулах, санхүүгийн салбарын дэд бүтцийг хөгжүүлэх замаар зээлийн эх үүсвэрийн өртөг хямдрах, зээлийн хүү буурах орчныг бүрдүүлэх нь чухал юм" гэжээ.

Түүнчлэн эдийн засагчдын хувьд ч "Банкны хүүгийн төрөөс хязгаарлах нь эдийн засагт сөрөг үр дагавартай" гэж үзэж байгаа юм.

Ш.Адъяамаа