Чансаа өндөр “World masters”-д 4 түрүүлсэн анхны жүдоч боллоо

Олон улсын жүдо бөхийн холбооны чансаа өндөр “World masters” тэмцээн ОХУ-ын Санкт-Петербург хотноо болж байна. 200 мянган ам.долларын шагналын сантай тус тэмцээнд 46 орны 212 жүдоч өрсөлдөх бөгөөд жин тус бүрийн чансааны тэргүүн 16 бөх урилгаар оролцдогоороо онцлогтой. Тэмцээний эхний өдөр буюу өчигдөр эрэгтэйчүүдийн 60, 66, 73, эмэгтэйчүүдийн 48, 52, 57, 63 кг жингийн барилдаанууд болж, аваргууд тодорлоо.

Хөдөлмөрийн баатар Д.Сумъяа дэлхийн шилдэг жүдочдын ”Мастерс” тэмцээнд дөрөв дэхээ түрүүлсэн анхын жүдоч болов. Мөн 48 кг-д гавьяат тамирчин М.Уранцэцэг хүрэл медаль хүртсэн бол  63 кг-д Б.Мөнгөнчимэг шагналт V байр орлоо.

Эрэгтэйчүүдээс Г.Хэрлэн 66 кг-ын жиндээ аваргалсан бол Гавьяат тамирчин Д.Амартүвшин хүрэл медаль хүртэж, 73 кг-д Г.Одбаяр шагналт V байрт орлоо. Манай жүдочид хоёр алт, хоёр хүрэл, мөн шагналт тавдугаар байрт хоёр жүдоч орж, багийн дүнгээр Японы ард хоёрт бичигдэж байна.

А.Уян

Эх сурвалж:Zindaa.mn