Монгол Улсад хар тамхины хэрэглэгчид хавтгайрсныг гэрчлэх баримтууд

Хар тамхины хор хөнөөл манай улсыг нэгэнт нөмөрчээ. Энэ бүхнийг ойр, ойрхон гарах хар тамхины хэргүүд бэлхнээ гэрчилж байна. Одод нэртэй олны танилуудаас эхлээд Монголын нөлөө бүхий баячуудын эрх жаалууд, өсвөр үеийнхний дунд хар тамхи хавтгайрчээ. Нийтэд ил болсон зарим хэргээс иш татъя.

Рок попын одод хар тамхины хэрэгт холбогдсон нь...

Монголын рок, поп дуучид 2006 оноос эхлэн хар тамхины хэрэгт холбогдон 2007 оноос ял хүлээж эхэлсэн. Залуусыг байлдан дагуулж, ид моодонд орж явсан "Айс топ" хамтлагийн дуучид анх удаа   энэ хэрэгт холбогдсон нь тухайн үед олныг шуугиулж байв.
Тус хамтлагийн дуучин Манлай, Коби мөн дижи Өөжий, Харангын Лхагваа гээд нэрлээд байвал нэлээн урт жагсаалт хөвөрнө. Зарим хэргийг нь дэлгэрүүлье.

Дижи Өөжий буюу Б.Ганболд
Дижи Өөжий гэдэг нэрээрээ залуусын танил болсон энэ залуу Бээжинд байхдаа Б.Рагчаабазарын захиснаар хар арьст залуутай уулзаж, түүнээс мансууруулах бодис авсан байдаг. Мөн Монгол Улсын хилээр удаа дараа оруулж ирсэн гэсэн буруутай. Энэ нь "Худалдаа хөгжлийн банк"-аар БНХАУ-руу мөнгө гуйвуулсан Б.Рагчаабазарын гарын үсэгтэй баримтаар тухайн үед хэрэг батлагдсан юм. Тэрбээр шүүхэд "Б.Рагчаабазар мөн ХААН банкаар дамжуулж 2000 юань гуйвуулсныг авч энэ мөнгөөр хар арьст залуугаас мансууруулах бодис авсан" гэсэн мэдүүлэг өгч байжээ. Түүнийг Монгол Хятад улсын хооронд найман удаа зорчсоныг Хил хамгаалах газраас нотолжээ.

Манлайжаргал
"Айс топ" хамтлагийн дуучин, 25 настайдаа хар тамхины хэрэгт холбогдов. Энэ залуу "Хар тамхи худалдан аваад өөрөө хэрэглэдэг байсан"-аа мөрдөн байцаалтын явцад мэдуулжээ.

С.Чулуунбаяр
"Айс топ" хамтлагийн дуучин. Мөрдөн байцаалтад "Судалж байгаад Б.Рагчаабазар гэдэг залуу зардгийг мэдэж, түүнээс худалдаж авдаг байсан" гэсэн мэдүүлэг өгсөн байна. Хар тамхи хэрэглэдэг байсан

"Салхи" хамтлагийн дуучин ч хар тамхины  хэрэгт холбогдов

 Энэ үеэр тэдэнтэй холбоотой гэгдэж байсан "Салхи" хамтлагийн дуучин Н.Алтанхуяг, "Монгол керамик" компанийн захирал Баярбат, тус компанийн орчуулагч н.Эрдэнэбат (Хавтаст хэрэгт түүнийг "Гайз 666" хамтлагийн дуучин гэж бичжээ), "Айс топ" хамтлагийн дуучин Ж.Бат-Оргил нарын залуус удаа дараа хар тамхи худалдан авч, хэрэглэсэн гэсэн мэдүүлэг байдаг.

"Гайз 666" хамтлагийнхан мансуурдаг нь нотлогдож байжээ
Мөн Дижитал хамтлагийн ахлагч, Хип хоп холбооны тэргүүн Баавар буюу Батбаяр, "Гайз 666" хамтлагийн дуучин н.Төгсбаяр, н.Мягмар, н.Лхагва, н.Бат-Ундрал нар мансууруулах бодис худалдаж авч хэрэглэсэн хэрэгт холбогдож, энэ нь ч нотлогдож байжээ.

