МАХН-ын жирийн гишүүд Н.Энхбаярыг эсэргүүцэж байна

Н.Энхбаярын зүгээс О.Баасанхүүг хамгийн их гутааж чадсан хүнд 5 сая, О.Баасанхүүгийн эсрэг  түрүүлж өлсгөлөн зарлаж хэвлэлийн хурал хийсэн хүнд 10 сая төгрөг өгөх социалист уралдаан зарлаад  байна.

     Намын жирийн гишүүдийн санаачилгаар хийсэн МАХН-ын Их чуулганы үйл ажиллагааг МАХН-ын дарга асан Н.Энхбаяр TV9 тэргүүтэй хувийн хэвлэлээрээ санаатайгаар мушгин гуйвуулж, хэсэгчлэн монтажилж зориудаар “тархи угаах” өөрийн уламжлалт аргаа гаргууд ашиглан иргэдийн итгэл үнэмшилд нөлөөлөх, үнэн бодит байдлыг гуйвуулах ажиллагааг зохион байгуулж байна.

     Өөрсдийн бусармаг үйлдлээ гүйцэлдүүлэхийн тулд АТГ, прокурор, цагдаа, тагнуул зэрэг байгууллагын нэрийг ашиглаж, дээрх байгууллагуудад шалгуулж байгаа мэтээр ярьсаар ирсэн. Нэр бүхий байгууллагуудаас ямар нэг хэрэг үүсгэх нөхцөлгүй байна гэсэн хариуг бидэнд ирүүлсэн.

МАХН-ын II Их Чуулганд оролцсон намын гишүүд өөрсдийн итгэл үнэмшил, шударга сонголтынхоо төлөө маш хүнд нөхцөл байдалтай нүүр тулах болов. Н.Энхбаярын гар хөл болсон хүмүүс аймаг сум бүрээр явж намын гишүүдийн гэрт нь очиж айлган сүрдүүлж, заналхийлж, мөнгө төгрөгөөр татах гэж оролдсон үйлдлүүд тасралтгүй явагдсаар байна.

Тухайлбал, төрийн ордонд болсон намын их чуулганд хүчинд автаж очсон, юунд очиж байгаагаа мэдэхгүй очсон,  есүсийн цуглаан болно гэхээр очсон, мөнгө өгнө гэхээр очсон гэж бичээд иргэний үнэмлэх, намын батлахаа канондаад өгвөл 300,000 төгрөг өгье гээд явж байна. Бүр канон тэврээд, Цагаан сар болох гэж байна чамд мөнгө хэрэгтэй биздээ гэх зэргээр сэтгэл зүйн болон санхүүгийн дарамт үзүүлж байна.

Зарим настай хүмүүст үр хүүхдийг чинь ажилгүй болгоно, хөгшин төгцөг чамайг чавганцтай чинь ална, Энхбаярыг битгий оролдоод байгаарай гэж согтуу залуучууд, сэтгэцийн өөрчлөлттэй эмэгтэйчүүдийг ч явуулж, утсаар яриулж байна. Зарим бүл муутай эмэгтэйчүүдрүү утасдаж  ийш тийш явахад чинь  хүүхэд чинь ганцаараа үлдэнэ шүү мэдэж байгаа юу гэхчлэн дарамталж байна.

МАХН-ын жирийн гишүүдийн  эрхийг зориудаар хаан боогдуулж, айлган сүрдүүлж, амь насанд заналхийлсэн эдгээр үйлдлүүд нь бидэнд Үндсэн хуулиар олгогдсон амьд явах, эвлэлдэн нэгдэх, үзэл бодлоо чөлөөтэй илэрхийлэх эрхэнд маань ноцтой халдсан  гэж үзэж байна. Бид энэ бүхнийг баримтжуулсан. Шаардлагатай үед гарган тавих болно.

Н.Энхбаяр МАХН-ын толгойд 8 жил  хаанчлахдаа хийгээгүй хурлаа маргааш хийх гэж байна. Тэдгээр нөхдүүдийн зохион байгуулж байгаа Баасанхүүгийн эсрэг цуглаанд МАХН-ын жирийн гишүүн байхгүй. Энхбаярын гаргууд эзэмшсэн улс төрийн технологи болох мөнгө өгвөл жагсдаг, өлсдөг, хүн зоддог,зулгаадаг, хашгирч уйлдаг, бусдыг харааж, Энхбаярыг магтан дуулдаг 100 хүрэхгүй “долдой” байгаа.

Бусад нь УБ хотод суралцдаг хөдөө орон нутгаас ирсэн оюутнууд байна. Хулгайч хулгайчийг бариарай гэж хашхирдаг шиг болж байна.  Биднийг зах дээрээс автобусаар хүмүүс зөөж ирсэн гэж гутааж гүтгэж байсан хүмүүс өөрсдөө амралтаараа очсон хөдөөний оюутнуудыг үнэ төлбөргүй УБ-руу авч ирсэнийхээ хариуд маргаашийн хурал дээрээ сандал бөглүүлэх гэж байна. Эдгээр нэр бүхий оюутнуудыг тас тусын сургуулийн захиргаанд нь мэдэгдэж, шүүхэд өгөх болно. Маргаашийн хурал дээрээ Баасанхүүг хамгийн их гутааж чадсан хүнд 5 сая, Баасанхүүгийн эсрэг  түрүүлж өлсгөлөн зарлаж хэвлэлийн хурал хийсэн хүнд 10 сая төгрөг өгөх уралдаан зарлаад байна.

Н.Энхбаяр гэдэг хүний туйлын зорилго бол өөрөө дахин МУ-ын Ерөнхийлөгч болох, эхнэр Цолмонгоо тагнуулын ерөнхий газрын дарга болгох,  хүү Батшугараа Монгол Банкны Ерөнхийлөгч болгох. Үүнийгээ ч нуудаггүй  байнга ярьдаг. Энэ хүн шунал, өс хонзонгийн золиосондоо МАХН-ыг ашиглаж жирийн гишүүд, тэдний цаана байгаа монголын ард түмний итгэлийг уландаа гишгэхийг бид зөвшөөрөхгүй.

Н.Энхбаяр монгол төрийн бүх өндөр албан тушаалыг дамжсан, МУ-ын ерөнхийлөгч байсан хүн, монгол түмнийхээ эв нэгдлийн үлгэр дууриал байх ёстой атал ардчилсан намынханыг турхирч, жагсаал цуглаан зохион байгуулж, ард нь суугаад зааж зааварлан  ард иргэдээ хагалган бутаргаж байгаа ёсгүй авирыг нь бид дэмжихгүй байна. 

МАХН-ын жирийн гишүүд нь намынхаа Их Чуулганаа хийсэн, намын даргаа ч сонгосон. Намын байгууллагаа бэхжүүлэх, бүтэц зохион байгуулалтаа тодорхой болгох зэрэг намын их чуулганы шийдвэрийг хэрэгжүүлэх ажилдаа ороод байна. Энэ хүрээнд намын байртай болох, аппаратаа бүрдүүлэх ажлууд хийгдэж байна. Бидний дараагийн ажил бол МАХН-ыг монголын эгэл ард түмний төлөөлөл болсон, жинхэнэ, итгэлийг нь зүй ёсоор хүлээсэн нам болгон төлөвшүүлэх, намын анхан шатны байгууллагаа бэхжүүлж, боловсон хүчнээ дэмжих юм.

Н.Сумъяа

Эх сурвалж: Zindaa.mn