АЙМШИГТАЙ: Нэг иргэнд 25-28 литр архи ногдож байна

Саяхан нэг сонирхолтой судалгаа уншлаа. Сонирхолтой ч гэж дээ эмгэнэлтэй гэсэн нь илүү дээр биз ээ. Юу гэвэл, судлаачид энгийн нэг архичин, тэнэмэл эр Макс Жекийн үр, ач нар болох 840 хүнийг судалжээ. 100 жилийн хугацаанд түүний удмаас 63 дээрэмчин, 50 биеэ үнэлэгч, долоон алуурчин, 300 гуйлгачин төрөн гарсан аж. Мөн судалгаанд хамруулсан хүмүүсийн 200 нь оюуны хомсдолтой, мөн тооны хүн зуурдаар амиа алдсан байсан гэнэ. Эцэст нь түүний удамд энгийн амьдралаар аж төрсөн 20-хон хүн байсан аж.

Харин сэргэн мандуулагч Жонатан Эдвардын гэр бүлд 100 жилийн дотор 1394 хүн төржээ. Тэдний 13 нь дээд сургуулийн захирал, 100 нь сүмийн пастор, 75 нь цэргийн жанжин, 60 нь бичгийн хүн, 180 нь хуулийн мэргэжилтэн, 80 дээд хүрээнд орж, гурав нь сенат, нэг нь бүтэн улсыг захирч байжээ.

Макс Жек, Жонатан Эдвард хоёрын амьдралаас хийсэн энэхүү судалгаа АРХИ-ны хор хөнөөлийн хамгийн тод жишээ байв. Архи гэдэг ямар их уршигтай болох тэрхүү уршиг нь үе дамжин яаж халдварладгыг харуулсан дээрх судалгаанаас эш татаад аваад үзвэл ирээдүйн Монголын амьдрал ямархан харагдах бол. Өнөөдөр Монголын нийгэм архинд живсэн гэж хэлж болно. Та бод доо.

Зөвхөн Улаанбаатар хотын хэмжээнд 600 гаруй аж ахуйн нэгж архи согтууруулах ундаа худалдах, түүгээр үйлчлэх тусгай зөвшөөрөл эзэмшдэг гэсэн судалгаа байна. Өөрөөр хэлбэл нийслэлийн 270 хүн тутамд нэг архины дэлгүүр байна гэсэн үг юм. Дэлхийн ихэнхи оронд жилд нэг хүнд ногдох архины хэмжээ 8-9 литр болоход л үндэсний хэмжээнд аюул учирч байна гэж үздэг бол манай оронд нэг иргэнд жилд 25-28 литр архи ногдож байгаа гэсэн дүн мэдээг албаныхан гаргажээ.

Архи аюулын харанга дэлдэнэ гэж үүнийг л хэлнэ биз ээ.

С.Баяр

Эх сурвалж: Zindaa.mn