Гэвч 2006 оны зургадугаар сарын 23-наас өмнө хэрэг хийсэн болохоор Өршөөл үзүүлэх тухай хуульд хамрагдаж хэрэгсэхгүй болсон байна.

Тэд ч бас хэрэглээд амжсан
Залуусын сонсох дуртай хөвгүүдийн "А-Сареllа" хамтлагийн залуус хар тамхи хэрэглэсэн хэргээр мөн цагдаад шалгагдаж байв.
Тодруулбал,  2009 оны 12 сарын 25-ны өдөр Хан-Уул дүүргийн I хороо Жаргалан хотхоны 29 дүгээр байрны орчим 08-87 УБП улсын дугаартай "Тоёота" машинд мансууруулах бодис хэрэглэж байсан бүлэг залуусыг цагдаа нар баривчилсан.

Тэд тус хамтлагийн дуучин Д.Төмөрчөдөр, Д.Мөнх-Од, Э.Мөнхтөр, Б.Мөнх-Од нар байсан юм. Үзлэгээс залуусын сууж явсан 08-87 УБП улсын дугаартай "Тоёота" машинаас тугалган цаастай бор өнгийн нунтаг мансууруулах бодис олдсоныг цагдаагийнхан эд мөрийн баримтаар хураан авч дуучин залууст хэрэг үүсгэн шалгаж эхэлсэн.

Харангын Лхагваа
Дээрх хэрэгт холбогдсон бусад хамтлаг дуучдын хувьд хөнгөн ял авч ялаа эдлээд гарцгаасан.

Харин Х.Лхагвасүрэнгийн хувьд хар тамхи хэрэглэсэн төдийгүй бусдад зарсан гэдэг үндэслэлээр чанга дэглэмтэй хорих ангид 10 жилийн хорих ял авсан.

Давж заалдах шатны шүүхээр ч мөн энэ ялыг хэвээр үлдээснийг рок попынхон төдийгүй фенүүд нь ч эмзэглэн хүлээн авч, хар тамхины хэргээр ял авсан дуучин маань 409 дүгээр хорих ангид ялаа эдэлж байгаад өршөөлөөр суллагдан гарсан.
Лхагваа хоригдож байх хугацаандаа ч уран бүтээлээсээ холдож хөндийрөөгүйгээр барахгүй тус хорих ангийн сайн дурын уран сайханчдыг удирдан "Тоосго" нэртэй хамтлаг байгуулж уран бүтээлээ туурвиж байлаа

Х.Бат-Ундралд оноосон хоёр жилийн ял

Хар тамхины хэрэгт холбогдож, Эрүүгийн хуулийн 192.1-ээр буруутгагдсан “Guys” хамтлагийн гишүүн Х.Бат-Ундралд холбогдох хэргийн шүүх хурал өнгөрсөн оны 10 дугаар сарын 10-ны өдөр Хан-Уул дүүргийн Эрүүгийн хэргийн анхан шатны шүүхэд болов. Шүүхээс түүнийг гэм буруутай хэмээн үзэж, хоёр жил хорих ял ногдуулж мөн хугацаагаар тэнсэж хянан харгалзав. Энэ нь тэнсэнгийн хоёр жилийн хугацаанд ямар нэгэн гэмт хэрэг үйлдэхгүй. Хэрэв гэмт хэрэг үйлдвэл хорих ял эдэлнэ. Түүнчлэн Х.Бат-Ундрал шүүх хуралдааны үеэр хийсэн хэрэгтээ маш их гэмшиж байгаагаа илэрхийлээд уран бүтээлээрээ дамжуулан тамхины хор уршгийг залууст сурталчилна хэмээн амласан юм. Тэрбээр үүнээс өмнө хамтлагийн гишүүдийн хамт хар тамхины хэрэгт холбогдож байсныг дээр өгүүлсэн.

Баячуудын хүүхдийн зугаацал хар тамхи болсон уу?

