Сэтгэлзүйч Г.Наранбаатар гэж хэн бэ

Өнөөдөр эерэг мэдээлэл гэхээсээ илүүтэй хар бараан мэдээллүүд түлхүү цацагдаж байгаа билээ. Улмаар хүмүүсийн бухимдал, стресс ч хэд дахин нэмэгдэх болоод байгаа. Нийгмийн энэхүү хүндхэн үед чадварлаг сэтгэлзүйч гэдэг хамгийн хэрэгтэй зүйлийн нэг. Тэгвэл сэтгэлзүйч нар дундаа танигдсан сэтгэлзүйч Г.Наранбаатарын талаар өгүүлье. 

 Түүний үндсэн мэргэжил бол гэр бүлийн зүйч бөгөөд хүүхэд байхаасаа сэтгэлзүйч мэргэжилд дуртай байжээ. Тэрбээр Америкт арав гаруй жил амьдарсан ба 2000 оноос Америкт сурч янз бүрийн ажил хийдэг байжээ. Тухайлбал, цэвэрлэгч, угаагч, сушины тогооч, машин буулгагч гэх мэт маш олон төрлийн хөдөлмөрийг эрхэлж байв. Энэ тухайгаа тэрбээр дурсахдаа "Эргээд бодохоор өнөөдрийн Наранбаатарыг бий болгосон учраас тэр үедээ би талархдаг юм. Учир нь ажиллаж сургалтын төлбөрөө олоод сургуульдаа явдаг байсан нь хичээлдээ шамдах нэг шалтгаан болсон" хэмээн ярьжээ.

Түүний амьдралд тохиосон нэгэн том боломж нь Холливудын алдарт найруулагч Кен Уиллстэй танилцаж түүний тусламжтайгаар докторт суралцах болсон явдал юм. Түүний сургалтын төлбөрийг төлснийхөө хариуд мэргэжлээрээ Монголдоо ажиллах болзлыг тавьсан байна. Улмаар Г.Наранбаатар 2012 онд доктор хамгаалснаас  хойш Монголд суурин ажиллаж байгаа юм. Тэрбээр Сэтгэлзүйчээр бакалавр, бизнесийн удирдлагаар мастер, гэр бүлийн сэтгэл засалчаар докторын зэрэг хамгаалжээ. Түүнийг хүмүүс сэтгэлзүйн илтгэлүүдээр нь болон “365 хоног аз жаргал” гэдэг номоор сайн таних билээ. Ингээд түүний ишлэлүүдээс хүргэе.

Та бол мөнгөний машин биш харин өөрийнхөө амьдрал хийгээд бусдын амьдралд аз жаргалын, хайрын амтыг нэмэх Хүн.

Хэрхэн аз жаргалтай өдрийг бүтээх вэ?

Бусдад талархлаа илэрхийл, 
Бусдад сайнаар ханд 
Зөрөөд өнгөрөх хэн нэгэнтэй харц тулгарвал инээмсэглэ 
Тайвшир, 
Бусдад аль болох их урмын сайхан үгсийг хэл 
Боловсон, зөв зохистой хувцасла, 
Үнэртэй ус хэрэглэ, 
Сонс & ажигла, дараа нь хариул 
Эелдэг бай, 
Инээ, 
Бусдыг ч бас өдрийг аз жаргалтай өнгөрөөхийг хүсээрэй

Заримдаа ухаантай байхаас эелдэг байх нь хамаагүй дээр. Цэцэн мэргэн үгс хэлэгдэхээс илүүтэйгээр тэвчээртэй сонсох зүрх сэтгэл бусдад хэрэгтэй байдаг.

Өнөөдрийн таны туулж буй хүнд хэцүү өдрүүд нь таны төсөөлөөгүй тэр сайхан аз жаргалтай өдрүүдэд хүргэх болно. Зоригтой бөгөөд тууштай байгаарай.

Таныг төрүүлж өсгөж, хүмүүжүүлж, хооллож, хувцаслаж хамгийн чухал нь хариу нэхэлгүй хайрлаж ирсэн аав ээжийнхээ ачийг бага ч болов хариулахын төлөө, Аз жаргалыг тань зузаатгаж, зовлонг тань нимгэлж байдаг ханийнхаа төлөө,

Танаас суралцаж, тань шиг болохыг хүсэж буй хүүхдийнхээ төлөө, Өнөөдрийг хүртэл олон асуудлыг даваад гарсан өөрийнхөө үнэ цэнэтэй амьдралын төлөө бүү шантар, бүү бууж өг! маргааш улам илүү ихээр зүтгэ, хөдөлмөрлө найз минь. Өнгөрсөн жил, өнгөрсөн 7 хоногт чадаагүй гэдэг нь ирэх 7 хоногт, ирэх өдрүүдэд чадахгүй гэсэн утгатай биш. Харин улам илүү хичээ гэсэн утгатай

Та аз жаргалтай байна уу? Тэгвэл сайн байна, гэхдээ хамгийн сайн сайхан нь хараахан ирээгүй байна. Та одоо байгаагаас ч илүү их аз жаргалыг авах эрхтэй хүн.

Б.Янжиндулам

WWW.ZINDAA.MN