Р.Эмүжин: ”Бандааш хочит Гантулга NextTop наадмын нэр хүндээр шал арчих нь”

“БАНДААШ” нэрээрээ нийгэмд нэрд гараад буй “эр”-ийн талаар нэрт нийтлэлч Р.Эмүжин ийн бичжээ. Тэрбээр “Төр, төмсөг хоёр” хэмээх нийтлэлдээ

“Энэ алиалагчийг одоо яг яах ёстой юм бол оо? Ямартай ч " Энканто" спорт цогцолборыг нэг хэсэгтээ хүн орох аргагүй болгосон "Бандааш" хочит Гантулга 25 дахь жилдээ зохиогдож буй "Next stop" наадмын нэр хүндээр шал арчих нь.

Оны шилдэг бүтээгч улстөрч хэмээн өөрийгөө өргөмжлүүлэх гэж нэр дэвшсэн энэ мангар бацаан одоо болтол цаасан малгайндаа цадиггүй эрдээд явах юм. Улстөрчийн хувьд түүний карьер аль эрт дууссан. Хувь хүнийхээ хувьд бас л хэн ч биш болсон.

Оны шилдэгээр шалгараад, овоохон мөнгөөр хэвлэлийнхний амыг хаачихвал эмтэрсэн нэр хүнд нь бүтэн болж, инээсэн царай нь дэмжлэг хүлээнэ гэж андуураад л байгаа юм даг уу даа. Мөн ч том төөрөгдөл шүү. Хан Хэнтийчүүд сонгоод илгээсэн хүнээ нутаг усны нэр бузарлалаа хэмээн эргүүлэн татахаар хэдэнтээ жагссан. Нэр холбогдсон ичгүүрт хэргээрээ тэрбээр эмс охидын амны зугаа болж, эрчүүдийн элэг доог болсоор удлаа.

Уг нь уснаас гайгүй нороод гарчих боломж түүнд байсан. Харамсалтай нь Монгол төрийн ордонд ор хөнжлийн явдлынхаа талаар дайнд ялсан баатар мэт зарлан эргүүтэж, төр төмсөг хоёрыг хольж хутган тэнэгтсэнийг бид бүгдээрээ л харсан. Айл хэсээд хоног төөрүүлж явдаг, хоносон айлдаа уртаас урт сүүл үлдээдэг ийм хууль батлагч Монголын парламентад хэрэггүй. Дахин хэлье, хэрэггүй. Үнэхээр тухайн хэрэг болсон ч бай, үгүй ч бай төрөө хайрлаад парламентийн гишүүнээс нэрээ татах ёс зүй түүнд байгаагүй нь л үнэн юм даг.

Унасан нэр хүндийг чинь угааж цэвэрлээд, гялтайтал зүлгээд өгье гэж хөөрөгдөөд байгаа нөхдүүд хөөрхийг зүгээр орхичих л доо. Онигоон дээр онигоо нэмээд, орилоон дээр чарлаан нэмээд байх юм. Тэртэй тэргүй нүүрэндээ шавхайтай болчихсон Гантулга дээр хавийн хогийг хамж асгаад, "Чиний нэр хүнд сэргэчихлээ" гэж чихрээр хуурч, чихэн дээр нь цэцэг ургуулаад байх ямар хэрэг байна аа. Нэр хугарахаар яс хугар гэж. Хөл гараа гэмтээчихсэн бол өдийд эдгэчихгүй юү. Гэтэл шилдэгийн шилэн цом тэвэрсэн алиа салбадай болох нь л дутаж гэнэ, ай мөн хөөрхий еээээ” хэмээн бичжээ.

Хатуу боловч үнэнийг өчсөн сэтгүүлчийн эл үгнээс ухаантай хүн уургалаад авна даа. Хүнийг алдаж, бүдэрч явахад аавын энтэй сургааль хэлэх хүн тун ховордсон энэ цаг үед Р.Эмүжин сэтгүүлчийн “эрхэм” гишүүнд хаягласан энэ “захиа” цагаа олсон гэлтэй.

Гэвч “Манай нөгөө мангар” гэдэг шиг бодит байдлаа үл ухамсарлаж, “буруу ишилсэн сүх” шиг зөрүүдлэх Д.Гантулгын үйлдэл үнэхээр ичмээр.

УИХ-ын гишүүн хүн байтугай, жирийн нэгэн иргэн хүн ч хүүхэн хүчиндсэн хэрэгт холбогдоно гэдэг үнэхээр гутамшиг. Тийм хэргийг үйлдсэн, эс үйлдсэн байх нь сонин биш. Хамгийн гол нь ийм жигшүүрт хэрэгт УИХ-ын гишүүн хүний нэр холбогдоно гэдэг байж боломгүй зүйл. Төрийн хүний ёсзүй, түмний төлөөлөл болсон үүрэг хариуцлагаа бодоод үзсэн ч ор хөнжил, бандаашны хэрэгт нэр холбогдсоныхоо төлөө олон түмнээсээ уучлалт гуйх ухаантай байх ёстой. Даанч түүнд тийм ёс зүй, тийм зангараг, тийм ухамсар алга. “Даравч далдайж, булавч бултайдаг”-ийн жамаар өөрийнх нь холбогдсон хэргийн талаар бичсэн хэвлэлийнхнийг шүүхэд өгч, хэрүүл зарга үүсгэнгээ, оны шилдэгт өрсөлдөж олон түмний дургүйг хүргэх болов.

 Монгол төрийн түшээдийн түүхэнд байхааргүй жигшүүрт хэрэгт нэр холбогдсоноороо л “ОНЫ ОНЦЛОХ ХҮН” болдоггүй юм бол өөр юугаараа “энэ хүн” шилдгээр нэрлэгдэх гэж. Соёлтой, ёсзүйтэй улс оронд бол төрийн хүн ийм хэрэгт нэр нь холбогдсон л бол юун “Оны шилдэг”-ээр шалгарах. Ор хөнжлийнхөө хэрэгт чирэгдээд чимээ гаргалгүйгээр арилаад өгөх байлаа.

Эр хүн хийж буй үйл хэргээрээ эцэг, эхийнхээ нэрийг гаргаж явдаг /"М-Си-Эс"-ийн Оджаргал, Женко Баттулга гэдэг шиг/ бол "Энэ хүн"  Дорждугарын гэх овгоо “Бандааш” болгоод явж байгаа нь халагламаар. Гэхдээ залуу хүнд өөрийгөө засаад авах цаг зөндөө гарна. Хамгийн гол нь өмнөөсөө хуцсан болгонтой арсалдаж, "Өөрийн толгой дээрх бухлыг харалгүй, өрөөлийн толгой дээрх өвсийг харж шүүхдээд" явбал зөв хүн болж засарна гэдэг юу л бол. Ядаж бусдын хэлсэн үгийг бодох ухамсар Д.Гантулгад байгаа гэдэгт найдъя.  Р.Эмүжингийн хэлсэн энэ мэт үгээс нэгийг бодож нөгөөг тунгаана биз ээ. Арай нэр төрд халдсан хэргээр Р.Эмүжинг хүртэл шүүхэд өгчихгүй байлгүй дээ. Төгсгөлд нь тэмдэглэхэд,

"Биеэ засаад

Гэрээ зас

Гэрээ засаад

Төрөө  зас" хэмээх өвгөдийн сургааль байдгийг санаж, өөрийнхөө ухамсраар УИХ-ын гишүүнээсээ огцрох болоогүй гэж үү, Гантулга аа!

С.Баяр

Эх сурвалж: Zindaa.mn.