Хар тамхины хэрэгт холбогдсон залуусын ихэнх нь баячуудын, тэр тусмаа Монголын нөлөө бүхий эрхмүүдийн үр хүүхэд байдаг нь олон жишээгээр ил болж байна. Үүнийг гэрчлэх хар тамхины дуулиант хэрэг бол мансуурсан үедээ 12 давхрын өндөр барилгаас унаж нас барсан залуугийн хэрэг юм. Талийгаач Монголын нэртэй жүжигчний хүү байсан бөгөөд түүнтэй хамт 12 залуу байжээ. Тэдний дунд Женко Х.Баттулгын хүү Хүлэгү, ТӨХ-ны дарга асан, ҮХЦ-ийн гишүүн Д.Сугарын хүү С.Цог, Монгол банкны Ерөнхийлөгч асан С.Чулуунбаатар агсны хүү, Бриджийн Ганхуягийн хүү Түмэндэмбэрэл болон COLORS хэмээх нэртэй амьд хөгжмийн хамтлагийн гишүүд байсан талаар эх сурвалжууд мэдээлж байв. Түүнчлэн "Нарантуул" захын босс Ш.Сайхансамбуугийн хүү С.Наранбат, "Хар хорин" захын боссын хүү Цэгцбаатар гээд хар тамхины хэрэгт нэр холбогдсон олон хүнийг нэрлэж болно.

Хар тамхины хэрэгт төрийн сайдын нэр холбогдсон нь...

Өнгөрсөн оны есдүгээр сарын 22-ны өдөр Эрүүгийн цагдаагийн газрын Хар тамхитай тэмцэх хэлтсийн алба хаагчид хар тамхи худалдсан, худалдан авсан гэх найман хүнийг нийслэлийн Баянзүрх дүүргийн нутагт дэвсгэрээс баривчилж байв. Уг хэрэгт Б, Э, Э, Э нарын найман хүнийг сэжигтнээр татан шалгаж байсан бөгөөд хэргийн газраас хар тамхи мансууруулах төрлийн бодис болох каннабисын төрлийн хатаасан ургамал, түүнийг татах хэрэгслийг эд мөрийн баримтаар хураан авсан байдаг..

Дээрх этгээдүүдийн дөрөв нь өмнө нь хар тамхины хэрэгт холбогдон жил гаруйн хугацаанд хуулийн байгууллагад шалгагдаж, хавтаст хэрэг нь шүүх рүү шилжсэн байх хугацаанд давтан гэмт хэрэг үйлдсэн байдаг бол энэ хэрэгт холбогдсон найман иргэний хоёр нь төрийн албан хаагч, тэдний дунд төрийн  сайдын  нэр хүртэл байсан юм.

Ийнхүү хар тамхины хэрэгт холбогдсдын баримтыг дурдаад байвал дуусашгүй. Улсын начин хүн хүртэл хар тамхины хэрэгт яллагдаж, шүүхийн хаалга татаж байсныг хүмүүс мартаагүй.

Энэ бүхэн бол Монгол Улсад хар тамхины хэрэглэгчид хавтгайрсныг гэрчилж байгаа юм. Ил болсон нь л энэ болохоос бус илрээгүй, илэрсэн ч хуулийн байгууллагаар шалгагдаж байгаа хэчнээн хэрэг байгааг хэлж мэдэхгүй юм.  Хамгийн гол нь хар тамхины хэрэг ойр, ойрхон давтамжтай гарах болсонд хуулийн байгууллагынхан болоод холбогдох албаныхан анализ хийх цаг болжээ.

Уг нь манай улс хар тамхитай хатуу тэмцэх төрийн бодлоготой гэдэг ч тэр нь хэрхэн, хэнд үйлчилж байгаа нь үнэхээр хачирхалтай. Хар тамхины хэрэгт холбогдсон "эрхмүүд" шүүхээс тодорхой хэмжээний ял сонсдог ч Өршөөлийн болон өөр бусад хуулийн цоорхойг ашиглан ял завшсаар байна.

С.Баяр

 Эх сурвалж: Zindaa.mn